📣«Дила мурад — хIушачил дарх сиптаби гIямрулизир детерхахъни саби», — викIули сай Арсен ГъазимяхIяммадович Юсупов.
Буралли, илди ца ити дурибти дацIти гъай ахIен. Лебтанилра балуливан, илала гъай мурталра баркьудлумачил мардирути сари. Тяп илкьяйда биъни нушани чебиулра гьар бархIила гIямрулизиб: дахъал сари илала къайгъни республикала СМИ-би гьаладяхI дашахънила шайчир, ил лугIилизир – миллатла прессара, илхIелира илдазирад гьарилла чучи хасти тяхIяр-кьяйдара калахъи.
Буралли, Арсен ГъазимяхIяммадовичли хIябцIали дусличибра имцIали хIянчи барили сай журналистикала кьялилизиб. ГIяхIцад дусмазиб илини халати устадешличил дарган мезли дурабулхъуси жамигIятла-политикала «Замана» газеталис бекIдеш дирутири, илала кьадри-кьимат республикализирцунра ахIи, улкала даражаличира адикахъили.
Дагъистан Республикала СМИ-бала Ассоциацияла председатель, РФ-ла ЖамигIятла палатализибси регионна СМИ-бала бузери дурусбиркахъуси советла член, Дагъистан Республикала культурала урибси хIянчизар А.Юсуповли гьуни чебиахъуси «Замана» газетали улкала декIар-декIарти конкурсуначир жигарла бутIакьяндеш дариб, лебил Россияла «Прессала мургьила фонд» бикIуси конкурслизир цаибти мерани дуциб. Гьарли-марли, конкурсла экспертунани даргантас ил гьарли-марли дурхъаси гIяхIялли бетаурси газета сунела бучIантас дебали пайдаласи биъниличила бурулри. Гьайгьайрагу, улкала лугIилишал дахъал СМИ-бала ургаб даргала газета гIяхIтигъунти изданиебала къяйлизи кабатни даргантасцунра ахIи, арагIебли Дагъистайсра чихъси кьимат беднилизи халбарес вирар.
ИшхIелла технологияби гьаладяхI дашуси, сайтани ва социальный сетаначи хаслира имцIали пикри бяхIчииуси замана газетаби мяхIкамдарес, илди миллатлис культурала хазнали калахъес дебали къиянси ва мягIничебси хIянчи саби. Амма ил шайчибра Арсен ГъазимяхIяммадовичли асарчебси тяхIяр балбуциб: лерилра миллатла изданиеби цаси, уржибси кабизлизи цаладяхъиб ва «Дагъистан» бикIуси Этномедиахолдинг акIахъуб. Илала бузерила хьулчилибиубси, бекIлибиубси бетуцра республикала миллатла мезани мяхIкамдирниличи ва гьаладяхI дашахъниличи бяхIчиаибси саби.
«Печатьла изданиеби мурталра дузар. Гьаларван хIедузар, амма илди кавлан. Нушаб Интернетлизир дузесра чебиркур. Лерилра майдунти ва соцсетани пайдаладирес, вегIла изданиеби калахъес хIяжатли сари. Чинаб хIербирули биалра, миллатунала вакилтани, нушала сайтлизи бухIнабухъи, чула мезаначил дурадулхъути сагати хабурти дучIес, передачабачи хIербикIес имканти алкIахъес гIягIниси саби. Илди лерилра секIал гьунчидикахъес хIяжатти сари. Гьарил редакциялис мини-холдинг бетаэс чебиркур», — бурибсири А.Юсуповли журналистуначилси ихтилатлизиб.
Этномедиахолдинглис бекIдеш дируси замана Арсен Юсуповли сагати сиптаби, проектуни дузесаиб, чулара кумекличил миллатла СМИ-бала журналистунала ургабси даражала алапа ахъбуцес, изданиебала сайтаназир дигести дарсдешуни кадикахъес имканбакIахъибти. Сунени бекIдеш дируси кабизла сабухъчебси ва асарчебси хIянчи чебаили, республикала руководстволи Арсен ГъазимяхIяммадович ДР-ла печатьла ва багьахънибала шайчибси Агенствола руководительла къуллукъуни хъардариб. Буралли, гьар-чинаралра багалати сагадешуни акIахъес къайгъичевси ил ишбархIира гIяхIти хIясилти чедиахъули узули сай, адамти гьар бархIилати гIямрулизиб бяхIигути масъулти арзахъес икьалабирули, илди гIеббурцули.
