МикIхIила дурхI­на­ла ис­кус­ст­во­бала школа – дебали тамашаласи ва урхI­мешули ахIенси школа са­би. ЧеимцIати багьудлуми дед­лугуси шила гьарил-декIар бел­чIудила заведениелис ил­гъу­на машгьурдеш сархес им­кан­бикIули хIебирар. Гра­мо­таби ва шабагъатуни кадихьес мер агарли дахъал лер илар. Саби педагогунани буруливан, машгьурдешла бекIлибиубси дигIяндеш саби илала пагьмучерси директор ПатIимат Адзиевна Адзиевани бекI­деш дирнилизиб. Илини гьанна школалис 24 дус бекI­деш дирули сари.
ПатIимат Адзиевна – халати устадеш лерси педагог, организатор, дебали дурхIни, сунела санигIят ва музыка дигахъуси адам сари. Школализиб руркъянти гьар дус районна, регионна, лебил Россияла ва халкьани-ургарти конкурсунала лауреатуни бетарули бирар. Лерилра илди чедибдешунала къакъла гIелар тIашли сари мурадуни детурхахъуси, жавабкардеш дихуси директор.
ПатIимат Адзиева акIубси сари Ставропольла крайлизир. Ил халараиб ва ручIули калун МикIхIила шилизир. 1991 ибил дуслизир ил ДГПУ-ла иностранный факультетлизи карерхур, 1996 ибил дуслизир биалли, илини сунела бузерила цаибти гунзри кацIиб МикIхIила урга даражала школализир пионервожатаяли рузули. 1999 ибил дуслизир ил Ставропольла крайлизи гечриуб, Ольгинская СОШ-лизир урус мезла ва немецунала мезла мугIяллимли, бяркъла шайчирси завучли рузули калун. 2000-ибил дуслизир ил ахIерси шилизи чаррухъун, урус мезла ва литературала дурсри кадирхьули рузес рехIрихьиб. КIинайс, районна багьудила управлениела маслигIят хIясибли, Лавашала 1-ибил СОШ-лизи директорла белчIудила-бяркъла хIянчила шайчирси заместительла къуллукъличи каратур.
2002-ибил дуслизиб МикIхIила шилизиб дурхIнала искусствобала школа абхьиб, ПатIимат Адзиевнас биалли илис бекIдеш дарахъес мас­ли­гIят­бариб.
«ИшбархIиван гьандиркур районна бекIла дугьби: «Балулра, хIу бажардириркуд, рузен — ва лерил секIал гIягIниси тяхIярли детарар», — гьанбиркахъули сари илини. — Цаибил бархIи хIянчила ракIибхIели, аргъира: юрт агара, кабинет агара — къиянси гьуни. ИлхIели дила ши, буралли, делхъла ахIенри: муркърачиб булхъес камли дурабулхъули бири. ХIера, илкьяйда бехIбихьибсири искусстволичи дила гьуни».
ДШИ-лизир абхьиб хорла, вокалла, хореографияла, театрла искусствола ва музыкала гIягIниахълумала отделениеби, илкьяйдали Жангамахьи, Хъарлябхъу, Зуримахьи ва ГIяялахъяб шимазир филиалтира. Шимала бургази хъулри декIардарахъес, гIягI­ниахълумагIиб умцIес, хъали-хъайгIи башули, бегI­тачил гъайбикIес чевкъулри. Бахъли балули ахIенри се барес илдала дурхIни делхъличи бур­сибирутил, амма районна бекI­ла, юлдашунала ва цакласслантала икьалаличил илини лерилра къияндешуни ахъиб. Ца дус бамсриагарли рузули, илис «Баракат» ансамбль акIахъес, районна далду­цу­на­чир бутIакьяндеш дирес им­кан­бакIиб.
ДШИ-лизиб руркъути дурхI­ни дебали пагьмучебтири. Ва устадешчебти педагогунала кумекличил цаибси дуслизибад илди Шамилкъалализиб бетерхурси «Шамилла шушка» бикIуси фестивальличиб призерти бетаур — илхIейчирад илдани гьаларти мерани дурцули сари.
«РиштIахIейчирад наб кьадарбиуб дахъал республикаби ва шагьурти чедидяхъес, амма гьархIели, дила республикализи, шилизи чаррулхъухIели, дила уркIилизиб ишгъуна пикри чIумабирар: нуша ванзала бегIлара жагаси мерличир хIердирулра. Нушала бекIахъудила бетуц, гIядатуни, культура дебали тамашалати сари! Дила шила жагьилти нушала халкьла культураличи ва гIядатуначи бурсибарес рирниличи пахрубирулра. Искусство ва культура агарли миллатра хIебирар, ва гьанна 24 дус нуни чеалкIуси наслу нушала гIядатуначила багьудлумачил бегIбирулра», — бурули сари ПатIимат Адзиевнани.
Гьар дус республикала центрлизиб Дагъиста искусствобала 82 школа-ургаб конкурс бетурхули бирар. Жюрили декIар-декIарти номинациябазир устадеш кьиматладирути сари. Школали чумал дус гьаларти мерани дурцули сари.
«Ил барес имканбикIули саби дила пергер коллективла кумекличил. Дигесли саби, педагогуни-ургаб нушала выпускникунира лебни: школа таманбарили, илдани хореографла санигIят чеббиркIули саби ва чеббикIибси санигIятлизиб устнили бетаурли нушачи чарбулхъуи саби, дурхIнас делхъла ва далайла дурсри кадирхьес багьандан. ХIебиалли, нуша хIязлис дузули ахIенра», — сунела пикруми аргъахъиб ПатIимат Адзиевнани.