Избербаш шагьарлизирадси Аминат Тяймасовани, «Молодые стратеги России» бикIуси лебил Россияла конкурслизиб чебяхIси шабагъат сархили, миллатла «ГьаладяхI дашути мер-муса» премия касиб. Премия бедибси саби РФ-ла муниципалитетла цалабяхъ гьалабяхI аркниличи бяхIчиаибси бегIлара гIяхIси проект балкьаахъни багьандан.
РФ-ла Президентла гьалабси РАНХиГС-ла Северный Кавказла институтла магистрантка А.Тяймасовани Избербаш шагьар гьалабяхI башахънила аги-кьяйда сипатдарили, сари-регIти пикруми конкурсличи гьаладихьиб. Шагьарла адамти шинничил гIеббурцнила, жамигIятла транспортла кьялилизир дарсдешуни кадурхахънила ва больница тIашбалтнила хIянчи хъарарахънила аргъбаибти масъулти гьунчидиркахънила хIекьлизирти илала пикруми экспертунани чихъли кьиматладариб.
«Илгъуна шабагъат касес бикни нуни халаси игъбарлизи халбирулра. Ил нушала регионна гIяхIдешлис дурадуркIути хIянчи детурхахънилисра гьаликI саби. Илди пикруми гIямрулизир дурадеркIнили избербашлантала гIямру къулайтили ва талихIчертили детарахъниличи рирхулра», — рикIи Аминат Тяймасова.
Бурес чебиркур, Аминатла ил бегI гьалабси чедибдеш ахIен. Гьалабра илини СКФО экономикалашал-социальный бяхIчибизлизиб гьалабяхI башахънила шайчибси Чемпионатла гран-при касибсири, илкьяйдали лебил Россияла экологиялашалси ва «Эгер ну Президент виасри» бикIуси багьудила проектунала лебил Россияла конкурсуназир чедирикибсири.
