Ишди бурхIназиб «Ангелы победы.СВО: дагестанцы — Герои России» бикIуси жуз дурабухъун. Илизиб чула гьунартачил Россияла Игитла уличи лайикьбикибти дагъистанлантани декIарси мер бурцули саби.
Ил жуз «Дагестанская правда» газетала редакцияли «Дагъистан» бикIуси Издательский Юртличил барх ЧебяхIси Чедибдеш сархибхIейчирад 80 дус диркнилис хасбарили, дураибси саби. Жузличил тянишбирнила балбуцличир алхунти бургъантала нешанани ва хьунрани, ДР-ла печатьла ва багьахънибала Агентствола руководительла заместительли, «Дагъистан» этномедиахолдингла, «Дагъистан» Издательский Юртла, илкьяйдали «Дагъистан» РГВК-ла руководительтани, журналистунани бутIакьяндеш дариб.
Жуз дураибси саби ВатIа хъархIерагардеш балтахъули, СВО-лизиб гъабзадешличил бургъути ва гIяхIгъабзала бебкIали алхунти дагъистанлантачила хъумхIертахъес, жагьси наслулизир ВатIайчи диги адикьес, СВО-ла бутIакьянчиби ва илдала гьунарти дурхIнас гIибратли диахъес ибси мурадличил.
Алхунти игитунала нешанани ВатIайс къуллукъличи кабизуртас хасбарибси жуз дураибтас баркалла багьахъур.
ПатIимат Мирзаева
