Къиянти дургъбала дусми ардякьи гIергъи, Дагъистанна шимала халкь хъалибаргуни адикьес, яшавбарес колхозла хIянчурбачиб бузутири. Ил тяхIярли узулри ца биштIаси шилизивадси ГIялимяхIра. Ил шел биштIати абикьес, гашазибад берцахъес, кьяшмачи тIашбатес къайгъилизиври. Халалгъуна рурси Раисат 14 дус риублири, виштIасигъуна ГIумар — 3 дус.
Дебали уркIецIи-ряхIму агарти дургъби сарри илини чедаибти. ВатIан батахъес жан ахIерахIедарили, ургъули калун ГIялимяхI. Ил вяхъили, ца кьяшлизивад чулахъиубли чарухъунсири, сунела кIелра узи биалли, душма ванзаличиб игитла бебкIали алхун. Дургъбала замана бебкIибти кIел урши хIярибихьесалра хIебикили, уркIилизи кьакьадеш бакIибси ГIялимяхIла неш, гьандуцес хIериубли, ребкIибсири. Сай ГIялимяхI биалли, яхIличил хIерирулри. Ца кьяшлизивад валкIикIуси ГIялимяхI колхозла шоферли узулри. Илала хьунул ХIулаймат, сабицун батурли биштIатира, савлиличирад цIябдаайчи, колхозла хъумачи рузес рашулри. ГIебшни садаиб.
Савли гумайлавад чарухъунси ГIялимяхI викIар:
— Гьари, дила ХIулаймат, тебси диъ абушили шангра чебизурли, хинкIи дарес чебиркур. Нушачи гIяхIли лябкьниличила хабар лебну.
— Дудеш! Дудеш! Чи сая нушачи лявкьуси ишбархIи? — кьяшмази вирхули иб ГIумарли.
— ГIяхIял сай нушала вахъхIила, дила урши, Тасула ХIямид сай, уршира сайра, — иб ГIялимяхIли, виштIаси ГIумарличи хIерикIули.
Дудеш–нешлара ГIумарлара ихтилатличи калунти биштIатира учибикиб. Раисат биалли, нешла хъарбаркь таманбирули, шанг чебилзули рархилри.
ГIялимяхIли колхозла шофер сайлин, колхозла анкIи, мура ва цархIилти секIал хъарахъларад шилизи дихутири. Илабад анкIила гавлаг, букIунани бедибси диъ камбируси ахIенри. ГIяхIял вакIибхIели, яра сегъуна-биалра сяхIбатлис пайдалабирусири диъ.
Раисат башни балшули, пикрумазир сарри. Сунела делчIес гIягIнити дурсрачила, гьалмагъ рурсбачила пикририкIулри. Баши башнира, дучили жузи-тетрадунира, кьанхIериэс, къалабали, дуцIли школализи аррякьун. Раисат гIяхIил ручIусири, илис халараибхIели, тухтурла курсани делчIес дигутири. Ил пикрили Раисат, гьатIира къайгъичерли ручIусири.
Ил дебали жагаси рурсира сарри: тамай халахIераили хьалли, духуси хIер, халати цIудара хIулби, хъуцIрумачирад тIинтIдиубти гIеркъати, цIудара гъез сарри. РучIанна хIева ва цIуба гьалайхъан чегьурхIели, гьатIира жагали чериахъулри. Сунела лебил акьуси замана, урус учительница Рита Андреевнани дедибти жузи дучIули, буркIусири.
Школализирад чаррулхъухIели, Раисат гIяхIли лебниличи унзала гьала сараайчи шакхIерикиб. Ил сочинение сен-сен лукIусил пикрумазир ляркьулри. Азбарлар дигьунти кIел урчи чедаибхIели, гIур гьанбикиб гIяхIлачила.
Раисат сен-сен рухIнайхъусил пикририкIули лерли, неш унзаларад гьарракIили, пишряхъиб:
— Раисат, гьари, къалабарики! Нуша хIечи хIерлирагу!
ХIулайматли ил рухIна арацIахъиб.
— Иш сари нушала халалгъуна рурси, Раисат, — иб нешли рурси гьала рурхьули.
Урузриубси Раисатли, бакIибтачи хIер ахъбуцес хIериуб, саламра бедили, беркеси биран хъули къалабарикиб. Чинаб–биалра къаршибикалли, илди балра хIебала.
БурхIни яргали ардашулри, Раисат халакараили, жагькариубли, гьатIира жагаси рурси ретаурлири. ХIера, школа таманбарили, тухтурла курсани делчIес дедибти документунала жавабличи хIерли, тIашли лерри. ИлхIелира илис дугила бегIтала дигIянаси ихтилат гьанбиркули саби. Раисатли сен нешлис илцад тухтурла курсани хIейгутил иргъули ахIенри. ГIурра селичиларил бахъхIи, гIяшли гъайбикIули калун илди.
Рурси пикрумазирад Жавгьарла разиси тIамали чераргъахъиб:
— Раисат, мубаракрирулри хIура! Нура! Нушала документуни дуцили сари. Гьанна нушаб тухтурти детаэс багьандан къайгъичерли, гIяхIил дучIес чебиркур. Дахъал дучIес гIягIнити сари бикIулигу!
