«КЪУЛЛУКЪ
ХIЯЖАТСИ САБИ…»
45 дус. КIишала ветучас­токла бекI ГIябдулкьадир Кьур­­­­­банхIяжиевла бузерила та­­­­­рих­лизир илди дусми хIи­­саб­­­­дирули сари. Аммаки иш­бар­­­­хIи­ра, 75 дусла гIямру дер­­кIибси пен­­сионер виалра, илини вамс­ни балули ахIен, хIяй­­вантала тух­турла хIянчи даим­барили сай.

— ГIябдулкьадир Кьурбан­хIя­жиевич, санигIятуни кьалли хIуни гIяхIцад чедаири, дарсди­кIахъади?
— Биуб илкьяйда: узули калунра КIишала «16 ибил партсъездла» уличилси колхозла председательли, ЧIишилила ва КIишала цахIнабси «Маяк» совхозла директорли, шила Советла исполкомла предсе­да­тельли, «Дахадаевла район» МО-ла бекIла на­си­хIят­чили… Ил­ди заманала хIян­­­чур­би­-къул­­лукъуни сарри. Ми­цIи­раг­­личи хIеруди — сен­ни­ра ил­ дила гIям­рулизиб бекI­­ли­биуб­­си, бузерилизир тIя­гIям ва паргъатдеш лугуси са­нигIятли бетаур.
— ХIяйвантала тухтурла са­нигIятличи чарухъи хIей­кIу­ду?
— Сайра, сайра.
Чуйна бураллира, бархьси са­би, мицIирагла тухтур адам­­талай­чивра духули пик­ри­­­­икIуси, се­кIал гьала хили ба­­­луси виэс гIягI­ни­бир­кур. Зя­­­­­гIипси адамли сунела изай­чи­ла тухтурлизи аргъа­хъес ви­­­­рар, изуси мер че­ба­­ахъес ви­­­рар. МицIирагли? Юх, илда­ни цалра гъай хIебуру, ва хIяй­­ван­­­тала тухтурлис, ми­цIи­раг хIер­­барили, иличибси хIял ба­гьес хIяжатбиркур. ИлхIелира ха­­тIахIейкили, сегъуна кумек гIеб­­­­­­баахъес гIягI­нилил, тамай якьин­­ба­­рили.
ИхтилатдикIухIели, нушани имцIати тяхIуртазиб хьарбиули дирехIе, ит яра иш санигIят сен-сен чеббикIибсил багьес или.
ГIябдулкьадирлизи илгъуна суал хьарбаэс-декIар хIя­жат­хIе­бикиб, сенахIенну илини, сай виштIахIели, гIяпа­баркь, ду­дешли бурибси анцIбукь гьан­­бикахъиб.
«Нушала шилизи хаба­рагарли цIямхъла изала тIинтI­биуб­сири, — гьанбикахъиб ГIяб­­­­дулкьадирли дудешла хабар. — МицIирагличи чейхъуси ил изайс гьанна «чума» ирули бирар. Гьанбиркур, шилизиб цалра я хала хIяйван, я ма­за-мас мицIирли кахIели, ванзали кьяраибхIеливан, ши ми­цIи­раг­ли­зибад бацIкабухъи. Чумал дус­ла гIергъи сабри дудешли, Хай­дакьлизибад асили, нушала юртлизи кьял кибси. ИлхIелира, гьанкIра бархьбатурли, дудешли дугели къараулбирули вири, рахли ил кьялра савлилис жяргабиэсгу или…
Наб ил анцIбукь сен гьан­бир­­кули? Дудешла хабар ар­­гъиб­­хIейчибад, мицIираг­ли­чила дила пикри цархIил бетаур. Ил­­дас адамтала шайзирад къул­­лукъ ва уркIецIи ча­раагарти диъни, ва илдазиба­д адамтас халаси пайда лебли биъни. Белики, ит­хIели хъа хIяй­ван­ти адикьес, хIер­дарес ибси пик­ри набзи хьурабиубсира бур­­ги…»
— ГIурра гьанбиркур, дила неш ХIясайнила Хадижатли бу­риб­сира. ЧебяхIси ВатIа дергъилизи дудеш гьунив­вал­ту­хIе­ли, илини набчи хъаркабарибсири: «Вари, дила рархкья, кьял хIер­бара. Дергъли халкьлис га­ши гIердиахъути сари, кьял хIер­ба­рес риадли, нушала дурхIнас гIеб­ка бирар, гашазиба­д уца­хъу…»
Шила школализир гехIел класс таманаибси ГIябдул­кьа­­дирла чеббиркIуси са­ни­гIят­ла шайчир васвасъала аги. 1959 ибил дуслизив ил Мя­­хIяч­къа­ла­ла зооветеринарный техникумлизи керхур.

