Ишди бурхIназиб Бутрила шилизибси Россияла хал­кьа­нала культурала Цент­р­лизиб фольклорла бай­рам­ла Бар­хIи­лис хас­барибси шад­лихъ бе­тер­хур.
Бутрила шили культурала балгунти хIянчизарти гIяхIлас разили гьунибаиб. Балбуцлизир бутIакьяндеш дариб пагьмучебти культурала управлениела хIянчизарти ХIя­жимурад ва Салимат Муса­адаевхъалани, Пирдаус ХIяжимяхIяммадовани, Зульфия Рабадановани, Кумсият ГIяхIмадовани, Зугьра ИсмягIиловани, ЖумягI ГIя­лие­вани, ЖумягI ГIисаевани, БяхIмуд Булатовли, Зубайдат ГIя­лиевани, ХIялимат Ражабовани, ПатIимат ИсмягIиловани, Раисат МяхIям­мадовани ва макьамтачил гIеббурцути хIянчизартани.
Фольклорла байрамличиб чула пагьмурти чедаахъиб, ХIямшимала миллатла дел­хъра дарили, далуйтира делчIи ил шилизибадти исбагьи рурс­би Пирдаус ХIяжимяхIяммадовани, Кум­сият ГIяхI­мадовани, Зугьра Ис­мягIи­ловани, Зульфия Рабадановани ва илдачил рарх Уси­шала шилизирадси ЖумягI ГIисаевани.
Бутрила шилизибти Зубайдат ГIя­лие­вани, ХIялимат Ражабовани халкьла гьалабла заманала ма­кьамли­чилси далайра белчIун, делхъра дариб. Бутрила шилизибси Россияла халкьла гIядатла культурала Центрлизиб ХIя­лимат Ражабовани бурсибиру­ти дурхI­нала делхъла коллективлира жа­гати делхъ дарили, лебилра гIяхIли ра­зи­­ба­риб.
ЖумягI ГIялиеванира пергер халкь­ла макьамличилси далай бел­чIун. Байрамличир гIурра жагати халкьла миллатла далуйти зайдухъахъун, «Шадила» бикIуси гIядатра че­ба­­ахъиб.
Гьалабла замана халкьли дузахъули калунти ва гьанна дирути някъла хIян­чила ваяхIла выставкара гьалабихьиб.
Байрам ахирличи бир­ку­хIели гIяхI­ли жагали балкьаахъурси, бизити берк­лумани ва цIе­дешли бицIибси кьумур-алав жибариб.
Шадлихъличив гъайухъун Бутрила шила бекI ИсмягIилов БяхIяммад ХIя­сай­ниевичра. Илини гIяхIлас баркалла багьахъур чула шилизибси куль­турала Центрлизиб илгъуна мягI­ни­чебси балбуц дураберкIнилис. Лебри шадлихъличи жибарили Бутрила ши­лизибадти СВО-лизиб гъабзадешчебли бургъути уршбала бегIти, адми­нист­рацияла хIянчизарти ва гIурра ба­хъал цархIилтира гIяхIли.
Илдигъунти далдуцунала мягIна саби халкьла миллатла гIядатуни, далуйти, фольклор мяхIкамдарни. Чеа­биу­си наслулизи гьалабла замана халкьли дузахъули калунти гIя­да­ту­на­чила багьахъес, илдачила хъум­хIер­тахъес багьандан.
Байрам гIяхIти-тяхIяр кьяйдаличил бетерхур, сенахIенну ил вайтIа бетхIерахъу Ахъушала районна культурала управлениела пагьмучебти, бархбалгунти, дигичебти, цала цали хIурматбирес, тянишдеш дирес балути, балгундешличил бузути, уржибси хIянчизартала коллективли.
Гьаннала гIергъира чула гIям­ру­ли­зир ва бузерилизир сархибдешуни, гьал­­магъдеш, цабалгундеш им­цIа­ди­кIаб!