Республикала дахъал шалубарси лицей-интернатла ва Темирхановла уличилси Мажалисла шила школала хIянчизар, кумекчи хасси балбуц бетурхуси мерличи чуйнара кумекличил рякьунси Гулизат Мурадханова сунела школала мугIяллимтачил гьунираиб ва илдачил рарх ВатIан дигахънилашалси ихтилат бучIантас дураберкIиб. КIинайс биалли,  маскировочный сетани (бургъантас хасси дигIяндеш алкIахъути) дирнила шайчибси устадешла дарс дураберкIиб.

«Ишдусла майла 17-личирад рехIрихьибсира ну илди сетани дирес. ИшбархIилис нуни 25-йчирра имцIали сетани дарилра, сарира 150 кв.метрла адикибти. Илди нуни фронтлизи дархьилра. Маскировочные сетани жура-журала дирути сари, амма бургъантани нушала гапдирули сари. Илди дебали зугьати сари ва квадрокоптартазибад халаси дигIяндеш бирули саби», — рикIи Г.Мурадханова.

Хасси балбуц бетурхуси мер-мусаличи Дагъистайзирад дархьибти маскировочный сетаназибад бегIлара халаси 36 кв.метрличи абикиб илира буриб илини. КIинайс Г.Мурадхановани сетани думхнила тяхIяр-кьяйда дурхIнази чедаахъиб.

Устадешла дарс таманбиубли гIергъи, Гулизат Мурадхановани Мажалисла школала директор Заира Сулайбановани, мугIяллим Луиза Мускаевани ва бучIантала бегIтани цаси баркьудилизи халаси пай кабирхьниличила цIакьбарили буриб.  «Нушани СВО-лизибти бургъантас кумек башахъулра. Дила юлдашуни-кумекчибачил рарх ну ила хIяйна рякьунра. Нушала кьукьялизиб бахъал леб гIярмиялизиб къуллукъбирутас халаси кумек бирути. Илди саби: бегI гьалар хандакьуназир улкахъути шямани дирес бехIбихьибти Ильясоовхъала хъалибарг, ва МяхIяммад ХIусейханов чуйнара СВО-ла мер-мусаличи кумекличил вякьунси, гIур биалли – хасси балбуцла бутIакьянчи ветаурси. Школабала бучIантанира кумекбирули саби. 2023 ибил дуслизир гIяхIцад хасти шямани илданира дархьибтири. Ишдуслизир нушани маскировочный сетани дирулра. Ил балбуцлизир бутIакьяндеш дирути лебтасалра халаси баркалла багьахъес дигулра. Цадиубли дузахIелли, чедибдеш сархесра нушаб гьамадли бирар», — буриб илини.

Хайдакьла районна администрацияла пресс-служба