Ишдусла февральличиб Ахъу­шала районнизи архIя дура­бер­кIибсири ДР-ла багьудила ва гIил­муртала министр ЯхIъя ХIямидович Бу­чаевли.
Ахъушала районнизив ил, сунела хIянчизартачил варх бахъал адамтачил гьуниваиб, чумал школализи вякьун, «Ахъушала район» МО-ла администрацияла бекI МяхIяч ГIябдулкаримовла кабинетлизиб адамти кьабулбариб. Администрацияла актовый заллизиб шабагъатлабариб Ахъушала районна багьудила учреждениебазиб дахъал дусмазиб хIялалси бузери барибти хIянчизарти. Шабагъатлабарибти-ургар лерри Ахъушала урга даражала хIябъибил школала директор ИмангIялиева Марина МяхIяммадовнара. Илис «ДР-ла багьудила отличник» ибси лишан бедиб.
Марина ИмангIялиевани 9 дус­личирра имцIали Ахъушала хIябъибил школалис бекIдеш дирули сари. Ил школа гьалабяхI арбукес, бучIантази багьуди касахъес, илдас гIяхIси бяркъ бедес къайгъилизир сари.
Школала директор ретаайчи Марина МяхIяммадовна чебяхIси даражала бугьудира касили, Ургубамахьила ва кIиибил урга даражала школабазир Англияла мезла дурсри кадирхьули рузули калун.
Марина ИмангIялиевала неш Алла ГIя­ли-ХIяжиевна акIубси сари Ахъушала ши­лизив машгьурси, хIурматла адам, Че­бяхI­си ВатIа дявила бутIакьянчи Къакъбаев ГIяли-ХIяжи ГIямаровичла хъалибарг­ли­зир. ЧебяхIси ВатIа дергълизивад чарухъи гIергъи ГIяли-ХIяжи Къакъбаевли дахъал дусмазиб багьудила учреждениебазиб хIялалси хIянчи барибсири. Маринала бегI­т­анира учительла санигIятличил бегI­биуб­ли, чула гIямру дурхIнас ва школалис хасдарибти сари. Дудеш МяхIяммадлира неш Алланира дахъал дусмазиб школабазиб халаси бузери бариб.
Учительтала хъалибарглизир акIуб­си, дурхIначи дигичерси Марина Мя­хIям­­­мадовнани 1992 ибил дуслизиб Мя­хIяч­къала шагьарлизибси Дагъиста пачалихъла институтла, Англо-геог­рафический факультет таманбариб ва учительла сани­гIят­личи регIриубли, сунела бузерила гьуни бехI­бихьиб. ГIямру школалис ва бучIантас харждирули сари, гьанна илала бузерила стаж 35 дусличи абикили саби. Чебетаахъили, жавабкардешличил сунечи хъарси хIянчи даимбирули рузули сари, сунечил барх бузутала хIурматра сархили.
МалхIямси Марина МяхIяммадовна чуйнара «Ахъушала район» МО-ла администрацияла шайзирад ХIурматла Грамотабачил шабагъатларарили сари.
Марина ИмангIялиевани хIябал урши-рурси абикьур, гIяхIси бяркъра бедили, багьудира касахъили.
Гьаннала гIергъира сунела гIямрулизир ва бузерилизир сархибдешуни, шабагъатуни имцIадикIаб, бажардичерли ру­захъес арадешра биаб пергер педагоглис!

С.ГIябдуллаева