Дила пикрили, ишаб пикри бяхIчихIеэс хIейрар ДР-ла Халкьла Собраниела депутат Узлипат ХIясановани сессияличир миллатла мезанала масъулти ахъдуцниличи. Илини РГВК-ла дарган мезличил дурабулхъуси передача бирес адам агниличила гьанбушибсири.
Илала цIумъала нуни ункъли иргъулра. Наб дигахъис РГВК-ла ва ГТРК-ла каналтачир миллатла мезаначил дурадулхъути лерилра передачабачи хIеррикIес. Дебали гIяхIдилзан СВО-ла игитуначил, илдала хъалибаргуначил тянишбирули, ВатIайчи диги адилкьули далкьаахъурти передачаби.
Нуни белкIес пикрибарилра дявила хасси балбуц бехIбихьибхIелил илала анцIбукьуначила даим пикри­бикIути, бургъантас кумекбирути адамтачила. Лебталалра уми делкIес, ца бяхIра хIебиур, амма ну чучил гъамли тяништала уми ишар гьандуршис: Перзият БяхIяндова, СултIанум Амирова, ГIяйшат Бибалаева, Алёна ГIябдуллаева, Зульфия Ильясова, Узлипат ХIясанова, Кумсият Мирзаева, Гулизар Мурадханова, ГIяйшат ГIябдулгIязизова… нушала асил дубурлан хьунул адамти! Илдазирад гьарилличила декIарли передача барес вирар. Илди нушала тарихлизи каберхурли саби, ВатIайчи диги чедиахъули, мягIничебси баркьудилизи белгиси пай кабирхьули.
ИмцIаливан бурес дигулра ГIяйшат Кьурбановна Бибалаевала хъалибаргличила, хаслира нешличила ва рурсиличила гьанбушили. Гьарли-марли, неш ГIяйшат Кьурбановна ва рурси Алёна МяхIяммадовна ца дякькад барх ганзбикIули саби. Ца хIеррирули сари МяхIячкъалализир, итил – Дахадаевла районна Трисанчила шилизир. ГIяйшат Кьурбановна МяхIячкъалала дурхIнас хасбарибси 2-ибил поликлиникала юрист-консультант, бекIлириубси медсестра, журналист, писатель, поэт, жамигIятла хIяракатчи сари. Алёна МяхIяммадовна – Дахадаевла районна Трисанчила урга даражала школала директор, жамигIятла хIяракатчи. Илини СВО бехIбихьибти цаибти бурхIназибал Дахадаевла районнизибадти бургъантас кумек гIеббиахънилизир бутIакьяндеш дирули сари. Илди кIелра — нешра рурсира — нушала бургъути уршбачила даим пикрумазиб саби.
«Дила хъалибарг халкьла ил цаси децIла шайчиб калес хIебирар. Дергъла декIдешуначила, Донецкла, Луганскла, Донбассла, Херсонна, Запорожьела халкь балтахъули, гIямру кьурбандарибтачила кьакьахIейкIес сеналра хIейрар», — бурули сари ГI.Бибалаевани.
Нешла пикруми даимдирули, Алёна ГIябдуллаева рикIар: «Районнизиб бургъантас кумек гIеббиахънила хIянчи къелгIеббикулра. Нушала уршби итаб дяргIибти хандакьуназиб биъниличила гьанбикалли, уркIи децIлизи биркули саби. Нушала фондла хIянчилизи ахъасли, циила гьамаддеш алкIуливан кабилзан. Дигесли саби, бархIиличи-бархIи ил гIяхIбаркьла хIяракатлизир бутIакьяндеш дарес дигутала лугIи имцIабикIни».
Алёна МяхIяммадовнани багьахъурливан, кумек жура-журала бирар, имкантачи ва адамла иштяхIличи хIеръили. Бахъалгъунтас чули кумекбирниличила багьахъесра дигули ахIен. «Балуй някъли се бедлугулил, алгъай някъли багьес хIяжатси ахIен», — бикIули бирар.
БегI гьалаб районнизибад кумек бархьибсири Донецкла ва Луганскла адамтас. КIинайс Алёна ГIяб­дул­лаевас имканбакIиб ца миллион къуруш цахI­на­дяхъес, сарира республикала «Нуша лерилра дарх» бикIуси фондлизи духибти, гIягIнити секIал асахъес багьандан. КIинайс фондли сурсатуни дяхIчииэс бехIбихьиб алхунти бургъантала хъалибаргунас цазаманализир арц дедлугнилис, дявила гьалар-гьаларти къяяназибти бургъантас кумекбирнилис ва алхунтачила гьанбикуни даимлис кавлахънилис – ил хIянчи гьаннара бетурхули саби.

