Илкьяйда бикIар хIурхъанти далай биаб, назму биаб бучIухIели, лехIяхъес, творчествола мурхьси мягIнализи бухIнабухъес хIебалутас. Сепайда, илдигъунтира нуша-ургаб камли ахIен.
Сен ну илкьяйдали рикIулра? СенахIенну театрлизиб гьалабихьибси спектакльличи хIерэс яра концерт чебаэс рякьунхIели, лехIирхъес хIебалути адамти зумали къаршибиркухIели. Дахъалгъунти анцIбукьуназиб саби лехIхIебизнила дурабад илди цархIилтасра бекIмахбулхъули бирар, жибинтала вязла тIамаличи мешубикахъили, саби-ургаб ихтилатлизи ахъили, алавчарли кабиибтас диргалабулхъан. Ихтилатбарес дигули биалли, се барес спектакльличи бакIибтилра хIебалас. Заллизибад дурабухъи, жаняхIлизиб яра гьаргалаб чула ихтилат дурахIебуркIули.
Сунела бунагь-хатIа уркадуц, нушала гьалавра редактор Юсупов ГъазимяхIяммад ЖабрагIилович мурталра викIусири: «Нушала халкьли театрла мягIна иргъули ахIен: лехIирхъули ахIен». ГIе, ишбархIира илала дугьби хIекьли марти диъни бархIиличи-бархIи якьинбирули саби. Илдигъунти хIял-тIабигIят культураличил дархдасунтил-ахIенал аргъахъес нуни хIерирус, амма дебали цIахли бирар илдигъунти баркьудлуми дурадуркIалли. Театрла хIянчизартани мекелли халаси хIянчи барили, акIахъубси пагьмулашал бикьурси сабухъ гьалабирхьухIели, илдала дурутачи, назмуртачи, далуйтачи лехIхIейзни, бузери кьиматлахIебирнилизи халбирулра нуни. Концертуначи, театртачи вашули гIергъи, илар гьар секIал чедаэс ва дакьес хIяжатси саби.
Дигахъаси нушала халкьли ишарти дугьбала мягIна аргъили, культурала хIянчизартала бузерила цIакьанира лайикьси даражаличир чедаили, гьар зайбулхъуси далайличи, назмуличи гIягIниси тяхIярли лехIбилзули. ИлхIелицун илдани иргъу произведениела бекIлибиубси мурадра.
Салимат ГIялиева
