ПатIимат Мухтаровна Кьагьирова — Россияла халкьла гIяртиска, культурала хIяракатчи, далуйтала автор сари. Илини дарган мезла, урус мезла ва чечентала мезла далуйти дучIули сари. П.Кьагьирова 2016 ибил дуслизир Дагъиста халкьла гIяртистка ретаурсири, Чечентала Республикала биалли – 2009-ибил дуслизир.
ПатIимат Кьагьирова 1966 ибил дуслизир июньна 8-личир Сергокъалала районна Кичи-ХIямрила шилизир акIубси сари. ПатIимат риштIахIейчирад далайрикIусири, илини школализир детурхути далдуцуначирра жигарла бутIакьяндеш дирутири.
ПатIиматла студентхIелла гIямру Воронежлизир шалгIердухъунтири, сарира МяхIячкъалала культпросветучилище таманбарили гIергъи ила ракIибси. Илар ил Воронежла пачалихъла искусствола институтлизибси «Актер кино и театра» бикIуси специальность хIясибли, театральный факультетлизи карерхур. БелчIудила замана режиссер Рафаэль Гаспарянцевличил ГIяхIмадхан Абу Бакарла «ДигIянти белкIани» бикIуси фильмлизиб роль бузахъули, бутIакьяндеш дариб.
БелчIуди таманбарили гIергъи ПатIимат Дагъистайзи чаррухъун ва сунела творчестволизи ахъиб.
«РиштIахIейчирад ну далайрикIули рираси. Ну далайхIерикIули наб гьанхIебиркур. Дила гьар бархIилати гIямру далуйтачир делшунтири. Ну регIриубси санигIятличира дебали разили сарра. Бархьаначи буралли, дила гIямрулизир къияндешунира, гьархIебизунира камдиубти ахIенри, амма илдани ну гьатIира чIумарирусири ва гьаларяхI рашахъусири. Илди дила санигIятлис диргалахIедухъун. Машгьурси далайчили виэс гьамадси ахIен, биалра, къияндеш агарси хIянчира бируси ахIенгу. Ну румсули риасра, гIямрулизир дила ну бекIриэс, бажардирикес къайгъибирулра. ГIергъиси замана нуни ца секIал хIясиббарилра, нуни музыка цахIнадяхъес рирни, амма иличирли ну композитар сарра или викIес вирхIейрар,» — бурули сари ПатIимат Кьагьировани. Машгьурси адамла гIелаб гъай-мезли бирутира камхIебирар, или биалра, илдачи пикри бяхIчихIейэс кьасбирули сари ПатIиматли. Илини бурни хIясибли, цацахIели илдани буруси багалабиэсира бирар, вайти дурути илини хIисаблизи кайсули ахIен.
ПатIимат Кьагьирова халкьли рала дебали сарерхурси, сунела санигIят дебали дигахъуси хьунул адам кьяйдали. Россиялизив илала далуйти хIедакьибси ва хIедалуси адам хIергар или гьанбиркули саби. ЦархIилти миллатла халкь-ургабра къаршибиркули бирар илала далуйти уркIиличир далутира. Илала тIамаличибли бурес вирар, илис далайрикIахъес ЧевяхIсини бедибси пагьму саби или. Далуйтачилацун бурили асухIебирар, сенахIенну илала дабрила чIумаси кьячIаличилара лебтанилра балуси саби. ПатIимат хIекьли адамла иштяхIдухъесли, сунечир ахъти кьячIубачилти дабри диъни пикрилра хIебарили, кункли делхъла авидлизир рулхъан. Делхълис ПатIимат Кьагьироваван хъярхъси гьачамлис дунъяличив акIубси чилра хIерургар или гьанбиркули саби. Ил къиликъра леб илала, цархIилтазирад сари декIаррулхъахъуси. Илала творчестволи хIерикIусила иштяхI ва гъира алкIахъули сари.
Чесабиуси илала юбилейличил бархбасахъи, илис чIумаси арадеш, бузерилизир сархибдешуни, хъулиб баракат дулгулра. ГIуррара бургьаб сунела пагьму!
Анжела Мутазова
