Хасси балбуц бетурхуси мер-мусаличир дакIударибти гъабзадешла баркьудлуми багьандан, Хайдакьла районна Жавгъатла шилизивадси ХIясанкьади ХIясанхIусенов Жуковла медальличил шабагъатлавариб.
ГIясанхIусенов ХIясанкьади МяхIяммадович акIубси сай декабрьла 15-личив 1989 ибил дуслизив. Илини Жавгъатла шилизибси школа таманбарибсири. Школала гIямрулизир илини мурталра жигарла бутIакьяндеш дирутири, ункъли учIусири, дурсрала олимпиадабачи вашусири ва спортла абзанала бутIакьянчили вирусири. Школа белчIи гIергъи, муниципалитетла цахIнабикуназив хъулри лушули узусири. Гьанна биалли — ХIясанкьади 5 уршила ва ца рурсила дудеш сай. ХI.ХIусеновла хала дудеш ЧебяхIси ВатIа дергъла бутIакьянчи вирусири, сайра 16 дус виубхIели сай гIяхIъулали фронтлизи арякьунси. ВатIан батахъес ургъуси илала хала дудешли ункъли чедетаахъили дявила къуллукъуни тамандирутири. Ил багьандан ил дахъал медальтачил ва Баркаллала кагъуртачил шабагъатлаварибси сай.
СВО-ла бутIакьянчи ХIясанкьадини хала дудешла у саби бихуси. ВиштIахIели ил хала дудешличил дебали цавалгунсири. Иличибад гIибрат касили, ХIясанкьадини Хайдакьла ва Дахадаевла районтала дявила комиссариатлизиб вягIда бигьун ва ВатIа гьалабси чебла ахъес арякьун.
Хасси балбуцла башрилизиб ХIясанкьади ва илала бархкьяби гьачамцун ахIен тупала гIяскуртала цIалиу бикибти, амма ХIясанкьадила дагьрили ва бажар-жигарли сунела ва бархтала жан уцахъули сари. Сунела жан ахIерахIедарили илини дявила авлахъличиб чумра бяхъибти берцахъили сай. Донецкла областьлизибси Клещеевка-Бахмутлизив ил вяхъили, госпитальлизив калун. АравиубхIели БяхIмудкьадини сунела къуллукъ даимбариб. Ца камси замана бикили гIергъи, дяхъила асарти дакIудирули ил хъули вархьиб. Хъули чарухъес гьалавра илини хIябал бургъанна жан дерцахъиб. Гьанна биалли, Улкала Президент В.В.Путинна ХIукму хIясибли ил Жуковла медальличил шабагъатлавариб.
ГIямрула багьаагарти дурсри кадирхьнилис сунела мугIяллимтас ва хала дудешлис ил баркалла викIули сай. СВО-ла лебилра бутIакьянчиби илини гьаннара гIеббурцули сай ва чучи хъарти масъулти илдани детурхахъниличи умутли сай.
«АхIерти юлдашуни! ХIуша ВатIан ва нушала дурхIнала челябкьла батахъес къарауйчирра. Нуша хIушачил дарх сарра! Чедибдеш нушагIебли бирар!», — викIули сай ил.
Хайдакьла районна администрацияла пресс-служба
