Лавашала районна бекI Мухтар Халал­мя­хIям­мадов Къуппала шилизив хIерируси ГIяхIмад Вагьабовличи гIяхIладли гьаввакIиб. Ишдус хIурматла ГIяхIмад Вагьабович 100 дус вируси сай.
М.ХалалмяхIяммадовли гьести гIямрула адам чесабиуси мягIничебси бархIиличил мубараквариб ва хъумхIертеси савгъат пешкешбариб. Илдани уркIи гьаргси, ванаси ихтилат дураберкIиб. Ветеран ГIяхIмад Вагьабовичли дергъла дусмачила хабурти дуриб, районна гIямруличила хьархъардяхъиб.
Мухтар ХалалмяхIяммадовли ГIяхIмад Вагьабовлис чIумаси арадеш, уркIила ахъси гьав, бекIла чедиб умуси зак далгун, гьар бархIи гъамтала дигили алавуцили, гIямру дуркIули дигни багьахъур.
ГIяхIмад Вагьабович тамашаласи кьисматла адам сай. ГIяхIцад дусми деркIили хьалли, уркIи хIебамкьахъурли, гIячихъти гIякьлу-дагьриличил хIеркайрули сай. Сунечи башути гIяхIлас дяхI шалали гьунивиур ва къугъати гIяхIялдеш дарес гьалакли вирар. Масхара-мар бурили гIяхIлала уркIила гьав ахъбирахъу. Тылла зяхIматчи ва бузерила ветеран ГIяхIмад Вагьабович жан ахIерахIедарили бургъути, чедибдеш сархибти ва палакатбиубси улка кьяшмачи тIашбатурси наслулизивадси сай.
ХIурматла ГIяхIмад Вагьабовичли верхIел дурхIя абикьур. ИшбархIи ил дурхIнала дигили ва къайгънани алавуцили сай.
Лавашала районна администрацияла пресс-служба