Ставропольла крайлизиб бахъал хIурматла адамти дагъистанланти хIербирули саби. Илдазибадти имцIатигъунти, ну хатIавиркули виэсра асубирар, дарганти биэс викIулра. ХIера, ца илгъуна даргайчила саби дила иш макьалара.
Бурасли, нуни ил хIурматла адамличила гьалабра белкIунси саби. «Бузерила зяхIматчи» бикIусири ит дила макьалалис. Гьарли–марси бузерила зяхIматчи сай дила макьалала игит, хIябалра даражала Бузерила Асилдешла орден дихан (полный кавалер ордена Трудовой Славы) Сулайбан БяхIяндович МуртузагIялиев. Ставропольла крайлизив илгъуна ахъси даражала бузерила гьавкья ил цацун сай левси.
Бузерила Асилдешла орден кабизахъурсири 1974 ибил дусла январьличиб. 1991 ибил дусла декабрьличиб иличил бузерила гьабкьяби шабагъатлабирни тIашаибсири. 17 дусла бухIнаб нушала улкализиб Бузерила Асилдешла хIябалра даражала ордентачил шабагъатлабарибти 983 адамцун сабри. Орден бедлугусири гьавкья хIянчизарлис чIянкIли суненицун бузерилизир диахъубти сархибдешуни багьандан.
Сулайбан МуртузагIялиев 1935 ибил дуслизив Дагъиста АССР-ла МикIхIила шилизив акIубси сай. Сулайбан БяхIяндовичли, 12 дус виубхIели, сунечи хъардикибти букIунна хIянчи, сай 69 дус виубхIели, дархьдатуртири. Ставропольла крайла Туркменский районна «Красный Маныч» совхозла хала букIун Сулайбан МуртузагIялиевли 15–личирра имцIали пачалихъла шабагъат сархибти сари. Илдала ургар «Бузерила асилдеш багьандан» ва «Ставропольла крайла гьаларти сархибдешуни багьандан» медальтира, СССР-ла ВДНХ-ла дипломтира, СССР-ла шила хозяйствола министрла, Ставропольла крайла ва Туркменский районна грамотабира лерти сари. Гьайгьайрагу, илис бедибси бегIлара халаси шабагъат саби хIябалра даражала Бузерила Асилдешла орден.
1975 ибил дуслизир маза адилкьнилизир совхозлизир гьалар хIедиубти ахъти сархибдешуни чедаахъни багьандан, Сулайбан МуртузагIялиевлис хIябъибил даражала Бузерила Асилдешла орден бедибсири.
1982 ибил дуслизиб Ставропольла край дегъбиубли, лерилра дегIнуби дерубли деткахъибтири. Или биалра, мазала хала букIун Сулайбан МуртузагIялиевлис имканбакIиб сунела маза, гашазирад хIедебкIахъили, хIердарес. ИлхIели ил лайикьикиб кIиибил даражала Бузерила Асилдешла орденничи.
1990 ибил дуслизиб Сулайбан МуртузагIялиевлис цаибил даражала Бузерила Асилдешла орденра бедибсири.
Сулайбан БяхIяндович Ставропольла крайлизив халаси хIурматла адам сай. Ил халаси уржибси хъалибаргла бекIра сай. Илини 9 урши-рурси абикьур. Илдала 31 дурхIяра 43 дурхIяла дурхIяра леб.
Ставропольла крайла Туркменский районнизир, Сулайбан МуртузагIялиев акIубси бархIилис хасдарили, гьар дус регионти-ургарти футболла ветерантала абзани дурадуркIутири. Сулайбан МуртузагIялиев 88 дус виубхIели, дурадеркIибти абзаначила нуни кIел дус гьалаб нушала газетализи макьалара белкIунсири.
Ишди бурхIназиб илала гIямрулизиб цагьатIи хъумхIертеси анцIбукь кабикили саби. Ставропольла крайла Туркменский районнизибси Сулайбан БяхIяндович хIерируси Красный Маныч шилизир майла 31-личир дахъал журала спортла хIязани дурадеркIиб. Ил балбуц дураберкIибсири хIябалра даражала Бузерила Асилдешла орденти дихан Сулайбан МуртузагIялиев 90 дус виънилис хасбарили. Ил балбуцлис «Гьалмагъдешла кубок» («Кубок Дружбы») бикIусири.
Хабарла бузерила зяхIматчи акIубси бархIиличил мубаракварес дурабад бахъал адамти бакIиб. Илдала лугIилизиб Ставропольла крайла Думала председательла цаибил заместитель Виктор Гончаров, Ставропольла Думала шила хозяйствола ва ванза бузахънила суалти ирзуси комитетла председатель Игорь Андрющенко, РФ-ла Федеральное Собраниела депутат Алексей Лавриенко, Туркменский официальный округла бекI Геннадий Ефимов, Ставропольла крайлизивси ДР-ла вакил ГIябдула ГIямаров, Ставропольла крайла губернаторла вакил Андрей Соколов, Ставропольла крайла шила хозяйствола министр Сергей Измалков, меценат Ризван Салгиреев, Петровский шагьарла округла депутат Умалат Ражабов, спортла мастер Ибрагьим МяхIяммадов ва бахъал цархIилтира.
Илар декIар-декIарти спортла хIязани дурадеркIиб: футбол жагьилтас ва ветерантас, някъ кабиркахънила, гираби ахъдурцнила ва гьарахъли иргьнила, дартс, гьая зузбирнила.
ДарадеркIиб анцIбукьни чераркути хIязанира: бадминтон, аквагрим, америкала футболла устадешла дарс, корнхол, шопперти суратдирни.
Лебилра гIяхIлани хъалибаргуначил ва юлдашуначил разили замана беркIиб ва спортла хIязаназир жигарла бутIакьяндеш дариб.
Ит бархIи Красный Маныч шилизи балбуцличи дакIили лерри 12 футболла команда, 6 гьая зузбирнила… — лерилра 20-личирра имцIали команда. Чедибдешуни сархибти кубокуначил ва медальтачил шабагъатлабариб.
Сулайбан МуртазагIялиевла 15 шабагъатличи имцIабиуб цагьатIи шабагъат – ит бархIи машгьурси бузерила гьавкья Ставропольла крайла шила хозяйствола кьялубала цахIнабикла хIурматла хIянчизарла у бедниличилра мубараквариб.
«Замана» газетала хIянчизартани урибси бузерила гьавкья, микIхIен Сулайбан БяхIяндович МуртузагIялиевличи пахрубирули саби. Нушани илис гьтIира чIумаси арадеш булгулра. ТалихIчерли хIердиабая хIуша лерилра, хIурматла Сулайбан МуртузагIялиевла уржибси хъалибарг!
Сунела хала дудешла гIямруличила ва ишди бурхIназиб Красный Маныч шилизиб биубси шадлихъличила набзи баянти гибси ва илаб дураберкIибси балбуцлис сиптакарли ветаурси Сулайба уршила урши ГIяли МуртузагIялиевлис нуни уркIи-уркIилабад баркалла балахъулра.
ХIяжимурад Ражабов