«Лебри замана…»
— Ма, иш хIед дипломра, укьенну хIянчилизиб марбара хIуни касибси багьуди, — бурибсири ГIябдулкьадирлизи чу­­чи хIеруди бируси кураторли ил гьу­нив­валтули.
ХIянчира жагьил ветеринарлис чи­наб-билра ахIенрину, сай акIубси КIи­шала шилизиб сабри.
Гьайгьай, тухтур-ветеринар ил ибкьси замана шила хо­зяйст­­волизив чараагарси адам ве­таур. МицIираг адилкьес ва хIердарес дукикьянабала­цун къиян баиб­си ахIенри. Чей­хъути излумазирад мяхI­кам­даресра гIягI­нилири. Ил багьандан шилизив хIяй­ван­­т­ала тухтур хIяжатлири.
1965 ибил дуслизиб КIи­шала ветучастоклизиб урегал хIянчизар лебри.
— Наб дяхI шалали гьу­ни­баиб­­тири меусишан Зияудин (ил ветучастокла халалра сай­ри), шилизив урибси тухтур Ас­­хабар, хъярбукан Салимат, хIур­хъан Мухтар, журмуканти Ас­кандар ва Гебек, — гьанбиркахъули сай ГIябдулкьадирли. — Ну, жагьил специалист, хIябилра ра­зивиубра, илдани кумекла някъ гьа­батурхIели. ГIеб­буриб, секьяйда узес гIягI­­нилил, набчи се хIянчи хъарлил. Ит­­хIели аргъибсири, адам хIян­чиличи гъи­рачеввирар, эгер сай-алавтани гIе­вур­цал­ли.
— Ца шилизиб урегал ветеринар бахъал ахIенрив?
— Валлагьрагу, бахъал ахIенри! ГIурра гIя­чихъ­ба­­­рас­ли, урегалра хIян­чи­зар хIилхIи сарри ба­жар­ди­дир­кути. Нушани гIеб­бур­цуси къуллукъ шантала ми­­цIираглисцун ахIенри: кол­­хо­зуни-совхозунала хала хIяй­вантасра маза-маслисра къарауйчир дирира. Янира хIебра КIанритIла ва Бядухъила дубуртази, Тяшкечу хъарахълизи, Къараногъайлизирти бу­кIу­нала къушанахIи архIяби кам­хIедири. Ца дусла духIнар кIина-хIяйна мицIираглис излумачи къаршити вакцинаби дирутири. Нагагьладан нуша тухтуртала хатIаличирли ми­­цIи­раг талапдиалри, танбихI гIеб­­биахъи, гIякIа чебирхьи. ЧIу­мати гIядлу-зегъа лерри, чулира адамтазирад бузерила жа­­ваб­кардеш тIалабдирути.
— КIишала ши гьанна гьатIира халакабаили саби, камхIисабдан, 1200 хъалибарг лер. Ветучастоклизиб бузути хIябал хIянчизар саби. Секьяйда бажардидиркулраяв?
— ХIедикес се леба? Ми­цIи­раг камли сари. Шанти бахъ­баилихьар, хъа хIяй­ван­ти гьа­рил хъалибарглизир агара. Шантала ка­­лунти 500 хала хIяйванра 700 ма­за-масра сари. Гьар-ур ца КIи­шала колхозлизир 3000 масра 1000 хала хIяйванра лертири».
Иргъулра ГI.Кьурбан­хIя­жиев­­­­ла зигаръала. Марлира, ну­ша­ла хала бегIтани пахруби­рути санигIятуни — хъубзара­ла, дукикьянала — лергIер эс­кидиубли са­ри. Хъу бацес ва бегIес дураз някъ­лизи кайсу­ти камли са­би, букIа тIер­хьа­ра касили, ми­­цIираглис ду­ки-гьуни дарес ди­­г­ути чебиули ахIен.
Илкьяйда гIямал биэсара?

«Хъянити бурхIни
гьаман хIедашар…»
ГIябдулкьадирли хъумуртули ахIен 1981 ибил дус. Къараногъайла авлахъ. Янила кьяркьти бурхIни. Кеп-чеклизи ахъибти букIуни, авараагарбиубли, чумал бархIи кашартази духIнакаибти маза-маслизирад 340 талапдиубтири. Ил анцIбукь багьандан «Маяк» совхозла директор ГI.КьурбанхIяжиев гIяй­иб­лаварибсири ва туснакълизи хIей­кили хIилхIи увухъунсири.
