Культура ахъбуцес ва гьалабяхI башахъес багьандан, халаси къайгъиличил пагьмучебти, санигIятлис марти адамти бузули саби.
Ахъушала шилизибси культурала управлениелизиб дахъал дусмазиб бузули, чула гIямру культуралис хасдарибти пагьмучебти адамти леб. Илди саби: Пирдаус ХIяжимяхIяммадова, Кумсият ГIяхIмадова, ЖумягI ГIисаева, Муцалхан КьурбанмяхIяммадов, ЖумягI ГIялиева, ХIяжимурад ва Салимат Мусаадаевхъали, Шамил Гъулатдинский, Зульфия Рабаданова, ХIузаймат Ибрагьимова, ПатIимат Ситуева, «Ахъуша» ансамбльла бутIакьянчиби ва бахъал цархIилтира. Илди культурала хIянчизартани лерилра байрумтас, тарихла бяхIянас багъишладарибти шадлихъуназир бутIакьяндеш дирули дирар.
Республикала кьадрила ва илала дурар детурхути дахъал шадлихъуназир, фестивальтазир, конкурсуназир бутIакьяндеш дирули гьаларти мераначи лайикьбиркули саби. Илди–ургаб леб «ДР-ла культурала урибси хIянчизар» ибси уличи лайикьбикибтира, «Душа Дагестана» бикIуси Премияла лауреатунира, ДР-ла культурала Министерствола, ДР-ла халкьла пагьмуртала Юртла, «Ахъушала район» МО-ла администрацияла шайзибад ХIурматла Грамотабира, Дипломтира, Баркаллала кагъуртира ва гIурра дахъал шабагъатуни касибтира.
Ахъушала шилизиб краеведческий музей абхьили леб ва ил вецIал дусличибра имцIали бузули саби. Музейлис бекIдеш дирули сари Зубалжат Мирзаевани. Сунела хIянчизарти НясихIят ГIисаевачил ва ПатIимат МяхIяммадовачил барх илдани музейлизир лерилра байрумтас, тарихла бяхIянас, районна машгьурти адамтас, ЧебяхIси ВатIа дергъла ва СВО-ла бутIакьянчибас, спортсментас, поэтунас, писательтас, культурала хIянчизартас хасдарибти далдуцуни ахъси даражаличир дурадуркIули сари. Музейлизир дахъал жура-журала выставкаби, дучибти гьаларла ваяхI лер.
Ахъушала шилизибси Центральная библиотекализибра гIяхIти тяхIяр-кьяйдаличил хIянчи дурадуркIу. Библиотекала заведующая Жамиля ГIябдуллаеванира сунела хIянчизартачил дахъал далдуцуни, шадлихъуни, гьарил тарихла бяхIянас, байрумтас, писательтас, поэтунас багъишладарили детурхахъу.
Библиотекабази башути адамтанира илдазир бутIакьяндеш дирули дирар. Лер библиотекабазир СВО-ла бутIакьянчибас хасдарибти стенданира, илдала суратунира, илдачила белкIанира. Далдуцуначир школала бучIантанира жигарла бутIакьяндеш дирули бирар. Илдачил чIумати бархбасуни дузахъу.
Гьаннала гIергъира чула бузерилизир сархибдешуни ва гьарбизуницун дираб.
С.ГIябдуллаева
