Мая Айгумовнара нура 1980 ибти дусмала бехI­бихьудлизир ДГУ-ла филологияла факультетлизир ца курс ургабли заочно дучIули лертири. ИлхIели сарри нуни ил пергер адам рагьурси. Мая ГIялиева Ахъушала кIиибил урга даражала школализир рузулри —нешла мезла ва литературала дурсри кадирхьули.
Сегъуна мягIна бухIнабурцули «педагогла пагьму» ибти кIел девли? Илгъуна суаллис М.ГIялиевани ишгъуна жаваб гиб: «Педагогла пагьму бехIбирхьуси саби дурхIнала кьисмат игъбарла биахъес вегIлизибад лябкьуси бирниличибад. ДурхIни школализибад дура­булхъухIели, гIяйиб-хатIализи хIебикесли, алавчарти гIямрула тяхIяр-кьяйда ар­гъибтили, адаб-хIяяла дазур­би далутили биахъес чебиркур».
– Илкьяйда биалли, дурхIнас бяркъ бедлугни цаибил мерличиб, багьуди кайсахъни – кIиибил мерличиб бетарули ахIену? – хьар­баира илизи.
– Илди кIел­ра масъала дарх ирзес гIягIнити са­ри. Дурсрачиб буруси саби дар­гала миллатла багьуди ва культура че­ахъ­бу­цибти адам­та­чила. Масала, ВатIан багьандан бургъулира жузи лукIулира хIербиубти Сагид ГIябдуллаев­ли­чила, РажабгIяли ГIямаровличила, даргала лите­ра­турала пахрули сабти ГIяхI­мад­хан Абу-Ба­кар­ли­чила, Рашид Рашидовличила ва цархIилтачила. Илдала пагьмуцун ахIен дурхIнас мисаллис гьалабирхьуси, илдала гIямрула гьуни, адамдешла баркьудлуми, халкьличи, халкьла кьисматличи уркIи изахъес бални — илди къиликъунира сари дурхIнас гIибратли детарути.
Мая Айгумовнани школализир дурадуркIути неш­ла мезла ва литературала дурсрачи гьаман башули саби Ахъушала шила урегалра школализиб бузути учительти. «Гьаргси дарс» дурабуркIухIели башули бирар алавчарти шимала школабазибадти учительтира.
Илини Ахъушала районнизибадти прозализиб ва поэзиялизиб бузути адамтачила баянти, илдала белкIани цаладяхъили, портфолиоби хIядурдирули сари бучIантала кумекличил. Илгъуна баркьудира кумекли бетарули саби бучIантази пикри бяхIчиаахъес нешла мезличи, илди жагали зайдикIниличи, ва дурхIназибра гъира дакIубулхъан нешла мезли се-биалра белкIес. ГIергъити вецIал дусла бухIнаб республикала кьадрила нешла мезла ва литературала олимпиадабачиб Мая Айгумовнани хIядурбарибти бучIантани гьаларти мерани дуциб.
Дебали гIяхIти гъай дурули саби Мая Айгумовначила сунечил барх дахъал дусмазиб бузутани. КъантIли буралли, Ахъушала цаибил школала халаси педагогический коллективлизив илис баркалла хIейкIуси варгес хIейрар.
М.ГIялиевала мурул декIли зягIипвикили, вецIну хIябра дус бурушлав калун. Халаси хIеруди бариб уркIецIила регI хьунуй ГIяличи, баркалла бикIахъули кIелра шила шанти — Ахъушала ва МухIела. Саби МухIела шилизиб акIубли хьалли, ГIялисра Маясра Ахъушаб хIербиэс кьадарбиубсири, ишаб абикьур илдани чула дурхIнира. Халалгъуна урши, ДР-ла Правительствола Председательла Цаибил заместитель ГIялиев Руслан ГIялиевичли кумекбарили, суал арзибти чумра адам къаршибикиб наб. Руслан ГIялиевичла кIелра уршили бусягIят ВатIайс къуллукъбирули саби.
Разирирули сари хала неш Заирала дурхIнанира: кIелра уршили чебяхIси даражала багьуди касиб, рурси Дианани «шула» кьиматуначил школа таманбирули сари. ХIябибла рурси гьачамлис риштIали лерал.
Мая ГIялиевани бучIахъути дурхIнала бегIтира илис баркалла бикIули саби. Илгъуна тяхIярра ириъ яра ишдусцун ахIен, — илгъуна тяхIяр саби сари рузуси лебилра манзиллизиб, авцIали дусличибра имцIали. Ил заманала бухIнаб рахли бургар дус шалгIеббухъунси М.ГIялиевани бучIанти олимпиадаличи хIядурхIебарибси. 2023 ибил дуслизиб Россияла кьадрила олимпиада дураберкIибсири МяхIячкъалализиб. Илизир бутIакьяндеш дарибти Мая ГIялиевала бучIантани гьаларти мерани дуциб.
Нешла мезла учительтала районна ассоциацияла руководитель сарливан, декIар-декIарти конкурсунала жюрилизи карурхули сари ва учительти гIеббуцес, уркIичеббарес къайгъира дакIубирули сари.
— Нешла мезла дурсрачи дурхIназир диги акIахъес багьандан, Мая ГIялиевани дузахъути тяхIурти гIерасахъес или, декIар-декIарти далдуцуни дурадуркIули дирехIе. Гьар мерличиб учительти Мая Айгумовнас халаси хIурматличил, разили гьунибиули, бирар, – буриб багьудила управлениела методкабинетла заведующая ХIусейнова Наида Мухтаровнани.
Педагогла санигIятлизир касибти Баркаллала кагъуртира ХIурматла Грамотабира дахъал сари. Мая Айгумовна 2008-ибил дуслизир «Дусла учитель» конкурслизир гьаларикиб; гIяхIтигъунти багьудила хIянчизартас хасбарибси Президентла Грантличи; РФ-ла «Багьудила хIурматла хIянчизар» ва «Дагъистан Республикала урибси учитель» ибти умачи лайикьрикиб. ДР-ла Халкьла Собраниела Председательла шайзибад Баркаллала кагъарра касиб.
— Дила пахру шабагъатуначи ахIен, дила пахру нуни бучIахъути дурхIначи, илдала багьудила ва бяркъла шайчирти сархибдешуначи саби! — илгъуна пикри бурули рирар уркIи-хIял гIяхIси адам Мая Айгумовнани.
— ХIела шалати дяхI халкьлис мурталра разили калаб, ахIерси Мая Айгумовна!

П. Маллаева