БиштIатас бяркъ бедлугнила шайчирти масъулти нушани гьар замана ахъдурцулра. Гьаннала манзилла бегIтас дигули саби школализибти мугIяллимтачицун ил жавабкардеш чебихьес. Амма лебтанилра балуси саби класслизибти 25-30 дурхIялис бяркъ бедес севан къиянсил, хаслира бегIтала ил шайчибси кумек хIебиалли.
Школализи бархьес гьалаб дурхIнала унхърази башули лебалли ва гьатIира жявли, гьарилти бегIтачиб чебси саби биштIати бяркъличи бушес. Вайси-гIяхIси се сабил багьахъес, асухIебируси ва балтуси аргъахъес, гIяхIсиличи жибирес, цархIилти адамтачи диги адилкьес… ва иш къяй гIуррара даимбарес вирар.
ИмцIаливан ишбархIила уршби ва рурсби чус саби баибтили халабиули саби, алавчартачи гьими-кьясли бицIибтили ва жявли гIясибирутили. Илдигъунти хасиятуни адамтала тIабигIятлизир гьарилтала лерти сари, амма илди алавчартас чедиахъес гIягIнидеш агара. Ну школализир рузухIелира дила бучIантази мурталра махрикIусири: «ХIушани хIушала гIяхIти шалуби ва къиликъуни чедаахъая, вайти чемайахъидаяну». СенахIенну лебилра адамти пергертили ва чихъси даражала бегIтили биэс хIебирни якьинси саби. Амма сабигъунти цархIилти адамтас гIяхIдеш бирес, къияндикибхIели кумекла някъ гьабалтес, гIяхIси дев бурес хIебиралли, алавчартас диргалахIебулхъесалра гьарилтачиб чебси саби. ХIязлис ахIенгу дурхъаси хIядислизиб буруси, адамли бурибси гIяхIси девра, пишбяхъра садакьализи халбируси саби или.
Бяркъличила бурухIели, нуни ишаб гьанбушес дигусири машинаби дашути гьундури дайдяхъили башути дурхIначила. Ца анцIбукьличила бурисра. Гьачам маршруткаличи кариили аркьули лерли, шоферли хапли тормозличи гъяжбариб, маршруткала дайлаб тIашти лебил халкь булан кабикиб. Лебилра уркIбухъун, шоферли машина чегахъили вара, яра чичи-биалра хъячIбикахъили вара или. Илди ахъбиубли хьархъардяхъибхIели якьинбиуб, асухIебируси мерличиб гьуни байбяхъили дуцIли аркьуси урши уили сай ва иличи машина хъячIхIеэс багьандан, шоферли хапли тормозличи гъяжбарес чебуркъуб. Ца талихI ил машинала хIулрумау хIейкили ва цархIилти машинабачи чехIегили верцни! Маршруткала бухIнабтира дяхъи-хъаслизи хIебикни ца гIяхIдеш. АнцIбукь бекIлил ургIебсили биэсра асубирусиригу.
Гьайгьайрагу, школабазиб бучIантази гьунчив секьяйда ветахъиркусил буруси саби. Сеналра бегIтанира ил шайчиб даим иргъахънила хIянчи дурабуркIес чебиркур. СенахIенну бегIтачиб халаси жавабкардеш лебси саби чула дурхIнала гьалаб. Илди ЧевяхIсини нушачи аманатбарибти саби, ва вегIла дурхIнас гIяхIси бяркъ бедес бегIтачиб бегIлара гьалаб чебси саби.
Наида Гъуруева
