ГIябдуллаев МяхIяммад БяхIмудович Урхьучимахьила урга даражала школала директорла къуллукъличив вецIну кIира ибил белчIудила дус узули сай.
БелчIудила сагаси дусличи хIядурдеш ахтардибарес комиссия бакIайчи гьар секIал чедетаахъес къайгъилизи викилри ил. Иличил рарх сунела марси гьалмагъ Хадижатра, багьудила Центрлис кIел класс-кабинет далкьаахъес вецIну шура бархIи бузули буибти хIябал устас дуббат хIядурбирули, рамсурсигъунара ахIенри.
— Рамсес се гIямала! — иб Хадижатли, дяхI шалали бакIибтас гьунириули. — Пикри лебсири каникултас санаторийлизи аркьехIе, насаб-тухумличи гьардикIехIе или, чина хабара! «ХIянчи дархьадатурли чиналра укьес хIейрар», — викIули сай. Иш викIуси хIебарес риубсирав?!
— Дила шайзибад баркалла белкIеная районна бекI МяхIяч ГIябдулкаримовлис — ил вакIибмад багьудила учреждениебачи хIеруди имцIабиуб. «Точка роста» бикIуси программализи кадерхахъурти-ургаб нушала школара лебси саби. ХIера, ишди кIел класс-кабинет далкьаахъурли. ДахъхIи хьулдикIутири школала улкьайти дарсдарес. Ишди бурхIназир пластикала улкьайти лерхути сари. Мини-футболла майданра балкьаахъесра кумекбариб. Сентябрьла 1-личиб ибхьуси саби медицинала кабинет, — буриб директорли.
ДР-ла урибси учитель, Россияла багьудила отличник, 2005-ибил «Дусла директор», «Россияла халкьла учитель» ибти хIурматла уми, багьудила Министерствола, районна администрацияла ва районна багьудила отделла дахъал ХIурматла Грамотаби касибси МяхIяммад БяхIмудович районна гIелакадулхъути школаби гьаркьятала къяйлизи дурайънила шайчир гIяхIти устадеш касибси адам сай.
— Нуша, халати адамти, гьанна цачумал сарра школализир лерти. 20 учительлизибад имцIатигъунти жагьилти саби, илхIелира — Урхьучимахьила шилизибадти, — бурули сай директорли.
МяхIяммад БяхIмудович баркалла викIули сай Урхьучимахьила шила администрацияла бекI ГIяхIмадхIяжи МяхIяммадовичлис, суненира школаличи халаси пикри бяхIчииуси. ЧебяхIси ВатIа дергъла бутIакьянчибас барибси памятник школала мякьла гечбарили, сагабарахъиб.
Школализир кIел спортзал лер: ца — учительтас ва чедирти классуназиб бучIути уршбас, итил — рурсбас ва бехIбихьудла классунала бучIантас. КIелра хIядурли сари белчIудила сагаси дусличи. Жагали далкьаахъурли сари спортсментас хасдарибти стендани, машгьурси боксер, Урхьучимахьилизивадси МяхIяммад-Расул Мажидовлис хасбарибси гIямзи.
БучIантала лугIи гьар дуслизиб 220-230-йчи абиркули саби. Сагаси белчIудила дуслизиб 20 дурхIя цаибил класслизи лябкьян. ИмцIабиубли саби школа «шула» кьиматуначил таманбирути бучIанти. Школа абхьила хIебиубси анцIбукь мургьила медаль каснира, директорла сархибдешуназибад ца саби.
Урхьучимахьилизибад дебали камли бири бучIес башути рурсби. БусягIят биалли, 10-цад рурсили учительла санигIят касили саби. Илдазирад ца, Зайнаб НурбяхIяндова, рузули сари школализир вожатаяли.
Директорла гьарли-марти кумекчиби саби илала заместительти Заур Ибрагьимов ва КьурбанхIяжи ГIябдуллаев, чебетаибти педагогуни ПатIимат Ибрагьимова, Загьидат Янбулатова, Масай МяхIяммадова, къантIли буралли, лебилра хIянчизарти.
Чидил класслизи ухIнаухъаллира — гьар мерлаб чебетаибси някъ гьанарули саби: классуназиб, учительскаялизиб, столоваялизиб, медицинала кабинетлизиб…
Школализирад дурадухъунхIели, хIулби дархьдизур жаняхIлизибси ХIурматла уркьуйчи: учительталайчил дарх илар лерри лебилра технический хIянчизартала суратунира. Гьанбикиб: хIера, сецад пикри бяхIчииулил школала директорли бузерила адамтачи. Цалра школализиб ХIурматла уркьуйзиб чехIебаира умудеш гIеббурцути, учительтас шуртIри диахъес бузути адамти. Саби уркIичеббируси руководитель левхIели бурги, ил бархIира лебилра технический хIянчизарти иштяхIличил бузути.
Марлира, гIядатла адамтачи, бегIлара камси алапала вегIличи пикри имцIали бяхIчииэс балниличирад ахIенара дехIдирхьути руководительла адамдеш! Ил шайчивра цархIилтас гIибратли ветаурси МяхIяммад БяхIмудовичлис ва илини бекIдешдируси коллективлис белчIудила сагаси дуслизир диаб сархибдешуни!
