ГIялам халкь се бикIаллира, заманали сунечи хъарси биру, адам шакра хIейкахъили, илала гIямрула бурхIнала сияхI бархIиличи-бархIи мискинбирахъу. ДучIули, дузули гIямру дуркIулра, цацахIели хатIаби дархли кадиркахъес бажардидиркулра.
Бархьси саби, адамла бегIлара къугъати гIямру жагьхIели дирар. Сепайда, ца гьигьла манзиллизирван илди дахъ жявли шалгIердулхъулигу. ХIера, дагванригу нуша — цаклассланти чедирти классуназир дучIути. БелчIудилизи ахъили, цархIил секIал барес мугьлатагарсигъуна манзилри ит, жагьдешла хIяланала асарлиур даимси талихIличи хьулдикIули, гьаладяхI дашуси. Дунъяличир сегъунтилра вайти анцIбукьуни кадикес хIедирутиван, гьарил секIал шаддешла ва умутунала асарлиур ахъси даражаличир чедиуси. КъантIли буралли, илдигъунти манзилтазир адамли гьарил секIал лертиван чедиули уили ахIен, илди вегIлис дигусиван чедиули сай. Ил багьандангу жагьилтани дахъал хатIабира кадиркахъути. Илди хатIабала асарлиур гIямрула бурхIнира талихIагартили урдулхъути. ВиштIахIели яра жагьхIели адамлис гьанбиркули саби гьанналис замана халаси лебал ну хIериэс или. ХатIабира гьардирис, наб дигуси тяхIярли хIерра вирус или. Сепайда, дусмани нуша диргIядургули урдухъунра. ДурхIядешра жагьдешра лямцIван шалгIердатурли, нуша хапли ухънадешла унабурхIличир дагьардирахъулра.
Амма нушала уркIби даимлис жагьли кавлутиван билзулигу нушаб. Нушала пикрумазир деркIибти гIямрулизир кадикибти вайтира гIяхIтира жузла кIапIриван садирхъули, гьаладяхI ганздикIулра. ГIе, нуша тIашкадизахIеллира, замана кьалли тIашкабилзули ахIен.
ХIера, Дахадаевла районна ДугIахъарла урга даражала школализиб дила цакласслантани белчIуди хъараахъурхIейчирадли 44 дус ардякьи сари. Биалра, 44 бархIи ардякьунхIеливан билзулигу. Марли илдицад гIямру деркIилраяв нушани, гьаннала гIергъи зугIлумицуну нашачи хIерти? Юх, илдигъунти пикруми гьарахъдиркахъни гIяхIси саби, уркIби жагьли диалли, нушала дагьрилизибра, гIямрула бетуцлизибра селра бухънахIебиур дикIес хIяжатли саби. Бархьаначи буралли, имцIали жагьдешла шалати бурхIни гьандиркахъес хIяжатбиркур. ХIера, ишдусла августла ахирличир илгъуна пикриличил цаклассланти «Уллучай» бикIуси бамсриихънилис хасбарибси нушачил 10 дус варх учIули калунси ШяхIбан ХIямидовла къугъали балкьаахъурси заведениелизи цаладикира. Гьунибаъниличи бакIес хIебиубти, Уркухъла больницализи кабихьунти М.Агъарабадовличи ва П.ХIясансайниевачи гьардакIили гIергъи балбуц бехIбихьес пикрибарира.
Агь, илдала разибиубдеш чус узби-рузби бетауртала кьукьяличил къаршибикибхIели. Гьайгьай, чумал дус чехIебаибти МяхIяммадра ПатIиматра къаршибикибхIели, нушала уркIбазира разидешла хIялани хьурадиуб. Нушаб кьалли гьанбиркулри илгъуна къугъаси ихтилатлис гIергъи илдала излуми пяхIли детихъур ва илди кIелра нушачил барх «Уллучайлизи» лябкьян или. Амма тухтуртани ил секIал барес къадагъабариб, гьанналис лечение таманбиубли ахIен или.
ХIерибиухIели, Уллучай хIеркIла мякьлабси тIабигIятла лебгIеб жагаси мерличи цалабиркескабииб нушала цаклассланти. Гьаларра чуйнара илар къаршидикибтири нуша. Школализи дашухIелил нушала классла дурхIнани гьарил белчIудила дус таманбиубхIели, шадлихъ дурабуркIусири. Илкьяйдали 10-ибил класс таманаайчи ил гIядат бузахъусири. Нушани пикрибарибсири гIурра нушала школализиб бузахъули калунси гIядат даимбарес. Илкьяйдали чуйнара дубурла ва диркьала мер-мусаличир цаладиркули калунтира нуша гьанналаурра. Сепайда, нушачил барх бучIули калунти АсхIяб Ражабов, ГIумарасагIяб Билалов, МяхIяммад Будунов, ПатIима ГIяхIмадова, ПатIимат ХIусенова, Хадижат БухIуммаева кьисматли даимлис нушачибадли арбукиб. Гьайгьай, илдала шалати сипатуни нушани даимлис хъумхIертехIе…
Нуша дукьяйчи сахаватси кьумур хIядурбарилри галгубала ва вавнала кьадубани алавбуцибси, къугъали балкьаахъурси, гьарзаси, хасси мерличиб. Гьайгьайрагу, цалабикибтала хIурматлис музыкара зайдухъахъун. БикIуливан, азир журала берклуми дихес бехIбихьиб бахъхIи цали ца чехIебаибти зилантала столличи. Илкьяйдали бизити берклумала, зярхIси гьавала, арцантала макьамтала, зайдикIути даргала далуйтала тIягIям кайсули, кьумур-алав кабиибтала къугъаси ихтилат бемжур.
