Школабазир вецIну цара класс тамандарибти дурхIни имтихIянти дедили, чула белчIуди даимбарес ва санигIят касес пикрилизиб саби. Нушала пачалихълизиб ЕГЭ бедили, касибти баллани хIясибли дурхIни чебяхIси даражала багьудила заведениебази кабурхути саби.
Гьарил заведениела чула кархес имканбикIахъуси балл лебси саби. Пачалихъла заведениебала дурарад лер вегIдешлара. Дила пикрили, илди чIянкIли чус хайри касес абхьибти сари, ва илаб кайсуси багьуди гIяхIси саби викIес хIейрар. ХIебиалли, илавад дуравхъунси хIянчизарла санигIят ахъси даражала саби викIес хIейрар. Бахъалгъунти нушала дурхIни чIянкIли бучIес багьандан кабурхули саби. Илдас санигIятла хIяжатдеш хIебирар. БекIлибиубси – чебяхIси даражала багьудила заведение хъараахънила диплом биалли, биули саби. Дахъалгъунти пачалихъла хIянчила мераначиб кайсуси алапа дебали камси саби. ТIалабуни диалли халати сари. ГIяхIси специалист илдигъунти мераначи аркьули ахIен. Илдала къайгъи саби вегIдешла давлачебси организациялизиб хIянчи баргес.
Чедибра буриливан, бахъалгъунти дурхIнани, школа хъараахъурли гIергъи, сегъуна санигIят касес дигулил балули ахIен. ИшбархIи дахъал хIялумцIлаби дурадуркIути центртани челябкьлализир сегъунти санигIятуни имцIали декIардирутили детарарал ахтарди дурабуркIули саби. ХIерая, «Майкрасофт» ва «Челябкьлала лабаратория» дикIути компаниябанира ил журала хIялумцIла дураберкIиб. Ил шайчиб барибси хIянчила хIекьлизиб Англиялизибси The Independent бикIуси газетализиб макьала дурабухъун. ХIерая, сегъунти санигIятуни тIалабдирутили детарарал 5-10 дусла духIнар.
Microsoft-ла специалистунала хIялумцIла хIясибли, челябкьлализиб бучIантала пикри бекIлидиубти кIел бяхIчибиз хIясибли декIардиру: космос ва «виртуальная реальность». ИлхIелира, бахъла пикри хIясибли, роботунани адамти барсхIебируну ил шайчиб, гьатIира сагати хIянчила мерани алкIахъа. Халаси бирхауди леб, 65 процент белчIуди хъараахъурти дурхIнани ишбархIи агарти санигIятуни сарху или.
Digital-комментатор культуры
БархIиличи-бархIи Интернетла душилизир видео ва суратуни имцIадикIули сари, сенкIун адамтас бучIесван ахIи, суратуначи хIербикIес дигули саби. ХIебиалли, digital-сферализир пайдаладирути мез дяркъалли, культурализиб ва искусстволизиб илди тIалаббарили бирар.
ХIерая, ишбархIира дебали машгьурли сари «мицIирдарибти» суратунала выставкаби. Илди дебали дигахъули сари биштIатас ва гIулухъабас. Digital-сферализив узуси специалистли лугIурбачил барибси культура гIядатлайчил бархбасахъес вирар, ва адамтази гьалабла дунъяла культураличила, сагати журала технологияби пайдаладарили, аргъахъес ва чебаахъес бирар.
Пикрибарибси тIабигIятла дизайнер
ИшбархIи «виртуальная реальность» (VR) нушала гIямрулизиб сагали дакIубируси ва адамтас кункдешуни алкIахъуси гIямрула шали саби. Амма, бахъалгъунти гIялимтала пикри хIясибли, челябкьлализир адамтани VR-лизиб халаси замана буркIу. Илаб илди бучIар, бузар ва бамсриихъу. Ца шайчибад халаси урехи саби адамтас, сенкIун илини нушала гьарли-марси дунъяла гIямрулизирад дулхъахъулра. ХIерая, ил VR-ла кабиз пикрибирути специалистуни хIяжатбиркур. Дизайнер бикIар ишбархIи алавчарси секIа кабиз пикрибируси хIянчизарлис. Челябкьлализиб виртуальный дунъяла дизайнер хIяжатиркур. ЦацадехIти университетунани ил бяхIчибиз чеббикIили, гьалабяхI башес дигули саби. Илдани абхьили сари пикрибарибси ва чеимцIаси тIабигIятла (специалист в области виртуальной и дополненной реальности) шайчиб бузахъес хIядурбирути хIянчизартала курсани.
Интернетлизирти
«ваяхIличила» пикруми баяндиран
Багьла-багьлали нушала гIямрулизир дакIудирули сари дахъал «духути» ваяхI, машинаби, хъулри, Алиса ва Маруся станцияби. Илдазир дузули сари хасти чула программаби, сарира сари-ургар дархдаси дузес дирути. Экономикала ва вачарла бархбасла хIялумцIлаби дурадуркIуси Центрла баянти хIясибли, челябкьлализир big data-ла ва «Интернет ваяхIла» хIекьлизир хIялумцIлаби дурадуркIути специалистунани чIянкIли Англиялизир 200 азир хIянчила мер алкIахъу. Ил бархбасунси саби Интернетлизирад цаладирхъути баянти хIердарес багьандан. Сагати хIянчизарти хIяжатбиркур, чулира «духути» станцияби пайдаладирути адамтала тIалабуни ва пикруми аргъес багьандан, дила пикрили, нуша – адамтачи хIеруди бузахъесра.
Алавчарси тIабигIят жагабируси, чеункъбируси хIянчизар
Чисалра дигIяндеш ахIен, бархIиличи-бархIи нуша-алавси тIабигIят, адамтала гIямруличил бархбаси, палакатбирни. БахъхIи агарли ванзаличиб адамла кьяш хIебаибси мер кахIевлан. Тамашала тIабигIятла секIал деткайхъули сари. Microsoft ва The Future Laboratory-ла специалистунала пикри хIясибли, 2025 ибил дусличиб ванзаличиб урчIемал миллиард адам бирар. Адамтас хIяжатти секIал хIедиур.
ИлхIели хIяжатбиркур алавчарси тIабигIят сагабирути яра чеункъбирути хIянчизарти. Илдани, генетикалашалти ваяхI пайдаладарили, деткахъибти мицIираг ва духълуми сагали акIахъес асубирар.
ЖагIял, марлира, ишбархIи агарти санигIятуни дакIудирар. Илди лерилра сагати Интернетла, багьахънибала ва лугIурбала технологияличил дархдасунтили детарар. ХIебиалли, информатикала ва математикала шайчиб чеимцIаси хIяракат дакIубирес хIяжатбиркур. Дахъалгъунти ишбархIила санигIятунира кавлан. Амма, илдира сагати лугIурбала технологиябачил дархдаси дирар. Дахъал санигIятуни деткайхъур. Пикриухъалли, челябкьлализиб шоферла санигIят беткахъес асубирар. ИшбархIи компьютерли дикути машинаби дакIудирули сари. Самолетуни ва гамурби жявлил илдани сари дикути. Амма, урехи хIебиахъес или адамтира гьачамлис барх башули саби. Челябкьлализиб илди хIяжатхIебиркур.
ДурхIни, пикридухъи, санигIят чеббикIая, хIушала гьуцI хIясибли. УркIилис хIейгуси хIянчилизиб иштяхIра хIебирар.
