Дебали гIяхIси ва пергер гIядат бетаурли саби нушала поэтуни-писательтала юбилейтачил дархдасунти далдуцуни дурадуркIни, илдазир школала бучIантази жигарла бутIакьяндеш дирахъни. Сецад дусми ардукьялра нушала литература акIахъубти, ил гьалабяхI башахънилизи белгиси пай кабихьибти писательти ва шягIирти хъумхIертехIе. Илди даим «мицIирли биънилис» бикьридеш дирули сари нушаб гIелар датурти илдала дурхъати белкIанани, произведениебани, назмуртани. Илдазиб нушани ишбархIила гIямрулизирра дархли багаладиэсти насихIятуни, мурхьти пикруми, халаси гIякьлу дургулра. ИлхIели гIямру гIеркъадиуливан кабилзан.
ХIера, илдигъунти адамтазивад ца вирусири ХIурхъила машгьурси шилизив акIубси ГIялиев ХIябиб МикагIиловичра. Даргала поэт, прозаик ва драматург акIубхIейчирад ишдуслизир 85 дус дикили сари. Иличил бархбасахъи, гьалабван Сергокъалала районна бекIлибиубси библиотекализиб даргантас дигеси балбуц бетерхур. Иличир жигарла бутIакьяндеш дариб ХIябиб ГIялиевла хъалибаргли, узи-уршили. Илдани уркIила ванадешличил гьандушиб писательла гIямрулизирадти баянти. Произведениеби хIясибли ахIи, сай нуни хIелули хьалли, илала хъалибаргли дурутачивли ХIябиб ГIялиев бегIлара гъамси адам, лебтачивалра тянишси сайливан кайзур.
Илкьяйдали балбуцличиб лебри писательла шанти, юлдашуни, нешла мезла дурсри кадирхьути мугIяллимти, школабала бучIанти. Илданира бутIакьяндеш дарили, цалабикибтази ХIябиб ГIялиевла творчествобала кьадри-кьимат халаси биъни аргъахъиб. РСФСР-ла ва ДАССР-ла рурибси мугIяллим, писательла шан ва илала пагьму дигахъуси Жаго ЯхIъяевани сунела шалати гьанбикуназив ил сегъуна вирибал аргъахъиб.
ХIурхъила шила бекI ГIисаев Мажид МяхIяммадович
Буралли, набчил барх, ил балбуц гIеббуцес Дагъиста тах шагьарлизибад бакIилри ДГУ-ла профессор, Дагъиста писательтала Союзла даргала секция къелгIеббикуси Муса БяхIяммадов, Дагъиста халкьла поэт Аминат ГIябдулманапова, МяхIячкъала шагьарла Жагьилтала парламентла председатель ГIялигъалбицI ХIусейнов, жамигIятла хIяракатчи Индира ХанбяхIяндова ва гIуррара бахъал цархIилти. Илданира поэт-писательла творчестволичила буриб, илис хасдарибти назмурти делчIун.
Пергер назмурти делчIун ХIурхъила школала бучIантани, илкьяйдали халаси ахIенси сценкара чебаахъиб.
Гьар мурталраван, иш балбуцличирра жигарла бутIакьяндеш дариб ГIямарла Батирайла уличилси Даргала театрла гIяртистунанира. Илдани ХIябиб ГIялиевла пьесализибад бутIа гьалабихьиб.
Балбуц жагабариб даргантас чула тIама дебали дигахъути Пирдауз Камаловала, Салимат Шагьмандаровала, Гьидаят МяхIяммадовала, ХIямид СягIидовла пергер далуйтани. ГьатIира къулайсили бетаур илдани ХI.ГIялиевла дугьбачил далуйти зайдухъахъунхIели.
«Нушала аслу-мина, тарих, культура хIедалусила челябкьлара хIебирар» бикIули бирар. Наб биалли, ила имцIабарес дигахъаси: ил тарихлизир, культурализир, миллатла литературализир мурхьти къел датурти адамтачилара балес гIягIниси саби. Илгъуна сай хIурхъан ХIябиб МикагIиловичра. Гьанна нуша-ургав агарли хьалли, илала дебали давлачебси рухIла хазна кали саби, илхIелира дахъал шалубарси. Ил гьарра шайчивад пагьмучевси адам сайри, ил сабухъчевли узусири дигалли поэзиялизив, дигалли прозализив. Илала пьесаби хIясибли нушала Даргала театрлира спектакльти кадикихьибти сари. Сунела произведениебазиб нушани чебиулра, илис сунела ВатIан, шанти дигахъни, хала бегIтала хIурматбирни. Гьарли-марси патриот виъни марбирули саби илданира.
Сай гIямрулизивад жявли арякьи виалра, ХIябиб ГIялиевли гьарилла уркIилизир ВатIайчи дигира гIяхIдешуни дирниличи гьуцIра хьурадариб. Дунъя шалабарес къайгъназибти адамти биалли, сеналра бубкIути ахIен. Илала произведениеби жагьилтани дучIули лерай, ХIябиб ГIялиевра «мицIирли» кавлан.
Салимат ГIялиева
