Екатеринбург шагьарлизибси тарихлашалси шагьарла анхъ­ли­зив Россияла Игит МяхIяммад Нурбя­хIяндовла дудеш НурбяхIянд Нурбя­хIяндов Уралла жагьилтачил гьуниваиб.

Н.НурбяхIяндовли буриливан, къачагъунала някъбазивад вебкIибси уршиличила гъайикIес гьала-гьала дебали къияннири.
— Замана аркьукад пикриухъунра: «Нуни хIебурасли, чили буру иличила?» Нушала хъалибаргла къакъбяхъли ва пахрули вирусири ил. Гьанна дила уршила гъабзадешличила дебали бахъал адамтани балули саби. Лебилра Россияли нушала децI барх буртIули саби. Гьаннара, дурала улкназирад булан, пашмандеш балахъути кагъурти дашули сари, — викIи Н.НурбяхIяндов.
— «Дузеная, узби!» — адамтала ихтиюрти далтахъантасцунра ахIи, нушаб лебтасалра жи саби ил. РухIлашал гьаладяхI дашес, дузеная, узби: даршули хIердиреная, ВатIан ва гъамти дигахъеная, цалис цали гIяхIдеш биреная, илхIели дявтира, къачагъунира, гьими-кьясра хIедирар, — буриб экстремизмалис ва терроризмалис къаршидеш дирнила, динна хIялумцIлаби дурадуркIнила Центрла руководитель С.Павленкони.
Балбуцличир бутIакьяндеш дарибси Россияла Игит Серик СултIангабиевли урал­лантанира МяхIяммадла машгьурти гъай хъумхIерту или багьахъур:
— Нушала улкала игитунала халаси хIурматбирес гIягIниси саби жагьилтани. ВатIайс къияндикибхIели, хIуша кумекличи музадулхъниличи вирхулра. Халатанира хIушачи игьдибар бирхьу.
Балбуц «Игитуначила гъай» бикIуси Ва­тIан диги адилкьнила шайчибси проектла дазурбазиб бетерхурсири.