ХIинтIала шилизивадси ЧебяхIси ВатIа дергъла бутIакьянчи МяхIяммадов Хизри МяхIяммадович акIубсири 1919 ибил дуслизив. Ил колхозлизив узули, хIялалси бузери бирули калунсири. 1941 ибил дуслизив ХIунтIена ГIярмиялизи арякьун. Ил ВатIайс къуллукъбирули калун Дальний Востоклизив, илав Хизри МяхIяммадов огнеметчикла дявила санигIятличил вегIвиуб. 1942 ибил дуслизив ил ЧебяхIси ВатIа дергълизи арякьун.
Хизри МяхIяммадовли бутIакьяндеш дариб дахъал мер-мусаличир кадикибти дявтазир. Сунела батальонничил варх Брянскла, Центральный, Первый Белорусский бикIути фронтуназив ургъули калун. Дахъал гьунарти чедаахъиб илини, гъабзадешличил ургъули, бахъал фашистуни къирбариб. Хизри МяхIяммадов хIябалра даражала дявила Асилдешла ордентачи ва «ВатIа дергъла цаибил даражала орден» бикIуси орденничира лайикьикибсири. Лерри гIурра илис дедибти дахъал юбилейный медальтира.
Хизри МяхIяммадовли бутIакьяндеш дариб Польша азадбалтахънилизир, Германиялизиб ва Берлин шагьар бурцухIели кадикибти дургъбазир.
1944 ибил дусла августла 10-17-личив огнеметчик, сержант Хизри МяхIяммадовли Польшала Висла хIеркIла дублав ургъули 20-личибра имцIали душман къирбариб, душманна 16 гьужум тIашаиб. Илар чедаахъибти гъабзадеш багьандан, ил дусла сентябрьла 7-личив Хизри МяхIяммадов Асилдешла 3-ибил даражала орденничи лайикьикиб. Илкьяйдали, 1945 ибил дусла февральличив отделениелис бекIдеш дируси Хизри МяхIяммадовли Польшала Познань шагьарла мякьлабси мерличив дигIянали вашули, фашистунала артиллерияла ярагъличи ветаили, ил установка огнеметлизибад игьубли бигахъубсири. ГIур автоматлизивад иртули душма 10-цад бургъан къирбариб. 1945 ибил дусла март базличив Хизри МяхIяммадов 2-ибил даражала Асилдешла орденничилра шабагъатлавариб.
Нушала бургъанти Берлиннизи бухIнабухъунхIели илаб цIакьси дяви кабикиб. Берлиннизир гьарил кьакьа, гьарил юрт багьандан цIакьти дявти кадиркулри. ГIяхIгъабза дубурлан селилра кIантIихIериб. Гъабзадешличил бургъули Хизри МяхIяммадовли ва сунени бекIдеш дируси отделениели 20-цад душман кабушиб ва гIяхIцад ясирбуциб. Старшина Хизри МяхIяммадовла гъабзадеш кьиматладарили, 1945 ибил дусла майла 31-личиб СССР-ла Верховный Советла Указ хIясибли фашистуначил къаршили ургъули гъабзадеш дакIударнилис 1-ибил даражала Асилдешла орден бедиб. Берлиннизир Хизри МяхIяммадовли гранатаби игьубли, фашистунала кIел танкра даргаиб. Дергълизив Хизри МяхIяммадов хIяйна вяхъибсири, амма ил мутIигIхIекIиб, арадеш къулайбиубмад сагадан дявила майдайчи чарулхъиб.
Ил хIябалра даражала ордентачил, чедибдешличил хъули чарухъун ва колхозлизив узули, сунела бузерила гьуни даимбариб. Дергъла къиян-жапа дяхIяурли, гIяхIцад хIянчира дарили, район гьалабяхI арбукес багьандан халаси бузерила пай кабихьили, дергълис гIергъи халаси хIурмат сархибси Хизри МяхIяммадов 1994 ибил дуслизив гIямрулизивад арякьун (бунагь-хатIа урдуцаб сунела).
Ахъушала районра ХIинтIала шира машгьурбарибси гIяхIгъабза ургъан ВатIа хъархIерагардеш батахъес, халкьла челябкьла даршуси биахъес багьандан, нушала улка зулмукартазибад акьубатес гъабзадешличил ургъули калунси, ахъси ула вегI, ЧебяхIси ВатIа дявила бутIакьянчи МяхIяммадов Хизри МяхIяммадович, чеабиуси наслулис гIибратли ветаур.
2014 ибил дуслизиб ХIинтIала шилизиб Хизри МяхIяммадовлис багъишлабарибси памятник. Памятник-алав умудеш ва ибгибдеш гIеббурцули саби ХIинтIала шила администрацияли ва халкьли.
Сабият ГIябдуллаева
