МухIела лицейлизиб ишдус 10-ибил класс таманбарибси Индира МяхIяммадовани олимпиадабачир, конкурсуначир гьаларти мерани дурцути сари.
Индира гьарра шайчирад пагьмучерси, лицейла гIямрулизир жигарла бутIакьяндеш дируси рурси сари. Лицейлизибси «Цаибтала хIяракат»-ла, «Дружинабала Совет»-ла председательра сари, волейболла командала капитанра сари. Индирала шахматуначи ва дибгIянти мачначил ваяхI диресра диги леб.
ГIяхIти кьиматуначил ручIуси Индирани 9-ибил классра хIунтIена аттестатличил таманбарибсири.
Индирала дахъал Баркаллала кагъурти, ХIурматла Грамотаби ва Дипломти лер.
Илди-ургаб леб «Дусла ученик – 2024» бикIуси республикала кьадрила конкурсличир бутIакьяндеш дарнилис бедибси Дагъистан Республикала багьудила ва гIилмуртала Министерствола шайзибад касибси Баркаллала кагъар.
Районна багьудила управлениела шайзирад лер дедибти чумал Грамота: экстремизмаличи ва терроризмаличи къаршити плакатунала конкурсла призер ретаъни багьандан, нешла мезла республикала кьадрила школабала бучIанти-ургаб дурабуркIуси олимпиадаличир призер ретаънилис, лебил Россияла кьадрила биологияла олимпиадаличир призер ретаънилис, физкультурала лебил Россияла кьадрила школала бучIанти-ургаб бетурхуси олимпиадаличиб чедибдеш сархнилис, лебил Россияла кьадрила «Готов к труду и обороне» (ГТО) бикIуси ДР-ла багьудила учреждениебала бучIанти-ургаб бетурхуси физкультурно-спортивный комплексла фестивальличиб «ЦархIилтазирад декIаррухънилис мургьила лишан» бикIуси бетуцлизир устадеш чедаахънилис. Илкьяйдали илини декIар-декIарти министерствобала шайзирад касибти шабагъатунира лер.
Ишдуслизиб дураберкIибси «Зарница» бикIуси лебил Россияла кьадрила «Огневая подготовка» абзлизир бутIакьяндеш дарили, хIябъибил мер сархнилис, Индира МяхIяммадова «Ахъушала район» МО-ла администрацияла жагьилтала политикала ва спортла управлениела, илкьяйдали «Цаибтала хIяракат»-ла шайзибад Дипломличи лайикьрикиб.
ДурхIначи дигичерси, лицейлизиб дахъал дусмазиб бузери барибси МяхIяммадова Раисат БяхIяммаевнани гIяхIси бяркъра бедили, гIяхIти кьиматуначил ручIахъес гъирачеррарили, жагали арилкьули сари Индира. Илис сунела неш гIибратли ретаурли рургар, сенахIенну сунечи хъарси хIянчи жавабкардешличил бетурхахъуси пергерти куц-бекIла регI Раисат БяхIяммаевнани вайси секIайчи бурсихIебиру дурхIни.
Гьаннала гIергъира гIямрулизир ва белчIудилизир сархибдешуни ва гьарбизуни имцIадикIаб, пагьмучерси Индирала, илала неш Раисатла ва илдала лебилра дигутала!
Сабият ГIябдуллаева
