ЧебяхI Хъаршлила шилизибси библиотекала заведующаяли 1990 ибил дусличирад рузули сари ПатIимат ГIямарова. ПатIимат Кьурбановна акIубси сари бахъал дурхIни лебси хъалибарглизир. Илала дудеш Кьурбан ГIямаров ва неш Шамай ХIясанова чула шилизиб халаси хIурмат сархибти, хIялалси бузери барибти адамти саби.
Сунени касибси санигIятлис марси, библиотекала бузери гьалабяхI башахъес, илала хIурмат ахъбуцес къайгъилизир рузуси адам сари. ПатIиматли 1990 ибил дуслизиб МяхIячкъалализибси Дагъиста культпросветучилище таманбариб.
ПатIимат ГIямаровани сунечи хъарси хIянчи чебетаахъили, жавабкардешличил дурабуркIули сари. МалхIямси, духуси, адамтачи дигичерси ПатIимат Кьурбановани «Ахъушала район» МО-ла администрацияла ва культурала управлениела шайзирад чумал ХIурматла Грамоталичил шабагъатларарили сари.
Илини библиотекализир дахъал шадлихъуни, ихтилатуни, КВН-ти, бучIантала гьунибаъниби ва гIурра жура-журала далдуцуни, лерилра байрумтас, машгьурти тарихунас хасдарибти шадлихъуни дурадуркIу.
Дагъиста ва Россияла машгьурси поэт Расул ХIямзатов акIубхIейчирад 100 дус дикнилис хасбарибси шадлихъ хаслира хъумхIертесира, бахъал адамтала бутIакьяндешличил бетерхурсири. «Расул Гамзатов. Вечер поэта» бикIуси. Балбуцличир ПатIимат ГIямаровани дурхIнази поэтла гIямруличила, илала пагьмуличила, назмуртачила буриб. Библиотекализиб леб поэтлис хасбарибси жузала ва белкIанала выставкара.
– Сунела назмуртазир Расул ХIямзатовли сай акIубти дубурла мер–муса, гIядатуни, тIабигIят, адамти ва тарих черяхIдирутири, – рикIи ПатIимат дурхIнази.
Шадлихъла бутIакьянчибани, учительтани ва дурхIнани Расул ХIямзатовла назмурти зайдухъахъун.
Библиотекализир дурадуркIути далдуцуназир школала бучIантани, илдала бегIтани ва жагьилтани бутIакьяндеш дирули саби. Шантани ПатIиматла дебали халаси хIурмат биру, иличила гапбикIар. Школала бучIантасра илини халаси кумекбиру илдала багьуди имцIабиахъес, жузачи, литератураличи диги акIахъес къайгъибиру.
Библиотекализир жура-журала кружокуни дузахъули лер. Илар дирар дахъал жузала выставкаби, стендани, журналти, жузи, альбомти, някъла хIянчурби, дурхIнани дарибти суратуни ва дахъал цархIилтира секIал.
Библиотекализи жузи дучIес башар шила адамти, дурхIни имцIали бирар. ПатIиматли гьалабла заманала сунела шила фольклор бурчули, чехалабиуси наслулизи дагьахъес, гIядатуни хъумхIертахъес гъазализир сари. ДурхIнас патриот бяркъ бедес къайгъибирули, тIабигIятла темабачилара ихтилатуни дурадуркIули рирар.
Районна духIнар дурадуркIути шадлихъуназир, байрумтазир илини жигарла бутIакьяндеш диру.
ПатIиматлис сархибдешуни, арадеш ва хъулиб баракат дулгулра!
С.ГIябдуллаева
