Дусла лерилра манзилти жагати ва тIягIямлати сари, амма наб дебали дигахъуси — хIебла манзил саби. Яни бикили гIергъи, тIабигIят сагабируси манзиллизирти уркIила гьайбатти хIялани дугьбачил аргъахъес къиянни саби. Гьайгьайрагу, илдигъунти тIабигIятла жагадешуни дулъути анцIбукьунира алкIули сари. ХIеб садиухIели, жура-журала мераначир, хаслира вацIурбазир, цIадиркнила шайчирти анцIбукьуни имцIадирули дирар. Илгъуна аги гIебшнилизибра тикрарбирули бирар. ХIебла замана дерубти кьар дигубли, мер-муса сагадарес или цIа абикьуртани, чусра хабарагарли, тIабигIятлис халаси зарал бирули бирар. ЦIа абикьурхIели, иличи хIеруди барес, ва цIилцIилаг хIяжатси мерла дура хIебикахъес хIеруди бирес чебиркур.
ХIера, гьанна бусягIятра нушала регионнизир жура-журала мераначир цIадикили сари ибти хабуртачила нушани бикьулра. «ЦIализибад ва шиннизибад берцуди биахъагу Аллагь» — ибси бурала халкьлизибад нуни имцIали бикьули рирус. ПикридухъахIелли, сегъуналра бехIемцI яра зарал гIяхIси ахIен, амма илди дугьби шямван дархьти сари. Шин чедидухъи, мер-муса кайгIухIели, сегъуна кумек гIеббаахъес вирарагьатIи адамлис, илгъуна тяхIяр саби цIа дикнила шайчибра. ЦIала лами игьубси ургиван хъярхъли тIинтIбирар ва камси заманала бухIнаб халаси мер ясирбурцу. Илдигъунти цIа дишахъес мекелли къиянни бирар.
ХIебла замана адамти багьлабарес или, вацIализи, авлахъуначи, хIеркIла мякьла башули бирар. ЦацабехIтани чула нясдеш илар далтули дирар. ЦархIилтани биалли, ца мерла дучили цIа абилкьули бирар. БиштIаси лами сабину, билшан или пикрибарили, адамти хъули арбякьунти анцIбукьунира чуйнара къаршидикиб. Ил дебали халаси хатIа саби, сенахIенну хабарагарли дягIбухъес асубирар. ДягIли итмаданал лами имцIабиру ва хъярхъли тIинтIбиру. ВацIализи цIадикибхIели, тIабигIятлисцунра ахIи, иларти мицIираглисра халаси зарал бетарули саби. Ил багьандан лерилра баркьудлумачи чекадизес ва мяхIкамдеш бузахъес нушаб хIяжатбиркур. Гьарилли сунела баркьудилис жавабкардеш дихалли, аги къулайли бирар.
ПатIимат Шахова
