ГIяхIмадова Марият ГIяхIмадовна акIубси сари Дахадаевла районна ХудуцIла шилизир 1946 ибил дусла мартла 5-личир.
Школа таманбарили гIергъи, ил Дербентла педагогикала училищелизи карерхур. СанигIятличи регIриубли, Хайдакьла районна Мажалисла шилизиб сунела бузерила гьуни бехIбихьиб. ДурхIнас багьудлуми ва гIяхIси бяркъ бедлугули, ил бехIбихьудла классунала мугIяллимли рузули калун.
Камси замана бикибхIели, хъалибаргла аги-кьяйда хIясибли Марият ГIяхIмадовнас Дербент шагьарлизи гечриэс кьадарбиуб. Илаб илини сунела педагогикала хIяракат даимбариб, урга даражала 12 ибил школализир рузули. Баягъи школализирра илини бехIбихьудла классуназир дурсри кадирхьулри.
Бузерила дусмала бухIнаб Марият ГIяхIмадовани дебали чекаризурси, устадеш лерси, сунечи хъарси заманаличиб гьунчибиркахъуси мугIяллим сарливан чебаахъиб. Илини бархкьябала, школала бучIантала ва илдала бегIтала ургаб хIурмат сархиб.
Школализиб 50 дусцадхIи хIянчи барибси Марият ГIяхIмадова бузерила ветеран сари. Жагьилтала насихIятчи сарливан, ишхIелира илини шантани дурадуркIути далдуцуназир жигарла бутIакьяндеш дирули рирар.
М.ГIяхIмадова гьарра шайчирад пагьмучерси сари, ил мурталра сагати сиптабагIир умцIули рирар, кIинайс илди гIямрулизир детерхахъес халаси къайгъи дакIубирули.
Буралли, асилси бузери багьандан, ил партияла райкомла ХIурматла Грамоталичи, декIар-декIарти ведомствобала Баркаллала кагъуртачи, Дагъиста АССР-ла Верховный Советла Председательла шайзибадси ХIурматла Грамоталичи лайикьрикиб.
Хъалибаргличила буралли, илини авал рурси абикьур ва гIямрула гьунчи дураиб.
БусягIятла замана Марият ГIяхIмадовнани бамсриихъули сари. Ишди бурхIназиб илала юбилейра сабри. Иличил бархбасахъи, илис мубаракла дугьбира дурес дигахъаси: чIумаси арадеш, эркинси баракат, даршудеш, балгундеш.
Акьуси замана илини хъалибаргличил буркIули сари, дурхIнала баркьибтас бяркъ бедлугниличи лерилра цIакьани дяхIчиаили ва илди дигиличил алавбуцили.
Марият ГIяхIмадовнас дебали дигахъу музыка, тIабигIят, имцIали замана буркIу тIабигIятличи архIяби дурадуркIули. Илини халаси пагьмучердешличил цаладирхъути сари назмурти. Илкьяйдали гIямрула къиянти аги-кьяйдализи бикибти адамтас кумекбаресра замана бургули рирар.
Гьамадли ахIенси кьисматла регI Марият ГIяхIмадовна Буркьун-Даргала халкьла пасихIкар рурси сари.
Мурад Алжанбеков
