«Даргала журналти, газетаби, театр хIярхIли дузули сари» ибти дугьби нуни гьар бархIи иргъулра.
Гьанна мисаллис, цархIилти миллатунала издательствобачи хIеризалли, байхъала дусла духIнар газетаби-журналти къулбасдирнила хIекьлизирти хIянчурби бекIдарили таманкадирули сари. Миллатла театрти башути адамтани гарчли дицIили сари. ГIе, илкьяйдали бетаурсира илди цали ца гIеббурцухIели саби.
«Илди къулбасдарили хьалли, чили дучIутив? Театр хIярам саби, ила башути ахIен …» ва цархIилтира гъай-мез дирар. Къулбасдарибти газетаби-журналти хIушаб сари дигути. ХIушала иткъира хIярхIти, вайтIа далути нешла мез ункъдарес, багьудлуми чедицIахъес, хIушала миллатла сагати хабурти ва литература дучIес багьандан. Театрлизибра селра хIярамси агара. Илар адамла вайти хасиятуни дукелцIиличи душили, илди тикрархIедарахъес хIербикIутази иргъахъули саби.
Театр, миллатла журналти, газетаби, теле-радио передачаби нушала миллатла рухI сари. Илди гIердурцниличибли саби миллатла уржибдеш чебиахъуси.
Чизи-биалра хьарбаасли, анцIбукь сен илкьяйдали бетарусил илдани набзи итмаданал ишгъуна жаваб чарбалтули саби: «СенахIенну илдала хIякимти леб». Нушала-декIар камлив илдигъунти? Нушала хIякимтани сен илгъуна хIебирусив?
Нушани чеабиуси наслулизи миллатла уржибдеш чедаахъес хIяжатли сари. ГIур илданира ил пикри гIеббурцуну.
Ил багьандан дигахъира хIурматла узби-рузби, газетаби-журналти къулбасдирули, миллатла передачаби, илдала лугIилизиб дунъяличиб лебси цайли цаси театрра гIердурцули.
ГIердуцая хIушала миллатла рухI, гIердуцая ва дигахъеная хIушала мез ва литература. Дерхъаб хIушала гIямру.

МяхIяммадшапи Матаев