Агь, илгъуна манзиллизиб батбухъи кабиибтала хIулкIути уркIи-хIялла, разити ихтилатунала, шадти масхуртала лебгIеб жагаси балбуц сипатбаресцад дугьби даргес хIейрули, адам инжитирулигу. Гъайличил сипатдарес хIейрути черяхIти бетуцуни лерли дуили сари адамла гIямрулизир. Гьарли-марли, ил бархIи цакласслантала гIямрулизирадли 44 дус хIедиалра, илдала дайхъала урасибтиван билзулри. Яра бархьаначи буралли, школала гIямрула разити гьанбикунала асарлиуб лебилра жагьилкабизуртиванри. Аваданти чурхрази дусмани минадарибти излуми дархли кIундацIибтиванри. Иш палакатси дунъяличир замана-заманаличир илдигъунти шадлихъуни дурадуркIнира хIябилра гIяхIси баркьуди буили саби. Гьарли-марли, гIямрула лерилра зугIлуми агартиван хъумартуррагу ил бархIи.
Нушала цакласслантани 9 хъалибарг акIахъубти сари. Гьайгьай, 70 урши-рурсилизибадли дигай дихьибтира камли ахIенригу. Гьанналаур дигIяндарили калунти уркIила хIялани гьаргдирули, марти дигайличил дархдасунти масхараличил гьандиркахъути баянтани цалабикибтала уркIби тамай шаддиахъуб. Гьайбатти далуйтала макьамтаур къугъати масхурти ва жагьхIелла гьанбикуни чIянкIли делхъла агурбани къябудахъулри. ИлхIели харчбизурли, лебилра булхъес дурабулхъулри. Илгъуна шадибгьунили адамла арадешличира гIяхIла шайчиб асархIебарили кахIевлан. Багьеслири, ил бархIи нушаван талихIчебти адамти бахъал хIебургар или. Илцадра цаличи ца разили, цали буруси итилли гIеббурцули, шакхIедикили бархIи ахирличи бикиб. Сепайда, илхIелира ил къушумла агьлулис декIарбикес дигули ахIенри. Амма хъули чардухъес хIяжатлири. Илкьяйдали школализирадлира гьарил сунела хъули арвашусиригу, гIергъила бархIи кIинайсра ца класслизи цаладикесли. Иш гьакIлисра гIергъисигъуна гьунибаъни мурт ва чинаб дураберкIес хIяжатлил вягIдаладиубли, декIардикес чебуркъуб.
Нефтекумсклизивадли вакIибси Ахъушала районна Букъалли бикIуси шилизивадси Рабазан Рабаданов сайри цакласслантани 44 дус чехIеибси. Ил вакIнилиригу бегIлара цIакьли илди разибиахъубтира. ГIе, ил шадлихълис гIергъи лебилра саби хIербирути мер-мусаличи тIутIукабиуб. Лавашав гIядлу-зегъа далтахъути органтазив узуси ХIусен Исупов, ДугIахъарла шилизиб хIербирути Хамис ГIямарова ва Паризат ХIяжикьурбанова, Кубачир хIеррируси ПайтIма Мирзаханова, «ИнцIа» хъарахълизи урдубяхъибти Шарип МяхIяммадов, Сапият Мусакьадиева, Дербентлизиб хIербиэс кьадарбиубти Мустапа Маликов, Зайнаб Кьурбанова, Хадижат Кьурбанова, Хадижат Кьадиева, ГIябидат МяхIяммадова, СягIид ХIусенов, Мамедкъалализиб хIербирути ГIяйша Залкипова, Маннай Залкипова, МяхIяммадрасул ГIяхIмадов, Избербаш шагьарлизибадти ПатIимат Рабаданова, Сайгибат Жабилова, МяхIячкъалализиб хIербирути Хулата ХIяммаев, ПатIимат Кьурбанова, ПайтIма КьурбанбяхIяммаева, Гулбарият Мухтасарова гьар шайчи гьуни буцили арбякьун.
Гьайгьай, гьамадли ахIенри илгъуна гьайбатси шадлихълис гIергъи паргъатиэс. ЛихIбазир зайдикIутиван билзулри къугъати далай-делхъла макьамти, зилантала шадти тIамри, хIулбала гьалар илдала сипатуни зурхIябла ранганиван рурхIулри. Илдигъунти гьунибаъниби гIямрула вавнази яра цIедешлизи халдарес вирар. Ухънадешличи къаршили дургъути жагьдешла нураначил цугдуцес лайикьлира сари илди. Ил классла дурхIначила цалабяхъибси жузлис «Даимти жагьдеш» ибси у бедни марбирули, илди зиланти илкьяйда ухънадеш гъамхIедирахъути жагьдешли хIулбуркIахъутили, дурхIнала гьарбизуначи хIилнабиркьули, талихIли гIеббуцибтили, гIямрула игъбарли баргили, дунъяличир лерти гIяхIдешуначил пайдалабикIули,… гьайбатли хIербиубли дигулра. ИмцIа-имцIали шадлихъуначи ва мекъ-сяхIбатуначи цалабиркули, анцIкьи-децIра чехIедиули…
Тамара ГIябдусалимова
