Дурхъаси Рабазан базли нуша гIурра разидарира. Сунечил дарх разидеш, арадеш, гIяхIдеш дихуси, адамтала уркIбазиб иман ва уркIецIи имцIабируси, садакьлуми дирахъуси, балга-дугIя чеимцIадирахъуси дурхъаси баз… Дуслизир бегIлара дурхъати 30 бархIи, сарира 10 бархIиван жявли шалгIердулхъути. Бусурманти лебилра цабирахъуси, лебтанилра барх дуббуцари бурцуси баз саби ил. ЦахIнабли касалли, баракатла баз саби.
Лерилра секIал адамли халкьлизи кьимат кабатахъес дирути диалли, мисаллис, урхI «дехIибала дирули сай» бикIахъес дирули виалли, цархIилтала баркаллалис садакьа буртIули биалли, гIяхIсант багьахъес кумек гIеббиахъули виалли, дуббуцари илкьяйдали цархIил багьандан буцес хIейрар. Сен? СенахIенну дуббуцибтала ургав хIу хIевцибси виадлира кьацIли укес хIейруд. Буцибсира хIед саби – хIебуцибсира.
Дурхъаси базлизиб дуббуцари буцницун баибси ахIен. Ил заяли архIебукьяхъесра къайгънавиркьес чевкъар. Сен-сен викIадли? Къакъла гIелав гъайхIейкIес, чевдукархIерхIес, вайси секIал хIебирес, вайсиличи хIерхIейкIес, вайти гъайли хIевгьес, мезли хIеркьес гIягIнибиркур. КъантIли буралли, умули, хIялалли хIериэс чебиркур. Амма се гIяхIдеша, бухъянси лезмили, хъярхъси хIялли нушала лерилра секIал дукьдулъули сари. Дай уркIи вайси мабирид, мабурид бикIахъули, нушани сеннира бирулра. Иш дурхъаси базличив нушани гьарил адам сай левси тяхIярли чеэс дирулра, сенахIенну шайтIан мегьла рахажличил бигьунси саби бикIар, ил багьандан дирути баркьудлуми чIянкIли ца адамлизирадцун сари кадиркути.
ГIяхIси секIайчила гъайикIес вирар. Рабазан базличив сай нушани адам сунес Аллагьли делкIунти хъарбаркьуни ункъли дирули чейуси. Держли хIевжули, далай-делхъ дархькадатурли, таравихIла дехIибайчи вашули, бархIехъ букахъес цаличи ца жибирули, жявли гьанкI ахъес кабилхьули, сенахIенну савли-жявли укес (сухурличи) алзес гIягIнисихIели, Кьуръан бучIули, разидеш, халкьличил бархбас имцIабирули. Ишкьяйдали адамли дуркIути диалри лерилра гIямру, ахиратлизибра дебали гьамадли бири.
Дунъя вирхусилис — туснакъгъуна саби, хIерхусилис — Гьалжана саби бикIути къугънас ахIен. СенахIенну вирхуси адам иш дунъяличив сунес дигутани хIеркьур, илини хIялалсира хIярамсира декIарбарес бала, ил дахъал имтихIянтачил къаршииркур. Ил бунагьласи секIайзивад тяйдииркур, сунела гIибадатлис диргалабулхъуси секIал кьабулхIебиру ил сецадла пайдаласи яра сабухъчебси биалра… Секьяйдали биаллира, нуша бусурмантили акIахънира дебали халаси игъбар саби.
Анжела Мутазова
