Ишди бурхIназив нушала редакциялизи гIяхIладли вакIиб Сергокъалала районна Миглакьасимахьилизивадси СВО-ла бутIакьянчи, лейтенант ИштIалбяхIяммаев МяхIяммад ГIябдулкьадирович. Иличилси гьунибаънили нушала лебталалра уркIбачи халаси асар бариб.
Дебали гIяхIбизур, МяхIяммад умули чула лугъатла мезли гъайкайкIни. Ихтилатлизиб илини ца-хIябал сарри урус мезла дев гъудурдарибти, илхIелира – терминти, сарира дарган мезличил дарсдарес хIейрути. ГьатIиралра дигеслири илини уркIилизи атIести дугьби дурибхIели: «Нушани СВО-ла мер-мусаличир дявила хъарбаркьуни тамандирухIели, душмайчила баянти цаладирхъухIели, декIар-декIарти кьукьназиб дарганти лебли биалри, илдачил бархбасуни кадизахъурли, гъайдикIутири. Нуша урус мезли гъайхIедикIули, нешла мезли баянти дурнилизиб халаси кумек лебри: илдазибад Украинала миллатчибани биалли, селра иргъули ахIенри».
28 дус вибуси виалра, М.ИштIалбяхIяммаевли халаветаибси адамливан гIямрула хIял-хIякьикьат далулри. Илкьяйда биъни белгибиуб иличилси ихтилатлизиб.
Дявила хасси балбуц бехIбихьибхIели, нушала улкализиб адамти гIяскуртазиб къуллукъбирахъес жибирнила (мобилизация) хIяракат бехIбихьибсири. Ил хIяракатла дазурбазив, МяхIяммадра СВО бетурхуси мер-мусаличи ваиб. Ил кIина вяхъиб, гьаланачи кункли, кьяшлизивад, гIур биалли, декIли. Ургъанни буруливан, гьужум бетерхурси мерличивад сай дурасес, Бурденкола уличилси Москвализибси госпитальлизи ваахъес бархкьябани дебали халаси кумек барилри. БусягIятла замана илини, арадешлизир нукьсандешуни лерни багьандан, Каспийсклизибси дявила частьлизиб бузери даимбирулри. Илис гьаннала гIергъира операция барес хIяжатси саби. Амма ил сагадан дявила хасси балбуц бетурхуси мерличи чарухъес хIядурвиублири.
Командир сайливан, дявила хасси балбуцлизир детурхути лерилра аги-кьяйдаличила, бурухIели МяхIяммадли нушази аргъахъиб сунечил барх бургъути – урус виаб, цархIил миллатла виаб – лебилра уржили, узбиван вяшбикIниличила. Дявила къуллукъуни тамандирухIели, гъабзадеш дакIударни багьандан, М.ИштIалбяхIяммаев чумра шабагъатличира лайикьикили сай: Жуковла ва Суворовла умачилти медальтачи, «Минаби уркасни багьандан» бикIуси медаль ва цархIилтира.
МяхIяммадла гъай хIясибли, дявила ибкьти аги-кьяйда ва къияндешуни ахъес багаладирулри, уркIила гьав ахъбурцулри улкала декIар-декIарти мераначирад дашути кумекунани (гуманитарный), илдачил дарх школала бучIантала кагъуртани.
МяхIяммад ва иличил бархти лебилра бургъанти ишхIелла манзилла игитуни саби, чулира чеалкIуси наслулис шаласи челябкьла, кьисмат лукIути. Арали калабая!
С.ГIялиева
