«ГъайбикIули саби МяхIячкъала»
Гьалабван нушала библиотекализиб илгъуна уличил “багьахънибала сягIят” дураберкIес имканбакIиб, сабира дагъистанлантала гIямрулизиб радиоли мягIничебси мер бурцнилис, илдала рухIла давлали бетаънилис багъишлабарибси. Илизир жигарла бутIакьяндеш дариб П.Чайковскийла уличилси дурхIнала искусствобала 1-ибил школала бучIантани ва «Домисольки» бикIуси далайла коллективли. Илдас бекIдеш дариб Гульнара Багьавдиновани.
Дагъиста халкьанала гIямрулизи халаси дягIван бухIнаберхурси радиоли илдала гIямруличи сихIрула асар бетаахъурсири. Нушала республикализиб иличи иштяхI акIубсири 1925 ибил дуслизиб. АкIахъубсири «Радиола юлдашунала цалабяхъ». 1924 ибил дуслизибал Нури Хайрулинни радиоприемник балкьаахъурсири. Амма 1927 ибил дусла сентябрьла 1-личиб сабри «Алло! Алло! ЛехIирхъеная! ГъайбикIули савби МяхIячкъала» ибти радиолизирад цаибти тIамри дакьибти. Дубурла шимазирра нешла ахIерти мезличил цаибти диктортала тIамри зайдикIескадииб. Сагаси республика кабилзути дусмазиб радиола кьадри кьиматлабаресра гьамадли ахIен. Адамти клубанази цалабиркутири, гьигьра бархли тIашаили, гьарил буруси гъайличи лехIирхъутири.
ДекIар-декIарти дусмазиб радиолизиб бузутири Дагъиста ва Россияла литературала устни Расул ХIямзатов, Хизгил Авшалумов, Юсуп Хаппалаев, ГIяхIмадхан Абу-Бакар, Аткъай Аджаматов, Рашид Рашидов, Нурадин Юсупов ва цархIилтира. Даградиокомитетла цаибти руководительти сабри ХIямид Темирханов, Вил Путерброт, Дагъиста халкьла поэт Анвар Аджиев ва академик ХIяжи ХIямзатов. ГIяхIцад дусмазир «Дагъистан» гостелерадиокомпаниялис бекIдеш дирули калун Дагъиста халкьла поэт МяхIяммад ХIямидовлира.
Буралли, дила дусмала лебилра зиланти Дагъиста радиоли абикьурти саби, сабира итхIели халкьлизиб дебали машгьурбиубси. АхIерти дарган мезличил радиопередачаби, дигути дикторти Рабазан Нажмудиновла ва Аминат НурбяхIяндовабала тIамри дила ХIурхъила шилизир гьарил юртлизир зайдикIули дири. Наб лерилра гIямрулизиб радиора дебали дигахъуси саби. Дила цаибти гьанбикунира радиоличил, даргала музыкала концертуначил, машгьурти гIяртистуни Аминат Ибрагьимовала, СултIанат Кьурбановала, МяхIяммад Улахъаевла, Камалудин МяхIяммадшапиевла пергер тIамрачил дархдасунти сари. Ну риштIахIелил хьулрикIусири илди дяхI-дяхIли чебаэс, ва гьанна нуни иргъулра, илди чебаэсцунра ахIенну, лебтачилра барх хIянчира барес кьадарбиуб. Дила дурхIядешла хьул бетерхур. Бузерила цаибти бурхIназибал нуни алавчарти адамтала диги ва гIяхIдеш барес гьалакдеш чедаира, илдани наб гьарил секIайчи бурсириахъес кумекра бирусири. Ну гьарли-марли пагьмучебти, багьудичебти, санигIятлис марти адамла дайлар уррухъунра. Илдала шалати сипатуни ва бархкьябачила гьанбикуни дила уркIилизир даимлис кавлан.
Радиолизир ну рузули калунти дусми талихIчерти сарри. Наб мурталра илди бархкьяби ахIертили бирар, ва илдачила сеналра хъумхIертисра, секьяйдали нуша лерилра дарх, разили, савли вахтала автобусличирад кадацIили, кабинетунази гьалактирил, жаняхIлизиб далайбикIути далайчибачил гъудуркадирутирил, бузерила бархIи таманбиубхIели, бархIехъ цаладикили, масхурта дугьутирил. Шалати гьанбикуни кали сари…
Илди гьанбикунала ванадешли ишбархIира, радиолизирад декIаррикибхIейчирад хIябцIали дус ардякьунхIелира, дила рухI ванадирахъули сари.
Дагъиста радиола уржибси коллективли ишбархIира Луиза ГIялихановала бекIдешлиуб сунела санигIятлашалси чебла асилдешличил ихъули саби, вецIну авра мезличил лехIирхъутази заманаличир сагати хабуртачила, дунъяличир кадиркути анцIбукьуначила балахъули.
Салимат ХIяжиева, Р.ХIямзатовла уличилси Миллатла библиотекала хIянчизар