Абакаров Салам МяхIяммадович учIули сай Ургубамахьила школализив 11 ибил класслизив? Салам Абакаров республикала кьадрила «Второе дыхание родным языкам» бикIуси сочинениебала конкурсла «Сохранение родного языка» ибси кIиибил бутIализив призер ветаурли сай.
Сочинение белкIахъес Салам хIядурварибси сай дахъал дусмазир школализир дурсри кадирхьули рузуси мугIяллим МяхIяммадова ПатIимат ШайхгIялиевнани. ПатIиматли бурули сари «Салам виштIахIелил серхурси, пагьмучевси, жигарчевси, белчIудиличи гъирачевси урши вири или».
2025-2026-ибил белчIудила дуслизибра республикала кьадрила конкурсличив Салам мурхьси мягIнала, нешла мез мяхIкамдирнила шайчибси сочинение белкIи призер ветаъни багьандан, ДР-ла багьудила ва гIилмуртала Министерствола шайзивад Дипломличил ва Сертификатличил шабагъатлаварибсири.
Гьалабван Ахъушала шила культурала КIялгIялизиб бетерхурси «Успех» бикIуси пагьмучебти дурхIнас хасбарибси фестивальличиб П.МяхIяммадова ва С. Аба­каров «Ахъушала район» МО-ла администрацияла бекI­ла ва районна багьудила управлениела шайзибад, ил­дала сархибдешуни кьиматладарили, ХIурматла Гра­мотабачил шабагъатлабариб.
Салам Абакаровла лер сархибдешуни спортла шайчирра. Мушулбашнила шайчирти абзаназир жигарла бутIакьяндеш дирули, Салам чуйнара шабагъатуначи лайикьикиб. Абзаначир гьаларти мерани дурцули, илала чумал Кубок ва Диплом лер.
2023 ибил дуслизив Салам Абакаровли Каспийск шагьарлизибси республикала «Олимпийские надежды» бикIуси, СССР-ла спортла мастер Савицкийла уличилси школализир, 54 килограммла битIакIла 2009-2010-ибти дусмазиб акIубти гIулухъаби-ургар детурхути мушулбашнила шайчирти абзаназир бутIакьяндеш дарили, цаибил мер буциб, Грамоталичил шабагъатлаварибсири.
Арбякьунси дуслизив Избербаш шагьарлизир детур­хути ВатIан балтахъанна БархIилис ва дявила хасси балбуцлизиб ВатIанра, халкьла челябкьлара багьандан бургъули чула жан дедибти гIяхIгъубзни гьан­биркахъули, дурадеркIибти 62 килограммла битIакIла 2009-2016-ибти дусмазиб акIубти гIулухъаби-ургарти мушулбашнила шайчирти абзаназиб, С.Абакаровли цаибил мер сархили, Грамоталичи лайикьикибсири. Ил абз дураберкIилри Избербаш шагьарлизибси ДурхIнала ва гIулухъабала спортла школали.
Салам Абакаров цархIилти журабала спортла шайчирти абзаназирра бутIакьяндеш дирули, гьаларти мераначи лайикьиркули сай. Гьарра шайчивад пагьмучевси урши сай ил.
Гьаннала гIергъира сунела гIямрулизир ва белчIу­ди­лизир сархибдешуни, спортла шайчир чедибдешуни им­цIа­дикIаб!

Сабият ГIябдуллаева