ХIела ванаси хIерли
Дунъя шалабирахъу,
ХIела малхIямти гъайли
УркIира шадбирахъу.
ГIямрула гьарил бархIи
ХIед баркалла рикIулра,
Арали хIерриахъес
Аллагьлизи рулгулра.

Гьар дус ноябрь базла бегIлара гIергъиси ал­хIят бархIи нешанала БархIи сабливан ка­бизахъурси саби. Ил бархIи цагьатIи са­бабли бетарули саби адамтас чула нешани мубаракбарес ва илдас баркалла багьахъес. Неш — дунъяличир бегIлара гIя­зизси, ахIерси, малхIямси, дурхIначи уркIи изуси адам сари. ХIязлис ахIенгу биштIати дурхIнанира бегI гьа­лаб «неш» ибси дев буруси. Илцадра биштIаси, хIябал хIярп­лизибад ца­ла­бикибси девли, лерилра гIямрула мягIна бухI­набуцили саби. Чум дус ардякьи хьалли, неш мякьлар лерай – адам виштIали кавлуси сай.
ДурхIни халабаахъес, цаибти дугьби дагьахъес, илди дунъяличил тянишбарес ва гIямрула гьунчи кабизахъес мурталра къайгъилизирси,сунела дурхIя багьандан жан мяхIкамхIедируси хIурулгIян сари неш. Лебилра нешанас чула дурхIначил барх цархIилти биштIатира хIулкIули ва талихIчебли хIербирули дигахъу.
Нешанала уркIила дигила ахир лебси ахIен. Нушани илдачила хъумартес асухIебирар. Лебил дунъя адамличи къаршили кабизалра, неш ца минутлисалра дурхIяличирад гIелумхIерилзан.
Дила пикрили, сецад жагати ва дурхъати дугьби делкIаслира, нуни дила нешличи дигиличила бурес ва уркIила хIялани аргъахъес хIерирус. ГIямру кадерхайчи дузахIелра, нуша илала чеблалиур сарра.
Ил багьандан, нешла уркIи хIебамкьахъурил, мяхIкамли бихIни — гьарилла чебла саби. ХIязлис ахIенгу МяхIяммад Идбаглира (с.гI.в) сунела хIя­дислизиб «Гьалжана — нешанала кьяшмауб саби» или буруси. Илцадра черяхIрирули сари неш ва илала хIур­­матбирахъес буйрухъбирули саби.
Лябкьуси байрамличил му­баракрарес дигулра дила неш ва лебил дунъя­ли­­чибти нешани. ДурхI­нала дигили алав­ду­ци­ли калабая. Арати ва разити гIям­ру дулгулра!

ПатIимат Шахова