Иш дила белкI гIядатла ахIен­си суайчил бехIбихьес ди­гулра. Гьар бархIи савли гIян­ручI адам айзурхIели ЧевяхIси Аллагьлис чуйна баркалла яра Ал­хIям­­дулиллагь викIара? Суайс жаваб белкI бучIусини бургу, сен-сен дикIа­хIел­ли иш суал сунези хьарбиу ва сай викIули виалли, цархIилтира би­кIу­ли саби или гьанбиркур, хIей­кIули виалли пикрикавхъи тамаша­виэсра асу­­бирар. Марлира, ца адамалра сай кьяй­­дали хIебикIути биалли, Аллагь се­личи разивиркуси ва секьяйдали дунъяличи гIяхIдешуни дурхьути или суал акIес асубирар. Дунъя тIашси са­би халкьличиб, илдала баркьуд­лу­ма­чиб.
Гьар даим нуша лерилра селичи-биалра разиагарлира, хъу­­тур­­дикIулра, мурталра се сабил абиули ахIен, шишимъулти, пик­руми бекIлизирад тяйдидиркули ахIен, гIясидешли чарх акьубалтули ахIен, къантIли буралли, адамла дайхъала гIямру та­ман­хIедирути, ба­­га­­ла­хIе­ди­рути се­кIул­тазир адурхули сари. Наб­­чибад бехI­бихьили илкьяйдали саби лебилра. Амма нушала лерти секIайчи нуша­ни пик­ри бяхIчииули ахIенра. Леб, леб, гIур се саби, дилайчиб гIяхIси ун­ра­лара теб. АхIенрав гьатIи, илкьяйдали пикридикIути? ГьатIи сен нуша пикрихIедулхъутира гьатIира вайтIа хIер­бирутачила, секIал агартачила, мискин-пякьиртачила, цIуръаби дурхIначила? Сен Ал­хIямдулиллагь или ряхIятхIедирутира? Арадеш леб, вашес, укес, чебиэс, вегIла къайгъи вегIли барес вирниличила, камти-диалра, гьар даим хIедиути арц лерниличила пикрихIедикIутира? Чум леба дунъяличиб вайси изай буцибти, хIербиэс юрт агарти, сабил бекIхIебирути, бегIтани лайбакIибти, дунъя чехIебиути, секIал беркес агарли, гушли кабирути? ХIера, лерил халкадаралли, сецад дахъал гIяхIдешуни лерал нушала. Секьяйдали талихIчерти игъбарла дегIти дуилрал. Лебил дунъяла мас лебсира, секIал агарси пякьирра ца мерличи саби аркьути. Мас-хазналис бир­цуси Гьалжана биаллири, лебилра давлачебти бири Гьалжанализиб! Амма нушани балуливан давлачевси адам кьиркьирси, гIясиси ва дебали гIямултарси вирар. Дахъал лерли диаллира, гьатIира дахъал дигулира сари. Илгъуна къиликъ гIяхIсилизи халбируси ахIен. Лерти секIалра даили сари наб или кайресра асухIебирар. Адам гьалавяхI вашес гIягIнили саби, бажардивиркес, къайгъибирес, кумекбирес гIягIнибиркур. ГьатIи, лебси мучлахIебирес, кьабулагардеш чебиахъес лайикьси хIянчи ахIен.
Ил багьандан бурес дигулра гIям­руличи кьабулхIедикни чебиахъу­хIели, гьатIира вайтIа хIерируси гIибратлис кайсен, гьатIира буркьа машиналичив вашуси, хIелайчиб дургIеси телефон бузахъуси, хIе­лагъунти кIелра някъ дузес дир­хIе­дируси, хIелагъуналра яшав бекI­лил агарси. ХIу разили хIейадли, илдигъунти се бикIеса? Ил секIал пикрибирен. Гьар даим АлхIямдулиллагь шук­ру викIадли, гьатIира гIяхIдулхъан хIела гьар секIал. ГIярзхIейкIули, ра­зили хIервиадли, лерилра секIал гьун­чидиркур, хIериэсра дебали гьа­мадбирар. Баркалла викIесра гьатIи хъуммартид, Аллагьла гьарил бар­хIи хIу чевсаргънилис!

Анжела Мутазова