Илди дугIла жанивартачи шурбухъунти дурхIни лебси вагоннизирра къарширикира. Илдачил барх учительти лебли биалрира, илдани вагон баргаэстигъунти чIярла тIамри тIашиули ахIенри. Электричка гьайхIебиубли лебай илдани чучил бархти гьункьябала бурги изесдяхIяхъилри. Бахъалгъунтани илдази тиладибариб гIяшли гъайбикIахъес ва абдултиван тIамалихIебиркьахъес, сепайда гьачамличир-гьачам илдала тIама-гьама ахъдикIулри. БиштIати бархли илдала тIамрани бисескайулри. Бахъ ахъли чIярбикIес дигули, илди скамейкабачибадли харчбилзули, цалис ца ургабулхъули тIамалибиркьулри. ЦацахIели дукелцIилизи гIелабикили, пассажирти сагъ-саламатли бачабирхахъулри.

Илдас ва илдигъунти цархIилти школала гIямрула дурхIнас бегIтани ва учительтани бекIлил бяркъ бедлугусигъуна ахIен. Багьудичебти дурхIнанира илкьяйдали мехIуртиван адамтала ургаб лайикьагарси даражализиб саби чехIебиахъу. Илди халакабаибхIели, цархIилти чучи бяркъес хъарбикалли, сегъуна базар биэсара или пикрирухъунра ну. Чина дикибти вара адаб-хIяя? Се даражаличи бикесара нушала миллатла вакилти? Чина хIер­бикIутира илдала бегIти ва учительти? Илцад хIяялизибадли бухъи, жамигIятла мер-мусаличиб чула гIелакабухъундеш чедииахъалли, илдачи хIербикIути биштIатани чи­зибадли гIякьлу-дагьрила мисал касесара?

Кондукторлизи адамти тилади­би­кIес­кабииб илди паргъатбиахъес багьандан.

— Избербашлизиб илди кабицIути сабину гьигьбатес дирудая, — викIар ил пиширхъули.
Амма Избербашлизибра илдала «балагь» чебхIебикиб пассажиртачибадли.

Сабурлизибадли бухъунти илди гьачам тила­дибикIули, гьачам гIяйибтабиркьули, учи­тельтачира дурхIначира гъамбирули хьалли, чилилра илди паргъатбиахъес им­кан­хIебакIиб.

— ДурхIни вявбирес нушазиб ихтияр агара, —рикIулри ца учительница, — ил ба­гьандан нушани бучIахъути дурхIнани нуша селизилра дирули ахIенра…

ПатIимат Кьурбанова