Гьалабван МяхIячкъалализиб мягIничебси анцIбукь бетерхур – Дагъиста ва Россияла марси урши, «Дагъиста халкьани» жамигIятла-политикала журналла бекI редактор, 1956 ибил дуслизир Венгриялизир детаурти дявила анцIбукьунала бутIакьянчи МяхIяммад Рабазанович Кьурбанов «Чебла ва адамдеш» бикIуси ХIурматла орденничил шабагъатлавариб.
Гьайгьайрагу, пагьмучебти адамтачила дахъал жузи делкIунти, газетабазир макьалаби дурадухъунти, передачаби дарибти сари. Илдигъунтани алавчарли гIяхIси гьав алкIахъа, рухIла ва адаб-хIяяла давлуми чедирцIахъу, нушала жамигIят гьалабяхI башахънилизи белгиси пай кабирхьу.
Иш макьалализиб наб дебали адаб-хIяялашалси ва тамашаласи адамличила, улкала гьарли-марси патриот МяхIяммад Рабазанович Кьурбановличила бурес дигулра.
Шабагъатличил мубаракварес ил бархIи бакIиб илала бархкьяби, юлдашуни, гъамти, жамигIятла-политикала машгьурти хIяракатчиби — юстицияла генерал-лейтенант Т.Бижамов, ДР-ла урибси юрист, МяхIячкъала шагьарла халатала Советла председатель ГI.Бегов, М.Танкаевла уличилси жагьилтас патриот бяркъ бедлугнила Фондла председатель ХI.ГIябдулжалилов, историяла гIилмуртала доктор, профессор З.Нахибашев, Дагъиста халкьла поэт А.ГIябдулманапова ва бахъал цархIилти. ХI.ГIябдулжалиловли ХIурматла орден бедили гIергъи, кавалерлис лебтанилра уркIи-уркIиларад ванати дугьби далгун.
МяхIяммад Рабазанович акIубси сай 1935 ибил дуслизив декабрьла 19-личив Дахадаевла районна Кьункьи шилизив. Илала дудеш Рабазан Кьурбановла (1884-1979) динна чебяхIси белчIуди лебсири. 1919 ибил дусличивад 1942 ибил дусличи бикайчи Казикумухла ва Дахадаевла райисполкомтазив декIар-декIарти къуллукъуначив, ГIяштила ва Кьункьила шимала советуназив секретарьли, 1943-1946-ибти дусмазив биалли Кьункьила Крупскаяла уличилси колхозла счетоводли, бухгалтерли узули калун. 96 дусла гIямруличив вебкIиб. Неш ПатIимат Кьурбанова (1982-1984) лерилра дусмазир колхозлизив рузусири. Хъалибарглизиб 15 дурхIя лебри, илдазивад гьанна ца сай калунси. Неш 102 дус риубхIели гIямрулизирад шалгIеррухъунсири.
М.Кьурбановли Кьункьила бехIбихьудла школа таманбариб, гIур 5-6-ибти классуни хъараахъур ГIяштила верхIел дусла школализир, 7-ибил класс биалли – вихърила верхIел дусла школализиб. Гьаннара кьункьила школализиб гIяхIси белчIудилис илис бедибси грамота лебал.
1949 ибил дуслизив Дербентла педучилищелизи керхур, сабира 1951 ибил дуслизиб таманбарибси. Итди дусмазив ил кункси отлетикала шайчив республикала чемпион сайри. Педучилище таманабирили гIергъи, ил Меусишала верхIел дусла школализив учительли узес вехIихьиб. 1952-1954-ибти дусмазив Дахадаевла РК ВЛКСМ-лизив секратерьли узули калун.
Комсомоллизибси хIянчи гьарли-марти гIямруличи хIядурдеш бируси гIергъиси манзилли бетаур. 1954-1957-ибти дусмазиб СССР-лизиб ва Венгриялизиб Советунала гIярмияла къяяназиб къуллукъбариб. 1956 ибил дуслизир Венгриялизир детаурти дявила анцIбукьуназир бутIакьяндеш дариб. Къуллукъбируси замана, гъабзадеш дакIударни багьандан, дахъал баркаллала кагъурти, грамотаби, медальти ва цархIилти шабагъатуни касиб.
ГIярмиялизиб къуллукъбарили гIергъи, 1957-1962-ибти дусмазив ДГУ-ла филологияла факультетлизив учIули калун. ДГУ таманбарили, 1962-1963-ибил белчIудила дуслизив, ДАССР-ла багьудлуми тIинтIдирнила Министерствола направление хIясибли, Дахадаевла районна ДугIахъарла школализив директорли ва урус мезла учительли узули калун, 1963-1967-ибти дусмазив – Кьункьила школализив директорли.
1967-1970-ибти дусмазив Москвализив МГУ-ла философияла факультетлизив аспирантурализив учIусири, диссертация ункъли бетерхахъурхIели, Дагъиста медицинала институтлизи вархьибсири, илаб хIябал дус философияла кафедрализиб хIянчи бариб.
