Чумал бархIи гьалав районна газетала редакциялизи ухIнаухъун Усишала шилизивадси ГIяли-АсхIяб МяхIяммадов. ГIяли-АсхIяб районнизив халаси хIурмат сархибси адам сай. Ил СВО бетурхуси мер-мусаличи кумек бихули вашуси сай. БахъхIиагарли илала гъаэсил архIяличи абиркули саби илгъуна къиянси, жавабласи гьунчибад дураберкIибси.
…«Неофициально о главном» бикIуси сунела передачализиб Даниил Бессоновли бурули вирар, сегъунти къиянти тяхIяр-кьяйда сарил дявила авлахъличир. ГIячихъси саби дургъби гьамадти диэс хIедирни, экспертунани биалли бурули саби гьанналис гьалар диубтачир цIакьти ва урехилати диъниличила дявила хасси балбуц бетурхуси мерличирти анцIбукьуни, сенахIенну илдазир душмантани пайдаладирули сари дегIлара сагати, чус дузахъес гьамадти, нушала бургъантазибад халаси сахъдеш тIалаббирути дявила гIягIниахълуми.
МяхIкамдеш барес багьандан нушала бургъантас хIяжатбиркули саби чузиб гIяхIцад декIдеш лебти секIал палтарличил дарх чегьурли, алавдарили дихес, мурхьти блиндажуни адилтIес, душмантала гьар журала гIямултачи заманаличиб шакбиркес, чус гIяхIдешлис лебси гьарил имкан пайдалабирули, гьалабяхI башес. ГIяли-АсхIябли бурули вирар дявила авлахъличиб бургъантас Россияла халкьла шайзибад бируси кумекличила, СВО-ла бутIакьянчиби гIяхIси гъайличил, чебетаибси хIерудиличил, гьар шайчибадси кумекличил гIеббуцес чула чеблализи бейгIунтала адамдешличила ва ила кумек биахъули башутала гъабзадешличила. Жавабкардеш, мяхIкамдеш, сахъдеш тIалабдируси баркьуди сабил ил – дявила авлахъличиб бургъантас кумек бихули.
ГIяли-АсхIяб дявила балбуц бетурхуси мер-мусаличи виули, илаб се тяхIяр сабил, чихъали лебал чебаили, ихтилатбарили, се гIягIнилил хьархъарбаили чарулхъуси сай. Илис хIейгахъу итабси агиличила дахъал дурес, къантI-къантIли гьанбушили, гIур викIули вирар: «Лябкьян замана, иншаАллагь, чедаибти, дакьибти дурес, дявила анцIбукьуни гьандиркахъес. Гьачамлис нушала гIяхIгъабза бургъанти гIеббуцес гIягIнили саби, илдас кумекбирутасра баркалла багьахъес чебси саби».
Редакциялизи вакIибси бархIира сунени дураберкIибси яргаличилси архIяличила гьанбушили, гIур иб:
— Ну ухIнаухъунсира хIушачи баркаллала дугьби делкIахъес дигули газетализи — СВО-лис чекабизурли кумек гIеббиахъути адамтас. БегI гьалабси яргализиб баркалла багьахъес лайикьли саби районна бекI МяхIяч ГIябдулкаримовлис, суненира цаибти бурхIназибал шимала бургира, СПК-бала, организациябала хIянчизартира жибарили, СВО-лизиб бургъантас, илдала хъалибаргунас кумек гIеббуцес сунела чеблализи бейгIунси.
ГIяли-АсхIябли уми гьандушиб: районна бекIла заместитель, районна хьунул адамтала Советла председатель Эльвира ХIясанхIусейнова, илала заместитель, дявила хасси балбуцлизив ургъули калунси ва ВатIан багьандан гIямру кьурбандарибси Ханпаша ГIябдуллаевла гIямрула гьалмагъ, кIел уршила неш, педагог Зумруд ШяхIбанова, ХIинтIала шила администрацияла бекIла къуллукъуни дузахъуси Зубайдат БяхIмудкьадиева, районна шила хозяйствола управлениела начальник ДаудхIяжи Даудов, МухIела шила администрацияла бекI Ислам Муртазаев.
— Илдани кумекбирули саби арцличил, ванати палтарличил, берк-бержличил, дармунтачил, бургъантас хIяжатти гьар се-секIайчил, — буриб ГIяли-АсхIябли. —Масала, З.БяхIмудкьадиевани кумеклис хIядурдарибти-ургар 700-дехI ванати балала динди лерри, бугIярси замана дегIлара гIягIнити сарри илди.
Эльвира КьурбанисмягIиловнала къайгъиличил районна хьунул адамтала Советла члентани бучибси кумекличилара буриб.
— Дигахъаси илди нуни гьанбушибти хIянчизартала суратунира газетализи кадяхъили, илдас баркаллара багьахъурли, — викIи ГIяли-АсхIяб.
— ХIедра баркалла, узи ГIяли-АсхIяб, нушачи вакIнилис! — ира. — Гьарбизаб хIела гьарил архIя! Аллагьли ара-сагъли, чарухъаби!
…«Гьарил адамла багьа сунени балусила кьадарла бирар», — иб ГIяли-АсхIябли.
Илкьяйда белкIи саби «Дунъялара диннара адабти» ибси уличилси, дахъал дусми гьалаб гIярабла гIилмула гIялим ГIяли-ибн-МухIяммадли белкIунси, МухIяммадла урши МирзахIяжини дарган мезличи шурбатурси жузлизиб.
ВатIайс къияндикибхIели, челябкьлалис урехи акIубхIели, дявила авлахъличиб бургъантала, илдас кумек гIеббурцутала ва ил кумек урехила мерличи биахъутала багьа сецад биэс гIягIнилил чула гъабзадешла баркьудилизибад аргъесли саби. Арали батаб лебилра, чедибдешличил, жяв-жявли хъули чарбухъаб СВО-лизиб бургъутира, паргъатти дуги-хIери садааб илдала гIелабтасра!
ПатIимат Маллаева
