Шанти-тухумтас ва алавти шимала халкьлис мурталра гIяхIдешуни дирули ва алавтачи уркIби дигили дицIибти саби Дахадаевла районна УргIерила шилизибадси Кьурбан ГIяхIмадовла хъалибарг. Халкьла бухIнаб хIурмат сархибти ва бузерили жагабарибти шелра узи-рузили чучи лайикьти санигIятунира касили, ишхIелла манзиллизибра бахълис багалабирули, бузули саби.
Кьурбанра, бикIуливан, бузерили някъби делкахъунси дубурлан сайри. Колхоз-совхозунала ва чула хозяйствобала авлахъуначирти хIянчи дирулицунра ахIи, дубурла шимазибти цацабехIти адамтани санигIятунира ламусличил дузахъутири. Илдигъунтазивадлири Кьурбанра. Нусбала заводлизив узахъес багьандан ил Минводы шагьарлизи учIахъес вархьибсири. Илини ламусличил узули, нусби, нурхби ва цархIилти продуктуни дируси заводлис 60 дус бекIдеш дарибтири. Илала дурхIназибадли хIябли тухтуртала санигIят чеббикIиб, халалгъуна рурси ПатIиматли дудешла санигIят даимбариб. МяхIяммад педагог ветаур. ПатIиматлира дудешливан жавабкардешличил сунечи хъарси хIянчи дурабуркIули, дахъал дусмазир заводлис бекIдеш дирусири ва сирхIяла халкьлис ниъла продуктуналашал кумек гIеббиахъусири. СирхIяла совхозунала, колхозунала ва шимала халкьла ниъ кьабулдирутири ил заводлизир ва хIядурси продукция касес лебтасалра имканти алкIахъутири, улкала халкьлис асахъес багьандан тукентазира диахъутири.
Кьурба гIямрула марси гьалмагъ Ибила ПатIимара гIяхIти хIял-тIабигIятла ва адамтачил ралкарикибси, пергер хьунул адам сарри. Илини колхоз-совхозла хIянчилизирра жигарла бутIакьяндеш дирутири ва дурхIнази хала бегIтала дурхъати гIядатуни дяркъяхъесра кьаслизи каризурсири.
МяхIяммадли ВЛКСМ-ла райкомла цаибил секретарьли узули, патриот бяркъ бедлугнила шайчиб районна жагьилтачил гIибратчебси хIянчи барибсири. ГIур цархIилти къуллукъуначивра ламусличил узусири ил.
ГIяхIмадли цулбала тухтурла ва цулби дируси устала санигIят чеббикIиб. Иличил рарх стоматологияла медсестрали дахъал дусмазир Уркарахъибси больницализир рузусири илала рузи ГIяйшатра. Узи-рузили чумра дахадаевланнис кумекбариб ва бахъла баркаллаличи лайикьбикибти саби. БусягIят ГIяйшат МяхIячкъалализир сари ва сунела санигIят даимбирули, рузули сари.
БегIлара риштIаси Хадижатра тухтур ретаур.
— 1980 ибил нушала улкализир Олимпиадала хIязани дурадеркIибси дуслизиб хасси белчIудира касили, тухтурли узес ва цулби дирес вехIихьибсири, — гьанбиркахъули сай ГIяхIмадли. – ИмцIаливан гьанна нуни цулби дирули вирус. Дила урши Кьурбайра дила санигIят даимбарили, гьанна 10 дус цулби дирули, узули сай. Илини стоматологла санигIят халати жавабкардешличил бузахъес баражардивиркниличибли халкь-ургаб хIурматра сархиб.
Гьанна 45 дус ГIяхIмадли районна шимала халкьлис цулби дирули сай. Поликлиникализив узухIелира бахъал адамти иличи дугьабилзутири ва хIянчилавадли чарухъунхIелира сунела хъулир бахълис цулби дирули, узусири. Илкьяйдали илис, бикIуливан, гьигьбатесра замана хIебири. Адамтира гIяхIси устачицун бираргу дугьабилзути.
— ИмцIати гъай хIейгахъуси, адамтачи дигили вицIибси, сунела санигIят ункъли балуси ва гьарил бирусиличи чекайзурси ГIяхIмад районнизив бегIлара гIяхIсигъуна цулбала уста сайливан районна дурабадли ва шагьуртазибадли иличи цулби дарахъес адамти дугьабилзули бирар, — бурули саби ГIяхIмад ункъли валутани.
ГIяхIмадла МяхIяммад бикIуси уршили юрист ветаэс кьасбариб ва ил шайчиб багьуди касиб. Амма чеббикIибси санигIят хIясибли узес кьадархIебиуб. Някъла гIяхIти устадеш лерси илини гьанна юртани лушнилизир ва цархIил шайчир хIянчи дирули вирар.
Мадина казначействолизир рузули калун. Наида тухтур ретаур.
ГIяхIмадла гIямрула юлдаш ХIявара гIяхIти хIял-тIабигIятла хьунул адам сари. Дахъал дусмазир Уркухъла шилизир сунела кулпетличил хIеррируси ил халаси хIурматличил пайдаларикIуси сари.
Цулбала тухтурла БархIиличил бархбасахъи, ГIяхIмад мубаракварес лайикьли сай. Илис гьаннала гIергъира чархла арадеш, бузерилизир гьарбизуни ва тухум-агьлулара кулпетлара балгундеш дулгехIе.
ПатIимат Кьурбанова
