Ахъушала районна Кьассагумахьила МО-лизи кабурхуси УбяхI Хъаршлила шилизир дахъал дусмазир хIялалси бу­зери бирули, чумал дус учительницалира ру­зули сари Рабазанова Оксана Изеровна. Ок­са­на Рабазанова гьарахъси мерличирад ра­кIили, Кьур­бан Абакаровличил кьисмат ца­барили, УбяхI Хъаршлила шилизир хIеррирули сари. Ил Дер­бент шагьарлизирадси лезгибала миллатла хьунул адам сари.
Оксана Изеровна акIубси сари бахъал дурхI­нала бегI хъалибарглизир. Илала неш Аминатли ва дудеш Изерли шел рурси абикьур. Хъалибарг абикьес багьандан Изер Рабазановли автобусла шоферли узули хIялалси бузери бариб, амма ил жявли гIямрулизивад арякьун. Ил багьандан, Ок­санала неш Аминатли дурхIни биштIали лебай хIянчиличи бяркъур, сунечил барх хъуми дел­гIа­хъули, сабухъ бурчахъули, хъа духIнар дирути уму­дешличи, ибгибдешличи ва кьалтинти душа­хъули. Чули дершибти кьалтинти дицес башули, яшавлис хIялалси бузери бирахъес бурсибариб.
Оксанани сунела гIямрула вархкья Кьурбайчил барх шел урши-рурси абикьурли, илдас гIяхIси бяркъра бедили, халкьличи ва ВатIайчи дигичебти, жавабкарти бетаахъурли гIямрула гьунчи дураили сари.
Оксана Рабазанова дахъал дусмазир УбяхI Хъаршлила шила халкьличил цариубли хIер­ри­рули сари. Ил бехIбихьудла классунала учительницали рузули, хIялалли сунела бузерила гьуни даимбирули сари, илини Москвализибси педагогический институт таманбарибсири.
Оксана Изеровнала халалгъуна урши Мя­хIям­мад Абакаров акIубси сай 1999 ибил дуслизив. Школа таманбарили гIергъи МяхIяч­къа­лализибси Правовая академияла колледжла юридический факультетлизи керхур. МяхIяммад юристла санигIятличилра вегIиубли, ВатIайс къуллукъбарес арякьун. Ва­­тIайс къуллукъбирни ахирличи бикили гIер­гъи МяхIяммадлис дявила бузерила тяхIяр-кьяйда гIяхIдизур, ва 2022 ибил дус­лизиб илини Россияла Федерацияла Оборонала Министерстволичил вягIда къул­басбариб. СВО-ла анцIбукьуни дехI­ди­хьибти цаэсти бурхIназивадал Мя­хIям­мад Ва­тIа хъархIерагардеш балтахъули, халкьла ва чехалабиуси наслула челябкьла мяхI­кам­бирули, илав гъабзадешличил ургъули сай.
МяхIяммад Абакаров СВО-лизив гъабзадешличил декIарухъни багьандан, РФ-ла Оборонала Министерствола шайзивад чумал шабагъатличи лайикьикили сай. Илди-ургаб леб Жуковла медальра, сай ургъуси отрядла командирра бургъантира берцахъес дебали кумеквиъни багьандан бедибси. МяхIяммад лайикьикили сай гIурра «Дявилизив декIарухъни багьандан», «СВО-ла бутIакьянчи» бикIути медальтачира ва сунечи хъарси къуллукъ ахъси даражаличиб бетурхахънилис РФ-ла Президент В.В.Путинна шайзивад илини къулбасдарибти Баркаллала кагъуртачира. МяхIяммад Кьурбанович офицерла званиеличира лайикьвикили сай.
МяхIяммадла виштIалгъуна узи Изер 2003-ибил дуслизив акIубсири, школа таманбарили гIергъи ил Пермь шагьарлизибси финансунала колледжлизи керхур. Колледж таманбарили гIергъи, Ростов шагьарлизибси РОСгвардиялизиб вягIда хIясибли, ВатIайс къуллукъбирули сай. Изерли ноябрьличив хъули чарулхъуси сай.
Илди уршбанира саби акIубси ва халабаибси УбяхI Хъаршлила шила, чула бегIтани кьяйдали, халкь-ургаб хIурмат сархили саби.
Оксанала рурси Амина Дербент шагьарлизир медучилищелизир ручIули сари, биштIатигъунти кIелра урши школализиб бучIули саби. Оксанала дурхIнала дудеш Кьурбан Абакаровлара арадешлизиб нукьсандеш лебси саби.
ГIяхIгъабза дурхIни абикьурси Оксана Рабазановасра сунела дигутани разирирули, гIямрулизир ва бузерилизир сархибдешуни имцIадикIули хIерриэс кьадарбиаб!
Чула урши МяхIяммадра, илкьяйдали, лебилра СВО-лизир бутIакьяндеш дирутира ара-сагъли, чедибдешра сархили жяв-жявли хъули чарбухъаб чула бегIтачи ва дигутачи.
Иш белкI хIядурбирухIели кумекбарибси, черетаибси, дигичерси, дахъал дусмазиб «Бархьдешла гьуни» газетала редакцияличил бархбас бузахъуси, ЧебяхI Хъаршлила шила библиотекала заведующая ПатIимат ГIямаровас баркалла багьахъес дигулра.

С.ГIябдуллаева