Россияла Федерацияла Пре­зи­дентла ХIукму хIясибли, сентябрьла 8-личиб Россияла халкьанала мезанала БархIи сабливан багьахъурси саби. Сентябрьла 8-личиб Дагъиста халкьла поэт ле­бил Россиялизив ва дурала улк­назив машгьурси Расул ХIямзатов акIуб­хIейчирад 103 дус диркули сари. Ил сабабли бетаурли, ишдуслизиб бегI гьалаб сентябрьла 8-личиб Рос­сияла халкьанала мезанала БархIи дура­бур­кIахъес багьахъурси саби.
Ил байрам Дагъистайзиб гьатIира мягIничебсили бетарули саби, сенахIенну нушала республикализиб дахъал миллатунала 30-чибра имцIати жура-журала мезличил гъайбикIути халкьани лебти саби. Дагъистан Республикализибти дахъал миллатунала халкь даршусмазиб цабалгундешличил, цали цала мезани руркъули, гIядатуни дузахъули хIербирути саби.
Ил багьандан, ил БархIилис багъишладарили лебил Россиялизир ва Дагъистайзир кьяйдали, Ахъушала районнизирра далдуцуни дурадеркIиб.
Илди дурабуркIнила бекIлибиубси мягIна саби дахъал миллатуна­ла халкь диги­ли­чил, дар­­­­шудешличил, ца­ли цала хIур­­матбирахъули хIер­би­ахъни.
МухIела, Бутрила, Усишала, ХIям­ши­мала, ТIебекмахьила ва цархIилтира шимазирти библиотекабазир, культурала Юртаназир ва культурала Центртазир, ЦБС-лизир школабачил дарх дахъал далдуцуни дурадеркIиб «Россияла халкьанала мезанала БархIи», «Машгьурси стихотворец», «БебкIаагардешлизи арцурли сари къургъи» бикIути ва цархIилтира.
Библиотекабазир хIядур­дарили жузала выставкаби, машгьурти писательтала, поэтунала Россияла халкьла культураличила, гIядатуначила, гIямруличила белкIунти ва Дагъиста литературала жузи, жура-журала энциклопедияби, словарьти лерри. Илди жузи-ургар лерри Расул ХIямзатовла, Фазу ГIялиевала, Николай Некрасовла, ГIямарла Батирайла, ГIяхIмадхан Абу-Бакарла ва гIурра цархIилтира машгьурти поэтуни-писательтала.
Ил БархIилис хасдарибти конкурсуни, викторинаби детерхур, ВатIайс багъишладарибти назмурти ва далуйти делчIун.
Расул ХIямзатов акIубси Хунзахла районнизирра, цархIилти республикала духIнарти мер-мусаличирра гьар дус кьяйдали, ишдуслизирра «ЦIуба къургъи» ва «ХIямзатовла бурхIни» бикIути далдуцуни дурадуркIути сари. Илдигъунти «Къургъи», «ЦIуба къургъи» бикIути далдуцунира дурадеркIиб Ахъушала районна библиотекабазир, школабазир, культурала Юртаназир ва Центртазир.
Районна культурала управлениела хIянчизартани тах шагьарлизиб ДР-ла культурала Министерстволи, респуб­ликала халкьла пагьмуртала Юртли, ДР-ла БекIла ва Правительствола кумекличил хIядурдарибти «ЦIуба къургъала бурхIни» бикIуси халкьани-ургаб бетерхурси литературала фестивальлизир ва Россияла халкьанала БархIилис хасдарибти шадлихъуназир жигарла бутIакьяндеш дариб.
Сентябрьла 8-личиб халкьани-ургабси «День грамотности» бикIуси БархIира дурабуркIуси саби. Ил Бар­хIилис хасдарибти «Грамотей», «Секреты грамотного чтения», «Угадай название», «Добавь букву», «Будь грамотным – будь успешным» бикIути конкурсуни, викторинаби ва устадешла дурсри дурадеркIиб бучIантачил дарх.
Далдуцуни дурадуркIутани ил Бар­хIила мягIничебдешличила тIинтIти баянти гьаладихьиб. Лерилра илди далдуцуни шадлихъла аги-хIяйзир детерхур.