Ахъушала шилизибадти ПатIимат ва ХIяжимурад ГIялиевхъала хIурматчебси хъалибарг саби. ПатIимат ва ХIяжимурад барх 40 дусличибра имцIали хIербирули саби.

ПатIимат ГIялиевани 1977 ибил дуслизиб сунела бузерила гьуни бехIбихьиб Ахъушала шилизибси библиотекализиб.  Дахъал дусмазир ПатIиматли библиотекализир жавабкардешличил, черетаили, сунечи хъарси хIянчи даимбирули сари.

ХIяжимурадли шофёрли узули, сунела хъалибарг абикьес багьандан халаси бузери бариб.

ПатIиматли ва ХIяжимурадли авал урши-рурси абикьур, гIяхIси бяркъра бедили, багьудира касахъили, хъаллара барили, гIямрула гьунчи дураиб.

Урши Ислам сунела дудеш кьяйдали КамАЗ-личив шофёрли узули сай. КIел рурсили – Шагьризатли ва Сабиятли — медицинала шайчибси санигIят бяркъур,  ца рурсили – Калиматли педучилище хъараахъур.

Исламла гIямрула рархкья Замирара сунела хъубеш нешличил рарх библиотекализир жавабкардешличил рузули сари. Исламли ва Замирани абилкьули саби авал урши-рурси.  Илдала ца урши МяхIяммад дебали спортличи дигичевси, серхурси, гъирачевси, мушулбашнила шайчирти абзаначив чедибдешуни сархуси урши сай.

ПатIиматла ва ХIяжимурадла дурхIначибад акIубтира леб гьанна урчIемал урши-рурси. Илди абикьахъесра гьар шайчибад кумекбикIули саби.

Гьаннала гIергъира чула гIямрулизир арадеш, сархибдешуни имцIадикIаб, чула дигутани разибирули хIербиэс кьадарбиаб. Чула дурхIнас ва илдачибад акIубтас даршуси челябкьла кьадарбиаб!

С.ГIябдуллаева