Тяп илди дусмазир колхозла дургIелализирти хIентI­­­бази биштIа пинцIу­кьу­­на­ни цIа душибтири. Ши­ла Советла председатель Кьур­­бан­хIяжиев, судана­чив бархьдеш кабизахъес къай­гъ­­на­зив, тамай язихъвариб­сири.
Нана хIуливан ахIерти, гIямру бара хъилизирти илала­ кIелра урши — ХIясан ва Кьур­банхIяжи — гьанагарси бе­хIемцIли арбухиб. Симкьли гIян­друршуси рархкья Аминатлизи ил маслигIятикIусири: «ЯхI­бара, дила ашна, нушаб уршби ЧевяхIси Аллагьли гибтири. Илини арра букили сай. Шукру дикIехIе, ишбархIи бакIибси балагь хъумартахъеси жагIял мабакIаб или…»
Ца гIяхIдеш, итхIели илдас уркIи бареси чула пасихIкар ду­деш мякьлав левнира. ГIяй­сара кьутIбикахъули, ил гьар савли уршила юртлизи ваши ва, гьаргала кайили, лякьир бехI­бирхьи: «Нагагьладан гIямру улкьайла шишаван гъалагти диалри, хIериэс се сабри? Белики, илди гъалагти­ хIе­­диънили, чухълумартира къа­р­­­­дулхъахъутира сархIели, адам­лис дурхъатира дургар. Ин­­сайс гIякьлу бедибсира пик­риул­хъахъес саби, сабур-яхIра челябкьлаличи умут­чев­виахъес дедибти сари. Пик­ри­ду­хъеная, дила ахIерти, хъя­нити бурхIнас гIер­­гъи, ванати­ бурхI­нира дашути сарину…»
Дудешли бурибхIеливан, та­лихI­ла бурхIнира ГIябдул­кьа­дирла юртла къапулизи кьутIдухъун. Заочно учIули, илини ветеринарла чебяхIси даражала багьуди касиб.
Дахъал дусмазиб ми­цIи­раглис къуллукъ гIеббуцибси ил Дахадаевла районнизив цаибси Дагъиста урибси ветеринар ветаур. КIинас иличи Дагъиста пачалихъла ХIурматла Грамотаби ва арцла шабагъатуни даиб.
БекIлибиубси биалли – ду­бур­та­зи­бад дураберхурли диркьаличи баибси хIеркIван, гIям­рула дуцI ряхIят­кабиуб.
«Адавзи, нушала кьяйс кумекбарагу…»
Гьар савли кIишантани чейули сай хIяйвантала тухтур, убил шилизивад чедибси шилизибси ветучастоклизи аркьули. Някъбира гьакIдирули, бекIличи гугбатурси чирчара балбирули, ил къалабахIейкIар, къаршибиркути шантази мал­хIямли салам-каламикIар, илдала ицIагIяла дурайчи сабурличил лехIилзан, ва гIур сунела гьуни даимбиру.
Чилилра хIергъути илала балгнира лер:
— ХIушала гIяхIти кьасани гьардизаб!
— Шишим-децI мадагьабая!
— Дурабти хIул­кIули хъули башаб!
Ит савли, ну ветучастоклизи ацIибхIели, ГIябдулкьадирли су­нела марси гьалмагъ «Замана» газета бучIулри. Бара лякьир бехIбихьес далкьхIеурли ле­рай, гьала-гьала «мя»-ла ахъ­си тIама чехиб, гIур, хямкба­рили ун­зара, унабурхIличив хъяша да­кIуухъун:
— Адавзи ГIябдулкьадир, нушала кьял зягIипбикили са­би! Ниъ лугули ахIен!
— Ниъ хIелугуси кьял набра хIейгахъис, къучакъ Муса! Гьари, ца чебаишану, — иб ГIяб­дул­кьадирли, тухтурла ваяхIра касили, дуравхъес валкьа­рули. — Чинаба ил байтарман?
— Дураб леб. Нешра хIечи хIерли сари…
— Гьу, балехIе се бетаурлил. Ниъ агарли, узис ват, хIелара гIя­малхIебирар.
Илира или, хIяйвантала тухтур набчи хIеризур: «Чебиулрив? Чевверхи, ихти­ла­ти­кIес гьанна дила замана агара…»
Нуша дурадухъунра.
Ветучастокла азбарлар ГIябдулкьа­дир­личи хIерси Мусахъала кьялцун ахIенри. Илар гIурра чумал кьялра, кIел къачара, бухъна эмхIера лерри.
ХIяйвантала тухтурли бузерила сагаси бархIи бехI­бир­хьу­ли сай.