Гьалмагъдеш… Илинигу адамла гIямру мягIничертили детарахъути, разидешли дирцIахъути. Гьалмагъдеш адамла гIямрула имтихIянтани рамчбикIуси урхьулизиб бархьси гьуни чебиахъуси компасгъуна бетарули саби. Гьалмагъдешли нуша бирхаудичертили детарахъулра, сегъуна-дигара анцIбукьлизир гьарли-марти гьалмагъунани гIердурцниличила иргъахъули.
Гьарли-марси гьалмагъ агарси адамла гIямру дацIти ва цунти дирар. Цала дигIяндеш итилли балуси, ил чизилра гьаргхIебарили, вегIлизиб бихIуси, гIяйибти чехIедуршуси, вирусигъуна кумекбарес гьалакси адам сай гьалмагъ. Гьарли-марти гьалмагъуни цала цала сархибдешуначи уркIи-уркIилабадли разибирар.
Адамла бархбасуназиб игьдибарли халаси мер бурцуси саби. ХIера, илдала лугIилизиб саби гьалмагъдешра. Игьдибар агарли гIергъи сегъунтилра бархбасуни дахъхIи дуути ахIен. Адамли итмаданал цархIилличи игьдибар бихьес вируси ахIен, сенахIенну ил заманала хIясил саби. Заманали чебиахъу чичи игьдибар бихьес вирарал, чичил гьалмагъдеш дузахъес гIягIнитил. Ил багьла-багьлали лушуси ва бархьси биъни марбируси секIал саби.
Илкьяйдали мардешра гьалмагъдешлизиб бегIлара мягIничебсили бетарули саби. Аги-кьяйдаличи ва шуртIрачи хIерхIеили, гьарли-марси гьалмагъли сай марси виъни чебиахъу. Гьарил адамла гIямрулизир арцурли вашути ва увяхIикибти бурхIни дирути сари. Къиянти замунтазив марси юлдаш хIечи къакъгьавли кахIелзан ва цундешлизив хIелтари. Илини гьалмагъдеш ахъли кьиматладирнила лишан саби ил. ХIера, марти гьалмагъдешлис гIячихъси мисалли бетарули саби Украинализиб бетурхуси Россияла дявила хасси балбуц. Илар бутIакьяндеш дирутазирад иргъулра гьарли-марти гьалмагъдешличила хабурти. Хаслира илдигъунти анцIбукьуназир сари адамтани гьалмагъдеш дакIудирути. БикIули бираргу «къияндикибил мерличив валуси сай юлдаш сегъуна саял» или. Гьарли-марти юлдашуначил къияндешунира ихъес гьамадли бирар. Цализибад ца декIарли биалра, телефонна кумекличил бархбас кабизахъурли, гIяхIси дев бурили, насихIят гIеббурили юлдашуни уркIичеббарес вируси сай. Гьарли-марти гьалмагъдеш гьундурала гьарахъдешли я заманала бухъяндешли дулъути ахIен.
ВегIлис гIяхIдешлигIив хIемцIули, гьар секIайзив гьалмагъ гIевурцалли, илхIели сари гьалмагъдеш дебадикIути. Гьалмагъдеш дузахъес бални адамла гIямрулизиб халаси игъбар саби. Амма, цацабехIти адамтани илди дузахъесра балули ахIен. Гьалмагъуни сарра бикIули хьалли, чус се-биалра хIяжатбикалли, багьарбирути, хIяжатдеш ахъибхIели, беткайхъутира леб. Илдигъунтала хIял багьурхIели, тяйдили балтес чебиркур, адамтачи бирхауди бетхIехъахъес багьандан.
Эгер лебтанилра гьалмагъдеш дузахъес балуси биалри, дунъяличир жалти-дявти хIедири, цаличил ца балги, даршули хIербири или гьанбиркур. Сепайда, иличила иргъути камли саби…
ПатIимат Мирзаева
