Халкьлис гIяхIбарес ва ба­га­ла­биэс къалабати адамти камли ахIен нуша-ургаб. Ил­дигъунтала лу­гIилизивад ца сай ГIиса ГIямаровра.

Жа­мигIятлис гIибратли ве­таурси, бахъла хIурмат ва диги сархибси, багьудлуми тIинтI­дирницунра ахIи, адамтас разидешра би­хуси. Ил гьарли-марли ва­тIан дигахъуси, халкьлис къуллукъличи кай­зурси гъабза сай. Гьайгьайрагу, ил­ди­гъунти адамти жа­ми­гIятла, пачалихъла ва миллатла хъа­рихъ­ли бетарули саби. Ириъ нуша иличи гIяхI­ладли дукьниличила, нушаб ил ра­зили гьуниваили къугъати гIяхIялдеш дар­ни­личила цакамси макьалара бел­кIун­сири ну­ни. Илгъуна адамличила гапикIес умсуси ахIен.
ГIиса ГIисаевич ГIямаров гьарра шайчивад пагьмучевси адам сай. Ил ДР-ла культурала урибси хIянчизар, Россияла писательтала Союзла член, вегIла мер-муса руркъян, гIяхIси педагог сай. Илини сунела лерилра гIямру хIялалси бузерилис харждарибти сари, гIяхIцад дусмазив чеалкIуси наслулис бяркъ бедлугули ва илди багьудлумачи бегIбирули. Дахъал дусмазив Къуппала школализив дарган мезла ва литературала мугIяллимли узули калун.
ГIиса ГIисаевич урибси литературовед-фольклористра сай. Илини халкьла мухI­лила пагьму бучес, ва ил белгиси тя­хIяр­ли­чи бушес ха­ласи хIянчи барибси саби. ГI.ГIя­ма­ров­ли дурхIнас хасдарибти жузи, Россияла гIил­мула академияла Дагъис­та хIялумцIлаби дурадуркIнила шайчибси Центр­ла тарихла, археологияла ва эт­но­гра­фия­ла институтла аспирант Р.И.Се­фер­бековличил барх «Къуппа – XI-XX дарш­дусмала тарихла-этнографияла ма­съул­ти тIинтIли сипатдарни» бикIуси жуз ду­­раиб, сабира Имам Шамилла уличилси хал­кьа­ни-ургабси фондла мур­гьила медальличи лай­­икь­­бикибси.
Пикриухъалли, гьарил адамли дига­хъу­­си, сунечи гъамси хIянчи бируси саби. Ца спортлизи ихъули сай, цар­хIил­­ли мез руркъули сай. ГIи­са ГIи­саевичли биалли, виш­тIа­хIей­чи­вадал халаси иштяхIличил къаркъуби дур­чутири.
Цалра тамашабизеси къаркъа балтуси ахIенри, ва ил бяркъес кьасбирусири.
Даргибти къаркъа илцадра дахъал сарли, илала уркIилизи музей акIахъес ибси пикри хьурабиубсири. ХIера, илала хьул гIямрулизиб бетерхур. 2014 ибил дуслизиб сай акIубси Лавашала районна Къуппала шилизиб республикала палеонтологияла (дебкIибти мицIирагла ва духълумала), археологияла ва край руркънила музей абхьиб. Северный Кавказлизиб илгъуна музей цацун саби лебси. Музей сунела юртлизиб саби мерлабиубси. Илар миллионти дусми гьалар хIердиубти мицIирагла къаркъаличи шурдухъунти лига-кьякья чедаэс вирар. Музейлизир 2500-цад экспонат гьаладихьили сари: сарматский китла къакъла чIала, метеоритла бургIяла ва дахъал цархIилти секIулти. Гьарилла тамашала тарихра леб. ГI.ГIямаровли бегIлара тамашаласилизи халбирули сай гьалабла берхIила сягIят-календарь, сабира 10-14 азир дус биубси. Ил баргибсири Къуппала шилизибад гьарахъли ахIенси Талку бикIуси дубураличир къаркъа адилтIухIели. ГIиса ГIисаевичли къаркъа дурчни балули, илис кабухибсири ил. Илала кумекличибли нушала хала бегIтани авлахъличирти хIянчурбала замана кабилзахъусири. ГI.ГIямаровла музейлизи дагъистанланти ва россиялантицунра ахIи, дурала улкназибадти гIяхIли булан башули саби.
Бурес чебиркур, илала асилси бузери хIукуматлира ахъли кьиматлабарибси саби. ДР-ла пачалихъла Советла хIукму хIясибли, 1997 ибил дуслизиб илис «ДР-ла культурала урибси хIянчизар»-ла у бедибсири. Илкьяйдали, ил Имам Шамилла уличилси халкьани-ургабси фондла ва ГI.Батирайла уличилси гIяхIбаркьла фондла лауреатра сай. Сунела бузерила гьунчив ил дахъал грамотабачи ва жура-журала шабагъатуначи лайикьикибси сай. Гьалавванра И.В.Сталинна букьурли даибти баянти руркънила шайчибси лебил Россияла патриотический хIяракатла председатель ГI.Беговли, ВатIайс мардеш багьандан, ГI.ГIямаров «Генералиссимус И.В.Сталин» орденничил шабагъатлавариб.
ИшбархIира ГIиса ГIисаевич, рухIла давла чебир­цIахъули, жигарчевли узули сай. Илини нушала газетализи макьалаби дашахъу. Хасси пикри алкIахъути жявхIелла манзилла халкьла яшавла ва культурала материалти дурчули, илдала ахтарди дурабуркIули сай. Сунела дурхIнала дурхIнала ва шантала сархибдешуначи хIулуркIули, хIерирули сай.
Нушанира ГIиса ГIисаевич хIурматла орденничил шабагъатлаварнила разиси анцIбуккьличил мубараквирулра ва, гьаннала гIергъира жагьилтазир ВатIайчи диги адилкьахъес арати ва духъяна гIямру дулгулра.