«ГIяхIгъубзнас даимси машгьурдеш!
Даимси машгьурдеш!
Даимси машгьурдеш!
ГIяхIгъубзнас даимси машгьурдеш!
ГIяхIгъубзнас машгьурдеш!
Машгьурдеш!!
Селис гIягIнисив ил илдас, ил машгьурдеш, —
бебкIибтас?
Селис гIягIнисив ил илдас, ил машгьурдеш, —
алхунтас?
Дахъал мицIир жан –
дерцахъибтас.
Чула гIямру –
дерцахъес хIебиубтас.
Селис гIягIнисив илдас, ил машгьурдеш, —
бебкIибтас?…
Чедирти Роберт Рождественскийла «ВебкIибсила черкад дирути балга-дугIя» («Реквием») бикIуси поэмализирадти дугьбачил бехIбихьиб ишди бурхIназиб ДГПУ-ла бекIлибиубси библиотекализиб дураберкIибси «Дявтазиб бургъантани бири, университетлизиб – мугIяллимтани» бикIуси балбуц. Ил балбуц нушала ЧебяхIси Чедибдеш 80 дус биънила юбилейлис хасбарибсири ва ВатIа ЧебяхIси дергълизир бутIакьяндеш дарибти Дагъиста пачалихъла педагогикала университетла мугIяллимтас багъишлабарибсири.
Университетла бекIлибиубси библиотекала директор Марина Асваровна ГIялибековани ил балбуц дураберкIахъес сиптакардеш дакIударибтири.
Балбуцличи бакIибтачи саламтачил дугьаизурси ДГПУ-ла ректор Нариман Асварович Асваровли ЧебяхIси ВатIа дергълизиб бутIакьяндеш дарибти лебилра педуниверситетла мугIяллимти гьанбушиб. «ИшбархIи нушани ишаб хIурматла дугьбачил гьанбуршути мугIяллимти, — викIар Нариман Асварович, — нушаб ЧебяхIси Чедибдеш сархибти бургъантицун ахIенну, Дагъиста дахъал наслубас чебяхIси багьуди гибтира саби». Сунела гъайлизиб илини бусягIят университетлизиб бучIути жагьилти чузиб багьудила кьяли гьалабяхI башахъес халаси къайгъи дакIубарибти мугIяллимтачи мешутили биахъесра жибариб.
«Ветеранти-мугIяллимти, — даимбариб ректорли буруси, — чули бучIахъули калунтала уркIбазир мурхьти къел датурти хасси, балгунси учительтала кьукья саби. Ил багьандан саби илди чучил барх бузутани ва лебилра саби балутани уркIи-уркIилабад гьанбуршути».
Балбуцличиб бусягIятла заманала студентунани педуниверситетлизиб бузули калунти ветерантала дявила гьундурачила гьанбикахъиб. Гьайгьайрагу, бегI гьалаб — политикала экономикала кафедрала заведующий Советский Союзла Игит Ризван Баширович Сулайбановла дявила гьуниличила.
1943 ибил дусла сентябрьличиб капитан Р.Сулайбановла батальонна бургъанти, полклизиб цархIилтас гьалаб Черниговла областьлизибси Десна хIеркI ахъили, итил шайчибти фашистунала хандакьуназиб саби мерлабиубтири. Капитан Ризван Сулайбановли гIурра дахъал гъабзадешла гьунарти дарибтири. Нушала хIукуматли капитан Сулайбановла гьунарти дебали ахъли кьиматладарибтири. Ленинна орден ва «Мургьила зубари» медальличил дарх ХIунтIена байрахъла, Александр Невскийла, ВатIа дявила цаибил журала кIел орденра ва дахъал медальтира илала михъирличир рурхIутири.
Дергълизивад чарухъунси Ризван Баширович Дагъиста ВЛКСМ-ла обкомла цаибил секретарьла ва цархIилти ахъти къуллукъуначив узули калунсири.
Балбуцличиб гъайбикIутани ДГПИ-ла проректорли узуси Валентин Иванович Сурмачевскийра, англияла мезла кафедрала заведующийли калунси ГIябдулла Мамедбекович Мурсаловра, мугIяллимти Санибек ИсмягIилович ГIяхIмадовра, Иван Иванович Комаровра, физикала ва математикала факультетла библиотекала заведующаяли рируси Таисия Никифоровна Беляевара ва цархIилтира гьанбушиб. Илдачила буруси видео-материалли чебирцIахъулри.
Университетла мугIяллимтани ва студентунани МяхIячкъала шагьарла школабазиб бучIутачил барх Р.Рождественскийла «Реквием» поэма хIясибли барибси литературала композицияра чебаахъиб.
Росгвардияла ансамбльлира балбуцличир бутIакьяндеш дариб. Илала солист Денис Федоренкони «День Победы» ва «Тёмная ночь» далуйти делчIун. Музыкала—педагогикала факультетла 4-ибил курсла студентка ГIяйшат МяхIяммадовара илис гIелахIерухъун. Илини «Синий платочек» ва «Майский вальс» бикIути далуйтира делчIун.
Лебилра балбуцличи бакIибти гречкала кьукьразибад ва хIяйва диълизибад барибси, солдатла бизиси кашли бахун.
Илдигъунти далдуцуни дурадуркIалли, нушаб, фашист гъармукаби бячIи, улкала хъархIерагардеш калахъунти нушала дудешуни ва хала дудешуни имцIали гьанбиркути саби. Нушани ЧебяхIси ВатIа дергъла тарих цархIил журали белкIахъес чизилра хIебалтахIе! Чилра ва селра хъумуртути ахIен!
Балбуцла ахирличир Рождественскийла «Реквием» поэмализирадти дугьби гIурра зайдухъахъун.
ХIяжимурад Ражабов