Итди дусмазиб МяхIяммад Рабазановичла бегIти бухънакабаилри, дурхIни биштIалири, ил багьандан 1973 ибил дуслизив илис Кьункьила шилизи чарухъес чебуркъуб, школализив директорли узес вехIихьиб. 1978 ибил дуслизив Кьункьила шила Советла председательли викIиб, илав 1980 ибил дусла октябрьличи бикайчи узули калун. Ил дуслизив ДАССР-ла шайчибси СССР-ла министртала советла гьалабси динна баркьудлумала шайчибси советла Уполномоченныйла заместительли катур, ил къуллукъличиб 1991 ибил дусличи бикайчи хIянчи бариб. Илди дусмазиб ДГПУ-лизиб философияла дурсрира кадирхьутири.
1991 ибил дуслизив М.Кьурбанов ДАССР-ла миллатунала баркьудлумала шайчибси Госкомитетла бекIливиубси специалистла къуллукъличи шурватурсири, 1992 ибил дуслизив биалли – ДР-ла миллатла политикала, багьахънибала ва дуралати бархбасунала шайчивси министрла заместительли. Цазаманализиб илини Дагъиста вузаназиб гIилмула-педагогикала шайчиб хIянчира бирусири ва Хасавюртла мер-муса хIясибли ДР-ла Правительствола Уполномоченныйла къуллукъунира дузахъутири.
МяхIяммад Рабазановичли буруливан, итхIели дебали ибкьти аги-кьяйдализиб хIербирулри. «Гьандиркули сари Хачилаевхъала узбани ва илдала шаликартани министртала Советла Юрт буцес дарибти къайгъни. Нушаб имканбакIиб Россияла бухIнабуцлизиб цаси Дагъистан калахъес. Амма нушала улкализир диубти дахъал дарсдешуначи хIядурли ахIентили урдухъунра, хаслира – приватизацияла, рушбатчидешла, экономикала масъулти ирзнила шайчир», — викIи ил. Илди лерилра масъулти ДР-ла миллатла политикала, багьахънибала ва дуралати бархбасунала шайчибси Министерстволи Дагъиста руководстволичил дарх ирзутири.
Дагъистайзирти политикала аги-кьяйда гьатIиралра вайдиуб 1998-1999-ибти дусмазир. 1999 ибил дуслизиб халкьани-ургабти къачагъуни БотIлихла районничи чебухъун. Илди дусмазив МяхIяммад Рабазанович верхIна Кьарамахьила мер-мусаличи вякьун ва БотIлихлизирти дявила анцIбукьуназир бутIакьяндеш дариб. Сен биалра Дайгъистайс имканбакIиб душманти агарбарес, аги-кьяйда низамличи дикахъес.
1999 ибил дусличивад М.Кьурбанов республикала жамигIятла-политикала «Дагъиста халкьани» журналла бекI редакторли катурси сай. Журналлизир тарихличила, культураличила, Дагъиста халкьанала гIядатуначила, илдала миллатла хасдешуначила, ишхIелла аги-кьяйдаличила аргъбаибти макьалаби кадирхъути сари. МяхIяммад Рабазановичла бекIдешлиуб журналла коллективлис Россияла багьахънибалашалси цаси майдайчиб белгиси мер буцес имканбакIиб. Журналла бекIлибиубси хIянчи саби республикализиб миллатла политика гьалабяхI башахъес жигарчебли икьалабарни.
МяхIяммад Рабазановичла лер гIяхIцад пачалихъла шабагъатуни: Гьалмагъдешла орден, ДАССР-ла Верховный Советла Президиумла, ДР-ла Пачалихъла советла, КПСС-ла Обкомла ХIурматла Грамотаби, дахъал медальти, ил лугIилизир – «1941-1945-ибти дусмала ЧебяхIси ВатIа дергълизиб Чедибдеш сархибхIейчирад 60 ва 70 дус». Ил «Дагъистан Республикала пачалихъла кабизла урибси хIянчизар» ХIурматла уличи лайикьикиб. Илини дахъал жузи, гIилмула макьалаби дураиб. Сунела хIянчурбазир илини политикала, миллатла бархбасунала, культурала, динна, адаб-хIяяла азаддешла, терроризмалис ва рушбатчидешлис къаршидеш дирнила масъулти хIердирули вирар.
МяхIяммад Рабазановичли урегал дурхIя абикьур. Илдазивад ца, Гьарун Кьурбанов, 2011 ибил дусла июльла 28-личив, хIилла дураберкIили, такьсирчибани кавшиб. Ил республикализив, жамигIятла-политикала хIяракатчи сайливан, машгьурсири. М.Кьурбановли дурхIнази чебяхIси даражала белчIуди касахъиб. Лебилра чула хъалибаргуначил хIеркабирули, жамигIятлис ва республикалис гIяхIдеш бихули, бузули саби.