Жавгьар Раисатли бегI гьалар документуни дедес ракIибхIели, рагьурсири. ХьанцIаби гIячихъли хIердикIути хIулбира, берхIе делсунти чурмира, разиси, гIяш-гIяшси рурси сарри Жавгьар.
Раисатра Жавгьарра ункъли бучIути рурсби сабри. Илди лебил курсла бучIантас ва преподавательтас дигахъутири.
— ИшбархIи ну дебали разилира ГIяхIмадла, Жавгьарла ва Раисатла хIянчурбачи. «5» кьимат хIушаб, — иб биологияла преподавательница Сакинат МяхIяммадовнани.
Сабира шакхIебикили Жавгьарра, Раисатра, ГIяхIмадра дебали гьалмагъбикиб. Илди абзбикили «5» кьиматуначил бучIулри. Амма ГIяхIмад ва Раисат саби-ургар акIубти дигайличи, тамай шакбикили ахIенри.
Заманала бухъяндешли, илдала хIябъибил курс таманбирулри. ИмтихIянтала гIергъи, калунти кIел базлис, бучIанти хъули бархьиб. Рурсби-уршби бегIла гIергъиси бархIи цаличил ца гъайбухъун ва декIарбикиб. Шилизи башуси автобусличи кариили аркьухIели, Раисат пикририкIулри ГIяхIмадличила ва илини дурибти дугьбачила. Раисат автобусличирад карацIили, бахъхIи чехIебаибти бегIти ва узби-рузби чебаэс къалабарикIулри. Илини стипендияла арцлис асибти савгъатуначи узби-рузби дебали разибиуб. Неш дебали рархили, хурегуни дирули, дуцIрикIулри.
Ца-кIел бархIи дикиб. ГIялимяхI Раисатличи хIерикIули викIар:
— Гьари, ХIулаймат, буча тухумтира, чедизая шунгрира, дарая берклумира, нушала гIяхIли лябкьулину ишбархIи.
ХIулаймат Раисатличи хIерризур, гIур ГIялимяхIличи ва иб:
— Гьу, ГIялимяхI, гьанна Раисатлизи бурес замана баили саби.
— ХIуни бура. Ну лябкьутас гьуниваэс аркьясну. ХIядурра диирая, — ГIялимяхI хъуливад дуравхъун.
— Неш, селичила саби хIушаб бурес дигуси? — хьарбаиб селичилра шакхIерикибси Раисатли.
— ХIера, дила рурси, Раисат, 6 дус гьалаб нушазибад гъай сасес бакIибти Тасула ХIямидра уршира, ишбархIи мас хили лябкьули саби. ХIу хIядуррии, дила рурси! ХIечи сукни саби лябкьути. Иш гьакIлис адамтира имцIали лябкьян, — иб ХIулайматли ва беркеси хIядурбарес хъули къалабарикиб.
Раисат биалли, пикрумазир тIашли калун, нешли дурибти гъай гьандикахъес гъазализирри. Илала хIулбала гьалав ГIяхIмад сайри, илини дурибти гъай сарри гьандиркути.
Раисат жявхIейчирад кадизахъурти гIядатуни хIясибли халараахъибси сарри. Ил пикрумазир сарри: «Гьанна неш-дудешлизи се или гъайрикIес рирусира ну? Се рикIули иргъахъуси илдази наб дигхIейгни? 6 дус гьалаб бакIни сен хIебагьахъурсири набзи? ГIяхIмадлизи се рикIиша ну? Селичила гъайухъес дигули леврира ГIяхIмад?», — азир пикри лукьулри Раисатла бекIлизир.
Ил гьачам нешличи гъамрирулри, гьачам дирутази рирхулри.
— Вари, дила рурси, хIу селра марикIуд. ГIяхIси урши сай бикIули саби. Гьаланачи хала бегIти тухтурла курсличи кьабулхIебиркукъи, уршили кьабулбикахъили саби бикIар. ХIерли уусну, сунес илцад дигути курсани делчIахъес ратирая или. Сайра МяхIячкъалализив учIули сай бикIар. ХIела хала дудешла гIяхIли саби. Селра или ваймабилзахъид, жагали гьунираи, дила рурси! – иб ХIулайматли, Раисатла рачарархни чебиули.
Сен-сен биалра хIерира баиб, гIяхIли бакIесра замана баиб.
— ХIулаймат, гьари, рика Раисатра хIура раши, — вявъиб гIяхIли лебси хъуливад гьаввакIили ГIялимяхIли.
— Раши, дила рурси. Вари, нуни бурибси хъуммартид! — иб ХIулайматли ва гIяхIли лебси хъули бухIнаахъиб.
— Гьуя, ГIялимяхI, ХIулаймат, исбагьи ретаурли руилигу, нушала гелешмеш! Илис уилив дила ГIяхIмад, гелешмеш ручIуси мерличи сайра учIес вякьунси?!
Агь! Машааллагь! Машааллагь! — иб Тасула ХIямидли, разили гьачам уршиличи, гьачам Раисатличи хIулбира хIердикIахъули.
ИлхIели ахъдуцибти Раисатла хIулби, ГIяхIмадличи дархьдизур. Раисат шакрикиб, хIунтIенриуб. ГIяхIмадла гъай гьандикиб: «Нуша кIел базлис сарра хъули аркьути, амма ца-кIел бархIила духIнар къаршидиркехIе. ИтхIели гъайдулхъехIе! Иншааллагь!»
