Дахадаевла районна администрациялизиб ишди бурхIназиб бетерхурси совещаниеличиб муниципалитетла руководитель МяхIяммад ГIябдулкьадировли баянти гьаладихьиб, сарира СВО-лизир бутIакьяндеш дирути бургъантас кумек гIеббиахънила баркьудила мягIничебдешличила бурути.

ЦабутIаван, бронетанкабала гIяскуртала маршал П.П.Полубояровла уличилси Шепетовский Краснознаменний полкла 12 ибил Гвардияла танкабала командованиела ва личний составла шайзирадли Баркаллала кагъурти дедиб Алена ГIябдуллаевас ва ГIялибег Кьурбановлис. Дявила частанас илдани кумек гIеббиахънила баркьуди ахъли кьиматлабирнилис бикьридеш дирули сари илди шабагъатуни.

Илкьяйдали Дагъистанна «Каспий» бикIуси цаибил батальонна командир Г.Маликовла шайзибадли отрядлис кумек гIеббаахъни багьандан «КьярбачIимахьи» ибси шила советла бекI МяхIяммад ХIяжиевлира Баркаллала кагъар касиб.

«Иш гьакIлис нуша цацабехIти адамтани дирахъути сархибдешуначила гьанбушесцун ахIенра цаладикибти, Россияла Ярагъладарибти ЦIакьани гIердурцнилизир нуша уржили цадиъниличилара бурес лайикьли саби. Бургъантас кумек гIеббиахъни ва илди гIеббурцни – ил гьарли-марси патриотдешла баркьуди саби. Илгъуна бетуц нушани ахъли кьиматлабирехIе. Нушала гьарил баркьуди бургъантази нуша чучила къайгъилизи дикниличила ва лебил халкьли илди гIеббурцули биъни иргъахъниличи дяхIчиаибти сари», — буриб МяхIяммад ГIябдулкьадировли.

Дахадаевла районна администрацияла пресс-служба