Игитунала хIурматбирни, нушала мякьлаб агарли биалра, илдала гьунарличила ца минутлисалра хъумхIертни, иличила чеалкIуси наслулизи бурни – нушала чараагарси чебла саби. Гьанна чумал дус ардякьи сари гIяхIгъабзала бебкIаличил цаванзалан МяхIяммад НурбяхIяндов нушачивад арякьунхIейчирад. Амма илала баркьуди ва мурхьси мягIнала дугьби, сецад дусми ардукьялра, нушала дагьрилизир кавлан.
ХIера, гьалабванра Сергокъалала урга даражала 2-ибил школала актовый заллизиб видеоконференцияла тяхIярличил Красноярскличил «Сибирь — Кавказ. Игитунала дякькад» бикIуси гьаргси дарс бетерхур. Ил Россияла Игит М.НурбяхIяндов гьаниркахънилис сабри багъишлабарибсира.
Илаб лебри ДР-ла шайчибси росгвардияла управлениела начальникла заместитель, полковник Н.Балабеков, 109-ибил бригадала Миллатла гвардияла гIяскурстала 134 ибил полкла командирла заместитель, подполковник Р.Аюбов, Миллатла гвардияла гIяскуртала 134 ибил полкла 3-ибил патрульла ротала бургъанти, Сергокъалала ва Ахъушала районтала дявила комиссар М.МуртузагIялиев, дергъла ва бузерила ветерантала Советла председатель М.МяхIяммадов, дявила чебла ихъухIели алхунти хIянчизартала бегIти ва хьунри, юнармейцыби ва 2-ибил школала 11-ибти классунала бучIанти.
Гьаргси дарсла бутIакьянчиби сабри Красноярский крайла губернатор Александр Усс, Россияла Игит МяхIяммад НурбяхIяндовла дудеш НурбяхIянд НурбяхIяндов, НГ-ла гIяскуртала федеральный кабиз, игитуни ва цархIилти.
Ил балбуц бетурхуси замана Красноярский крайла ва Дагъистан Республикала белчIудила организацияби-ургаб патриот бяркъ бедлугнила шайчиб барх бузнила хIекьлизиб вягIдара кьабулбариб.
Гьайгьайрагу, илдигъунти далдуцуни дебали мягIничерти сари наслулизир патриотизмала шайчирти хIялани адилкьнилисра. КIинайс биалли, илдала баркьудлумазибад дигахъуси саби нушала улкала челябкьлара.
Нушала бурхIназиб биалли, патриотизмала гIячихъси гIибратли бетаур МяхIяммад НурбяхIяндовла гьунар. Илала мисал хьулчили буцили, нуша чинар диахIелра, лерилра цадирес чебиркур терроризм бикIуси балагьличи къаршиси дявилизир.
