БекIахъудилизир цацадехIти масъултачи адамти кьабулли хIебиалра, лехIяхъили буути анцIбукьуни камли ахIен.
Гьариллис гьанбиркули бургар, дила пикрили се барсбирусив, чис ил хIяжатсив или. Амма гьарил илкьяйдали пикрихIейкIули, жамигIятлизир кадиркути дарсдешуназир бутIакьяндеш дирес хIяжатли саби. Хаслира илди вегIла миллатличил, мезличил ва мер-мусаличил дархдасунти диалли. Иш белкIлизир дарган мезличил дархдасунти кIел масъала ахъдуцес дигулра. Ца саби литературала мезлизир кадиркахъути дарсдешуначила, кIиэсил биалли, челукьутазибад бегIлара аргъбаибсили бетаурси – лугъатуни мезаначи дуртIни. Ил масъала нуни гьеч аргъес рирули ахIенра. Адамтала ва миллатла цIакь цадешлизиб саби или нушани бурули дирехIе. ЦацабехIтани биалли, ил цадеш бехъес халаси къайгъи бирули саби. Чула лугъатла мез сари сарил дузути декIарти мез сарливан кадизахъес бигути чебиухIели, гьарил шила адамти илкьяйда бикIес бехIбихьалли, аги сегъуна бетарара или гьанбиркули саби? Лугъатла мез ахIенну, гIярбукIла, къадарла ва хайдакьла мез сари бикIути адамти миллатлизибадра мяхIрумбирулигу. СенахIенну, ца миллатла дирути сари цадехI мез ва лугъатуни. Илди сари лебтасалра аргъес гьамадти, лугIяндарили кадизахъурти литературала мез. Нушачил барх бузути цархIилти миллатунала вакилтачил ихтилатдикIухIели, чедиб гьанбушибси мисалла шайчир васвасъалала илдала чедиули ахIенра. Мисаллис касахIелли, кIарахъала яра лезгибала редакцияби, ила гIяхIладли башути адамтачи, дурадуркIути гьунибаънибачи, газетаби-журналти халкьли жигарчерли гIердурцниличи ва илдала миллатунала халкьла цадешличи карцIидулхъули сари….
ЦацадехIти даргала шимала ва районтала адамтас сен декIарбикес дигути? ЦадехI мезра, ца миллатра биалли – адамтала цIакьра уржибдешра имцIали дираргу. Илдигъунти аги-кьяйдали жагIял нушала мез детхIейхъахъниличира умутбирхьахъули ахIен. Лерилра районтани нушала декIарти мез сари или, литературала мез хIедузахъалли, се даражаличи биркура даргала миллат. Пикридухъеная. Ил суал лехIяхъили, пикрила дураб батес хIейрар.
БелкIла бехIбихьудлизиб гьанбуршуси кIиэсил масъала сабри – литературала мезлизир дарсдешуни кадиркахъниличила. Нушала газетализирра дарсдарес ибти дугьби гьаладихьили лерри. Гьарил дарган адамли илди делчIи, сунела пикри бурес хIяжатли саби. СенахIенну, ил мекелли халати жавабкардешла хIянчи саби. Илгъуна масъала ца яра кIел адамли арзес бирути ахIен. ГIялимтани кадизахъурли ва дахъал дусмазир дузахъути литературала мезлизир дарсдешуни кадиркахънилизир бутIакьяндеш дарни, гьарилла чебла саби.
ПатIимат Шахова
