ГIергъити дусмазиб нушала республикализиб, «Инсан» фондла сипталичил, дигеси гIядатли бетаурли саби Рабазан базлизиб жамигIятличил дубкабалтни.
МяхIячкъалала бекIлибиубси жумягIла мижитлизиб гьарил дигусини, дуббуцибти адамти дубкабалтахъес багьандан, бирусигъуна пай кабирхьули саби. ИмцIатигъунти мижитуназибра ил гIядат бузахъули саби.
Республикала БекI В.Васильевлира, сай бусурман хIейалра, ил гIяхIбаркьла баркьуди гIеббуцили, чумал бархIила адамти дубкабалтнила харжани сунечи чеасиб.
Майла 21-личиб Дагъиста БекI В.Васильевла бекIдешлиуб республикала Правительствола вакилти Дагъиста Муфтиятлизи баиб. Илди-ургаб илкьяйдали лебри ДР-ла БекIла ва Правительствола Администрацияла руководитель В.Иванов, ДР-ла Правительствола Председательла заместитель Р.ЖягIпаров, ДР-ла миллатла политикала ва динна бархбасуни дузахънила шайчивси министр Э.Муслимов ва цархIилтира.
ГIяхIлас уркIи гьаргли гьуниваиб Дагъиста муфтий шайх ГIяхIмад-апанди ва лебилра цахIнаб «Рабаза къушлизи» баиб.
Илав гъайухъунси республикала БекI В.Васильевли Дагъистайзиб даршудеш калахъес ва халкьани уржахъес багьандан мекелли халаси хIянчи дурабуркIнилис шайх ГIяхIмад-апандис баркалла багьахъур, цалабикибти лебилра дурхъаси базличил мубаракбариб.
Сунела яргализиб, муфтийли республикала руководстволи гьаман кумек гIеббиахъни багьандан, «Инсан» фондла шайзибад баркаллала кагъар бедиб.
«Нуни ЧевяхIсилизи тиладибирулра, иш дурхъаси базлизир хIушала лерилра гIяхIти пикруми-кьасани гIямрулизир детерхахъес», — викIи ил.
Буралли, илдигъунти далдуцуни нушала Дагъиста халкь уржахънилис, цали цала хIурматбирнилис кумеклира детарар. Баркалла биаб республикала руководстволис, гIяхIбаркьла баркьудила ца шайчиб кахIелнилисра. Илгъуна гIибрат саби цархIилтасра хIяжатси.
ХIурматла узби-рузби, даширая, иш дурхъаси базлизир кьяйдали, нуша мурталра цаличи ца кумекличи музадухъес хIядуртили, лерти имканти адаб-хIяяла ва рухIла давла гьаладяхI дашахъес дяхIчииутили, алавтачи дигичертили ва уркIецIичертили кавлехIе!
Лебталалра балгни кьабулдараб Кьудратла ВегIли! Амин!