2024 ибил дусла апрельличир Алёна МяхIям­ма­довна кьукьяличил СВО бетурхуси мер-мусаличи рякьунсири, жура-журала продуктунира, ил лугIилизиб – берубси диъра, дарх духили. Ил дусла ноябрьличибра архIя дураберкIибсири. Дахадаевла районна меценатунани Балгъуев Карим Расуловичли ва Ибрагьимов Рабазан ГIусмановичли СВО-ла бутIакьянчибас, илдала тилади хIясибли, 1 миллион 200 азир къурушла дармунти асибтири. Илди, ванати палтар, убуш-чебуш даахъибтири гечдирути госпитальтази.
«Нушала уршби итаб тебай дила пикруми цар­хIилти баркьудлумачи дяхIчиаэс хIерирус. Севан саби илди? Се бухес гIягIниси? БекIлизир илдигъунти пикруми жургъдикIар. Рурсби набчи кьакьабикIули бирар, хIечила пикририкIенгу неш, или бикIар. Неш биалли — набчил рарх сари. Илини гьачамалра архIяличи дурамарулхъад хIеиб, илини дила лерилра баркьудлуми ва пикруми гIердурцули сари», — рикIар ил.
ГIяйшат Кьурбановнани илала уркIи иргъули саби, сегъунтилра дугьби хIедурилира, ва рурсили гIяхIбаркьла кумек цалабирхъухIели, мурталра бегI гьалар илра музарулхъан.
Алёна МяхIяммадовнала жи итмаданал иргъу илала бучIантани, мугIяллимтани ва Дахадаевла районна адамтани. Ил рирхули сари чула кумек асилти някъбази ва гьарил ургъанничи биъниличи. Саби СВО-ла бутIакьянчибира илис «нуша уцахъуси» бикIули бирар, мурталра иличи хIерли бирар.
2024 ибил дусла декабрьла ахирличиб Дахадаевла районна вакилти гьатIира дявила хасси балбуц бетурхуси мерличи бякьун, бургъантас нуси, гIяш, диъ ва дахъал цархIилти продуктуни, илкьяйдали чакма, кьапIни, бусахъес хасдарибти гавлагуни ва цархIилти секIал духили. Гьар архIяла гIергъи, школала бу­чIантачил, шантачил къарши­рир­ку­хIели, Алёна МяхIям­мадовнани нушала бургъантачила, илдала гьала тIашти мурадуначила чебетаахъили бурули рирар.
Дила пикрили, Трисанчила урга даражала школалис директорличил гьарбизурли саби. Илаб ВатIайчи диги адилкьнила шайчибси бяркъла хIянчи ахъси даражаличиб тIашбатурли саби. Ил марбиуб ну 2018 ибил дуслизир ила рякьунхIелира. Алёна Мя­хIям­ма­довна 2017 ибил дусличирад сари школала директорли рузес рехIрихьибси. 2018 ибил дуслизиб биалли, илала сипта хIясибли, музей абхьибсири. Камси заманала рухIнар ил, бучIантачил рарх, 500 экспонат дучес бажардирикиб. Сунела ва гъамтала кумекличил школала азбар-гIяя къулайдариб. Гьарли-марли, Алёна МяхIяммадовнала жамигIятла гIяхIбаркьла хIянчи дирес цIакьани кадурхули ахIен.
Тяп илгъуна сари нешра. ГIяйшат Бибалаевани даим нушала бургъантас кумекбируси саби, ил цархIилван вяшрикIесра хIерирар. Иличила буриб «1999 ибил дусла «Интербригада» халкьла ополчение» ДРОО-ла командир МутIалим МутIалимовли: «Нушани яргаличилси кумек цалабирхъухIели, ГIяйшат Кьурбановнани халаси пай кабирхьули рирар».
Нушанира балуливан, суненицунра ахIи, поликлиникала хIянчизартанира, илала гъамтанира, юлдашунанира гIяхIбаркьла баркьудилизир жигарла бутIакьяндеш дирути сари.
Чедибдешра сархили, жяв-жявли нушала бургъанти чула ахIерти хъалибаргуначи чарбухъаб, дунъяличиб даршудешра тIинтIбиаб!

ПатIимат Тазаева