Ну акIубси ши Лавашала районнизиб мерлабиубси саби. Илис «Няскент» бикIар. Няскент гьар шайчибад ахъти дубуртани алавбуцили саби. Илаб хIербирули саби 3354 адам, сабира дебали уркIи гьаргти, сахаватти ва хIурматчебти.
Няскентла бахъалгъунти халкь имцIаливан хъумачиб бузули, капуста дашахъули хIербирули саби. Амма лебилра адамтани хъуми хIедузахъу. ЦацабехIти машинабала шоферти саби.
Нушала ши акIубси саби 1870 ибил дуслизиб. Бурни хIясибли, гьалабла замана, илар ахъушантала хъуми лертири. Илдас мурталра хIеруди гIягIниси биъни багьандан, адамтани илаб буэс пикрибарибсири, диштIа-диштIати юртанира дарили сабира. Илаб Ахъушала халкь имцIабикIес бехIбихьиб, чулира ил мерлис «Няскент» бихьили, ши акIахъубти.
Гьала-гьала Няскентлизир я мижитуни, я хIябри, я базурти лерти ахIенри. Илав адам вебкIалри, ахъили 11 километрла гьуни, Ахъушала шилизи хIяривихьес вихусири. Се-биалра асес хIяжатбикалри, эмхIела уркураличиб Буйнакъсклизи башутири, амма ил шагьарла у итхIели декIарси бири. Илис Темир-Хан-Шура бикIусири.
Замана аркьуцад, ши гьалабяхI башулри. Илар тукенти, мижитуни, школаби ва цархIилти секIал тIашдалтес бехIбихьиб.
Дила шилизибад дурабухъунти чумра машгьурти адам леб. Илдазибад бахъалгъунти дургъбазир чула гъабзадеш, урехиагардеш ва игитдеш дакIударниличил ва дахъал медальти сархниличил декIарбухъун. Мисаллис буралли, дила хала дудешла ца узи ХIунтIена ГIярмиялизив ургъули калунсири. Сунела гьунартачил илини чумал медаль сархиб. Няскентлизиб илала уличилси кьакьара бархли леб.
Нушала шилизир дергълизиб алхунтас багъишладарибти кIел памятник тIашдатур: ца шила бегIлара дайлаб, итил биалли, школала азбарлабси анхълаб. Илди памятникуначир лебилра дургъбази арбякьунти бургъантала, илабад чарбухъунтала ва чархIебухъунтала суратуни, уми делкIи сари. Нуша школализир дучIухIели, гьаман ила дашули дирехIери.
Нушала жинсла дебали тамашала ва халаси тарихла бегI чеу леб. Ил «Устахъали» саби. Ил бихьибси саби жяв заманализиб. Дила хала дудешла дудешла узи мегьла уста уибси сай, илис МяхIяммад бикIи, амма уста мегьла сайли хьалли, илини дахъал журала секIулти дебали чедетаахъили далдирес балусири. Ил сабабли, лебилра МяхIяммадла жинсличи ил чеу тIинтIбиубсири.
Дила дудешла нешлис ХIява бикIусири. Ил ХажалагIяялизиб гуми бируси бригадализир рузусири. Илар илини халати къаркъуби ахъдурци, уркьли дихи. Сунела хъалибарглис яшавбарес багьандан, ил савли-жявли ила рузес хьурали аррашусири. БерхIи гIелабикибхIели, кьанси манзиллизир, хъули чаррулхъусири.
Няскентла шила мякьлаб Кьакьамахьира леб. Илис дарган мезли Кьакьа бикIар. Илав дила нешла хала дудеш хIерирусири. Илис ГIялихIяжи бикIусири. ИтхIели ил дебали давлачевси вирусири. Илини ахъушан устаз ГIялихIяжичил варх хьурали вашули, хIяж барибсири.
1930 ибил дуслизиб мас-мулкла бегIтазирад илдала давлуми керисес бехIбихьибтири. Илала давла лебни багьандан, гьар секIал керасили, ил Къарабудагъкентла районна Гьели бикIуси шилизи дугIкаибсири. Илра, илала хъалибаргра илаб хIербирули калунтири. Амма илдала дурхIнала дурхIни чарбиубли Няскентлизи гечкабиубтири. Дила бахъал гъамти къумукъланти леб. Дила нешла дудеш, МяхIяммадрасулли, умули къумукълан мез дала.
Хала неш биалли, илис Рукьият бикIар, Няскентла школализир ручIули рири. Илини 10 класс тамандариб.
БусягIятла замана дила ши дебали жагаси, гьалабяхI арбякьунси саби. Шила духIнар чумра халати тукен лер: дигалли палтарла, дигалли продуктунала. Шила дублаб халаси мижит барес балбуцили саби, чумал автомобильный заправка, хозяйственный тукен, мадраса лер. Мижит шилизиб верхIъибил саби.
Наб ну акIубси ва халараибси ши дебали дигахъис. Илаб хIербирути пергер адамти саби. Илди цаличи ца халаси хIурматра дигира дакIудирули, цабалги хIеркабирули саби.
Арали датабая, хIулкIули хIердиабая, Няскентла шанти!
Марьям МяхIяммадхIяжиева
